Stock Markets | చమురు ధ‌ర‌ల ఆందోళ‌న‌తో కుదేలైన మార్కెట్లు.. సెన్సెక్స్, నిఫ్టీ మళ్లీ నష్టాల్లో..

Stock Markets | భారత స్టాక్ మార్కెట్‌ల‌లో శుక్రవారం మరోసారి నిరాశాజనక ట్రేడింగ్ నమోదైంది. మధ్యప్రాచ్యంలో శాంతి ఒప్పందంపై నెలకొన్న అనిశ్చితి, హోర్ముజ్ జలసంధి పరిస్థితులపై తాజా ఆందోళనలతో అంతర్జాతీయ మార్కెట్లో ముడి చమురు ధరలు మళ్లీ పెరగడం దేశీయ ఈక్విటీ మార్కెట్‌ల‌పై ప్రతికూల ప్రభావం చూపింది. ఆటో, టెక్నాలజీ షేర్లు లాభాల్లో ముగిసినా, ఫైనాన్షియల్ రంగంలోని భారీ షేర్ల బలహీనత బెంచ్‌మార్క్ సూచీలను ఒత్తిడిలోకి నెట్టింది. నిఫ్టీ 50 సూచీ 0.32 శాతం పడిపోయి 24,557 వద్ద ముగియగా, సెన్సెక్స్ 0.59 శాతం క్షీణించి 78,491 వద్ద స్థిరపడింది. విస్తృత మార్కెట్లలో మిశ్రమ ధోరణి కనిపించింది. నిఫ్టీ మిడ్‌క్యాప్ 100 సూచీ 0.22 శాతం పెరగ్గా, నిఫ్టీ స్మాల్‌క్యాప్ 100 సూచీ 0.06 శాతం స్వల్పంగా తగ్గింది. రంగాల వారీగా చూస్తే నిఫ్టీ ఫైనాన్షియల్ సర్వీసెస్, కన్స్యూమర్ డ్యూరబుల్స్, కెమికల్స్, రియాల్టీ సూచీల్లో భారీ అమ్మకాలు చోటుచేసుకున్నాయి. మరోవైపు ఆటో, ఐటీ, మెటల్ రంగాల షేర్లు లాభాలతో ముగిశాయి.

సూచీల‌పై ఫైనాన్షియ‌ల్ రంగ స్టాక్స్ ప్ర‌భావం..

ఫైనాన్షియల్ రంగంలోని భారీ షేర్లలో బలహీనతకు ప్రధాన కారణం భారతీయ రిజర్వ్ బ్యాంక్ (ఆర్‌బీఐ) విడుదల చేసిన ముసాయిదా ప్రతిపాదనగా మార్కెట్ విశ్లేషకులు చెబుతున్నారు. బ్యాంకేతర రుణ సంస్థలు అందిస్తున్న కొన్ని రివాల్వింగ్ క్రెడిట్ ఉత్పత్తులపై పరిమితులు విధించే అవకాశం ఉందనే ఆందోళన పెట్టుబడిదారుల్లో కనిపించింది. మధ్యప్రాచ్య పరిణామాలు కూడా మార్కెట్ సెంటిమెంట్‌ను ప్రభావితం చేశాయి. హోర్ముజ్ జలసంధి ద్వారా నౌకాయాన రాకపోకల‌ను పూర్తిస్థాయిలో పునరుద్ధరిస్తారా అనే విష‌యంలో అనిశ్చితి కొనసాగుతోంది. అలాగే హోర్ముజ్ జలసంధిలో రాకపోకల నిర్వహణపై ఇరాన్, ఒమాన్ దేశాలు ఒక ఒప్పందానికి చేరువైనట్లు సమాచారం వెలువడింది. ప్రతిపాదిత ఇరాన్-ఒమాన్ ఒప్పందం ప్రకారం అమెరికా, ఇజ్రాయెల్‌కు చెందిన నౌకలు హోర్ముజ్ జలసంధి గుండా ప్రయాణించకుండా నిషేధించాలని, తమకు శత్రుదేశాలుగా భావించే దేశాలు ముందుగా పరిహారం చెల్లించిన తర్వాతే ఆ మార్గంలో ప్రయాణానికి అనుమతి ఇవ్వాలని టెహ్రాన్ కోరుతున్నట్లు నివేదికలు వెల్లడించాయి.

బ‌ల‌హీన‌ప‌డిన రూపాయి..

ఈ పరిణామాల నేపథ్యంలో అంతర్జాతీయ మార్కెట్లో ముడి చమురు ధరలు పెరిగాయి. అయితే సెష‌న్ ముగింపు సమ‌యంలో చ‌మురు ధ‌ర‌లు స్వ‌ల్పంగా త‌గ్గాయి. బ్రెంట్ క్రూడ్ ధ‌ర 1.58 శాతం త‌గ్గి బ్యారెల్‌కు 81 డాల‌ర్ల‌కు చేర‌గా, డ‌బ్ల్యూటీఐ క్రూడ్ ధ‌ర 1.40 శాతం త‌గ్గి బ్యారెల్‌కు 77 డాల‌ర్ల‌కు వ‌చ్చింది. ఫారెక్స్ మార్కెట్‌లో భార‌త రూపాయి మ‌ళ్లీ ప‌త‌న‌మైంది. అమెరికా డాల‌ర్‌తో పోలిస్తే 95.1980 వ‌ద్ద ఉన్న రూపాయి సెష‌న్‌లో 0.09 శాతం మేర న‌ష్ట‌పోయింది.