Instagram | ఇన్‌స్టాగ్రామ్‌లో కొత్త ఫీచర్.. ఇక ట్యాగ్ చేసిన పోస్టులూ ప్రొఫైల్‌లోనే..

Instagram | ప్ర‌ముఖ సోష‌ల్ మీడియా ప్లాట్‌ఫామ్ ఇన్‌స్టాగ్రామ్ త‌న యూజ‌ర్ల‌కు మ‌రిన్ని కొత్త ఫీచ‌ర్ల‌ను అందుబాటులోకి తెచ్చింది. ఈ ఫీచ‌ర్లు ప్ర‌పంచ‌వ్యాప్తంగా యూజ‌ర్ల‌కు అందుబాటులోకి వ‌చ్చాయి. ఇకపై యూజర్లను ట్యాగ్ చేసిన పోస్టులను నేరుగా వారి ప్రధాన ప్రొఫైల్ గ్రిడ్‌లో ప్రదర్శించుకునే అవకాశం ఉంటుంది. ఇప్పటివరకు యూజర్లు స్వయంగా పోస్ట్ చేసిన ఫొటోలు, వీడియోలు మాత్రమే ప్రధాన ప్రొఫైల్ గ్రిడ్‌లో కనిపించేవి. ఇతరులు ట్యాగ్ చేసిన ఫొటోలు, వీడియోలు మాత్రం ప్రత్యేకమైన ట్యాగ్ చేసిన విభాగంలో మాత్రమే కనిపించేవి. తాజా మార్పుతో క్రియేటర్‌లతో కలిసి చేసిన కంటెంట్, గ్రూప్ ఫొటోలు, ఇతరులు షేర్ చేసిన మీడియాను కూడా ప్రధాన ప్రొఫైల్‌లో భాగంగా చూపించుకోవచ్చు. దీంతో తమ ప్రొఫైల్ ఎలా కనిపించాలనే విషయంలో యూజర్లకు మరింత నియంత్రణ లభించనుంది.

ఎలా వాడాలి..

ట్యాగ్ చేసిన పోస్టును ప్రధాన ప్రొఫైల్ గ్రిడ్‌లోకి తీసుకురావడానికి మూడు మార్గాలు ఉన్నాయి. మొదటిది.. డైరెక్ట్ మెసేజ్ నోటిఫికేషన్ ద్వారా. ఎవరైనా యూజ‌ర్‌ను పోస్టులో ట్యాగ్ చేసినప్పుడు వచ్చే ట్యాగ్ అలర్ట్‌లోనే ఈ పోస్టును ప్రధాన గ్రిడ్‌లో చేర్చే ఆప్షన్‌ను ఎంచుకోవచ్చు. రెండోది.. పోస్టు ఆప్షన్స్ మెనూ ద్వారా. యూజ‌ర్ ట్యాగ్ చేసిన అర్హత ఉన్న పోస్టును ఓపెన్ చేసి, మూడు చుక్కల మెనూను ట్యాప్ చేయ‌డం ద్వారా దాన్ని ప్రధాన ప్రొఫైల్ గ్రిడ్‌లో చేర్చుకోవచ్చు. మూడోది.. ట్యాగ్ చేసిన విభాగం ద్వారా. యూజ‌ర్ ప్రొఫైల్‌లో ఇప్పటికే ఉన్న ట్యాగ్ చేసిన ట్యాబ్‌లో కావాల్సిన పోస్టుపై కొద్దిసేపు ట్యాప్ చేసి ఉంచడం ద్వారా కూడా ఆ పోస్టును ప్రధాన గ్రిడ్‌లోకి తీసుకురావచ్చు.

ఎలా క‌నిపిస్తుంది..

ప్రధాన గ్రిడ్‌లోకి చేర్చిన ట్యాగ్ చేసిన కంటెంట్ సాధారణంగా అసలు పోస్టు ప్రచురించిన తేదీ ఆధారంగా రివర్స్ క్రోనలాజికల్ క్రమంలో కనిపిస్తుంది. అయితే యూజర్ తన ప్రొఫైల్ గ్రిడ్ అమరికను మాన్యువల్‌గా మార్చుకుని ఉంటే, ఆ కస్టమ్ అమరికకు అనుగుణంగా పోస్టుల స్థానాన్ని నిర్వహించుకోవచ్చు. అలాగే ఈ ఫీచర్‌లో మార్పులను తిరిగి సవరించుకునే అవకాశం కూడా ఉంది. ప్రధాన గ్రిడ్ నుంచి ట్యాగ్ చేసిన పోస్టును ఎప్పుడైనా తొలగించవచ్చు. అయితే అలా తొలగించినంత మాత్రాన అసలు పోస్టు తొలగిపోదు. ఆ పోస్టు సృష్టించిన వ్యక్తి ప్రొఫైల్‌లో అది యథావిధిగా ఉంటుంది. అలాగే యూజ‌ర్ ప్రొఫైల్‌లోని ప్రత్యేకమైన ట్యాగ్ చేసిన విభాగం నుంచి కూడా ఆ పోస్టు తొలగిపోదు.