Stock Markets | మార్కెట్లకు విదేశీ పెట్టుబడుల అండ.. 478 పాయింట్లు లాభపడిన సెన్సెక్స్..

Stock Markets | దేశీయ ఈక్విటీ మార్కెట్లు సోమవారం లాభాల్లో ప్రారంభమయ్యాయి. అంతర్జాతీయ మార్కెట్లలో సానుకూల పరిస్థితులు, క్రూడ్ ఆయిల్ ధరలు తగ్గడం, విదేశీ పెట్టుబడుల రాకతో సెన్సెక్స్, నిఫ్టీ సూచీలు పుంజుకున్నాయి. ఉదయం 9:30 గంటల సమయంలో సెన్సెక్స్ 478.05 పాయింట్లు (0.64 శాతం) లాభంతో 74,773.01 వద్ద ట్రేడవుతుండగా, నిఫ్టీ 58.25 పాయింట్లు (0.25 శాతం) పెరిగి 23,404.65 వద్ద కొనసాగింది. మార్కెట్లకు ప్రధానంగా క్రూడ్ ఆయిల్ ధరల తగ్గుదల మద్దతుగా నిలిచింది. అంతర్జాతీయ చమురు బెంచ్‌మార్క్ బ్రెంట్ క్రూడ్ ధర 2.25 శాతం తగ్గి బ్యారెల్‌కు 101.5 అమెరికన్ డాలర్లకు చేరింది. సౌదీ అరేబియా నుంచి చమురు సరఫరాలు తిరిగి సాధారణ స్థాయికి వచ్చే అవకాశం ఉందన్న అంచనాలు ధరలపై ప్రభావం చూపాయి. ముడి చమురు ధరలు తగ్గడం భారత్ వంటి చమురు దిగుమతి ఆధారిత దేశాలకు సానుకూల అంశంగా పరిగణిస్తారు.

విదేశీ పెట్టుబ‌డిదారుల కొనుగోళ్లు..

విదేశీ సంస్థాగత పెట్టుబడిదారులు వరుసగా ఏడు సెషన్ల పాటు విక్రయాలు జరిపిన తర్వాత శుక్రవారం భారత ఈక్విటీల్లో నికర కొనుగోలుదారులుగా మారారు. వారు సుమారు రూ.599 కోట్ల విలువైన షేర్లను కొనుగోలు చేశారు. దేశీయ సంస్థాగత పెట్టుబడిదారులు కూడా కొనుగోళ్లను కొనసాగిస్తూ, అదే సెషన్‌లో రూ.1వేయి కోట్లకు పైగా పెట్టుబడులు పెట్టారు. దీంతో మార్కెట్‌లో కొనుగోళ్లకు కొంత మద్దతు లభించింది. ఆసియా మార్కెట్లలోనూ సానుకూల ధోరణి కనిపించింది. దక్షిణ కొరియా కోస్పి, షాంఘై ఎస్ఎస్ఈ కాంపోజిట్, హాంకాంగ్ హ్యాంగ్‌సెంగ్ సూచీలు లాభాల్లో ట్రేడయ్యాయి. ముఖ్యంగా కోస్పి ఒక శాతానికి పైగా పెరగడం భారత మార్కెట్లకు అనుకూల సంకేతంగా నిలిచింది. అమెరికా మార్కెట్లు కూడా శుక్రవారం ప్రధానంగా లాభాల్లో ముగిశాయి.

షార్ట్ క‌వరింగ్ జరిగే చాన్స్‌..

ఇటీవల వరుసగా ఆరు వారాల పాటు నిఫ్టీ, సెన్సెక్స్ క్షీణించడంతో తక్కువ స్థాయిల వద్ద కొనుగోళ్లు కూడా కనిపించాయి. గత ఆరు వారాల పతనం ఆరు సంవత్సరాల్లో నమోదైన అత్యంత దీర్ఘమైన వారపు నష్టాల పరంపరగా నిలిచింది. ఈ నేపథ్యంలో కొంత బేరం కొనుగోలు, షార్ట్ కవరింగ్ జరిగే అవకాశం ఉందని ఎస్‌ఎంసీ గ్లోబల్‌కు చెందిన సౌరభ్ జైన్ పేర్కొన్నారు. అయితే దేశీయ మార్కెట్ సెంటిమెంట్ మాత్రం జాగ్రత్తగా లేదా తటస్థంగా ఉందని ఆయన తెలిపారు. షేర్ల విషయానికి వస్తే హెచ్‌డీఎఫ్‌సీ బ్యాంక్, ఐసీఐసీఐ బ్యాంక్ సుమారు 0.6 శాతం చొప్పున లాభపడ్డాయి. మార్గన్ స్టాన్లీ ఇండియన్ హోటల్స్ షేర్లను ఈక్వల్ వెయిట్ నుంచి ఓవర్‌వెయిట్ కు అప్‌గ్రేడ్ చేయడంతో ఆ కంపెనీ షేరు సుమారు 2 శాతం పెరిగింది. ఇటీవలి దిద్దుబాటు తర్వాత ఆకర్షణీయమైన విలువలు, స్థిరమైన ఆదాయ అంచనాలను కారణాలుగా మార్గన్ స్టాన్లీ పేర్కొంది.