RBI | భారీగా పెర‌గ‌నున్న వ‌డ్డీ రేట్లు..? రుణం ఇక మ‌రింత ప్రియం..

RBI | ద్రవ్యోల్బణం పెరుగుతుండడం, బ్యాంకింగ్‌ వ్యవస్థలో భారీగా అదనపు నగదు లభ్యత ఉండడం, ప్రపంచవ్యాప్తంగా వడ్డీ రేట్ల పెంపు కొనసాగుతున్న నేపథ్యంలో భారతీయ రిజర్వ్‌ బ్యాంక్ (ఆర్‌బీఐ) కీలక నిర్ణయాలు తీసుకునే అవకాశం కనిపిస్తోంది. డిసెంబర్‌ నాటికి రెపో రేటును మొత్తం 50 బేసిస్‌ పాయింట్ల మేర పెంచే అవకాశం ఉందని మార్కెట్‌ వర్గాలు అంచనా వేస్తున్నాయి. అక్టోబర్‌లో 25 బేసిస్‌ పాయింట్లు, డిసెంబర్‌లో మరో 25 బేసిస్‌ పాయింట్లు పెంచితే ప్రస్తుత 5.50 శాతం నుంచి రెపో రేటు 6 శాతానికి చేరుకునే అవకాశం ఉంటుంది. ఒక బేసిస్‌ పాయింట్‌ అంటే ఒక శాతం పాయింట్‌లో వందో వంతు. ప్రస్తుతం ద్రవ్యోల్బణం ఆర్‌బీఐ గతంలో వేసిన అంచనాలను మించే అవకాశం ఉందన్న ఆందోళనలు కూడా వడ్డీ రేట్ల పెంపునకు కారణంగా మారుతున్నాయి. ముఖ్యంగా అంతర్జాతీయంగా ముడి చమురు ధరలు బ్యారెల్‌కు 90 నుంచి 110 డాలర్ల స్థాయిలో కొనసాగితే, ఉత్పత్తి వ్యయాలు పెరిగి వాటి ప్రభావం తుది ఉత్పత్తుల ధరలపై పడే అవకాశం ఉందని సిస్టమాటిక్స్‌ గ్రూప్‌ తన నివేదికలో పేర్కొంది. ప్రస్తుత రెపో రేటుతో వాస్తవ వడ్డీ రేటు ప్రతికూలంగా మారే పరిస్థితి ఉందని, దీర్ఘకాలం పాటు ఇలాంటి చ‌వ‌క రుణ పరిస్థితి కొనసాగడం స్థిరంగా ఉండదని తెలిపింది.

పెరుగుతున్న ద్ర‌వ్యోల్బ‌ణం..

దేశంలో రిటైల్‌ ద్రవ్యోల్బణం కూడా పెరుగుతోంది. జూలైలో 4.45 శాతంగా ఉన్న వినియోగదారుల ధరల ఆధారిత ద్రవ్యోల్బణం ఆగస్టులో 4.82 శాతానికి చేరింది. సెప్టెంబర్‌ నాటికి ఇది దాదాపు 5 శాతానికి చేరుకునే అవకాశం ఉందని ఆర్థికవేత్తలు అంచనా వేస్తున్నారు. మరోవైపు ముడి చమురు ధరలు అధిక స్థాయిలో కొనసాగితే రవాణా, తయారీ, ఇతర రంగాల వ్యయాలు పెరిగి ద్రవ్యోల్బణంపై మరింత ఒత్తిడి ఏర్పడే అవకాశం ఉంటుంది. బ్యాంకింగ్‌ వ్యవస్థలో ఏర్పడిన భారీ అదనపు నగదు లభ్యత కూడా ఆర్‌బీఐకి మరో సవాలుగా మారింది. ముఖ్యంగా ప్రత్యేక నాన్‌-రెసిడెంట్‌ డిపాజిట్‌ పథకం ద్వారా వచ్చిన విదేశీ నిధులు వ్యవస్థలో లిక్విడిటీని గణనీయంగా పెంచాయి. సుమారు 127 బిలియన్‌ డాలర్ల ఎఫ్‌సీఎన్‌ఆర్‌(బి) నిధుల ప్రవాహం బ్యాంకింగ్‌ వ్యవస్థలో అదనపు లిక్విడిటీకి ప్రధాన కారణమైందని విశ్లేషకులు అంచనా వేస్తున్నారు.

రూ.15 ల‌క్ష‌ల కోట్ల మిగులు..

ఎఫ్‌సీఎన్‌ఆర్‌(బి) నిధుల కారణంగా సుమారు రూ.15 లక్షల కోట్ల కోర్‌ లిక్విడిటీ మిగులు ఏర్పడిందని హెచ్‌ఎస్‌బీసీ తన నివేదికలో పేర్కొంది. బ్యాంకింగ్‌ వ్యవస్థలో అధిక లిక్విడిటీ కొనసాగితే అది వేగంగా ద్రవ్యోల్బణానికి దారితీయడంతోపాటు, బ్యాంకులు అధిక నగదు లభ్యతపై ఆధారపడే పరిస్థితి ఏర్పడితే ఆర్థిక స్థిరత్వానికి కూడా ముప్పు కలిగించే అవకాశం ఉందని హెచ్‌ఎస్‌బీసీ తెలిపింది. అదనపు నిధులను తగ్గించేందుకు ఆర్‌బీఐ ఇప్పటికే పలు చర్యలు చేపట్టింది. ఓపెన్‌ మార్కెట్‌ ఆపరేషన్స్‌ (ఓఎంఓ), వేరియబుల్‌ రేట్‌ రివర్స్‌ రెపో (వీఆర్‌ఆర్‌ఆర్‌) వేలం వంటి సాధనాల ద్వారా బ్యాంకింగ్‌ వ్యవస్థ నుంచి అదనపు నిధులను ఉపసంహరిస్తోంది. ఇప్పటివరకు దాదాపు రూ.2.5 లక్షల కోట్ల లిక్విడిటీని ఆర్‌బీఐ శోషించిందని, రాబోయే నెలల్లో మరో రూ.4 లక్షల కోట్ల వరకు అదనపు లిక్విడిటీని వీఆర్‌ఆర్‌ఆర్‌ తదితర చర్యల ద్వారా ఉపసంహరించే అవకాశం ఉందని విశ్లేషకులు అంచనా వేస్తున్నారు.

సామాన్యుల‌పై ప్ర‌భావం..

అయితే రెపో రేటు పెంపు ప్రభావం సామాన్య ప్రజలపై నేరుగా కనిపించే అవకాశం ఉంది. ఆర్‌బీఐ అక్టోబర్‌, డిసెంబర్‌ నెలల్లో 25 బేసిస్‌ పాయింట్ల చొప్పున రేటు పెంచి రెపో రేటును 6 శాతానికి తీసుకెళితే, బ్యాంకులు కూడా రుణాలపై వడ్డీ రేట్లను పెంచే అవకాశం ఉంటుంది. దీంతో ఫ్లోటింగ్‌ వడ్డీతో ఉన్న గృహ, వాహన, వ్యక్తిగత రుణాల ఈఎంఐలు పెరుగుతాయి లేదా రుణ కాలవ్యవధిని పొడిగిస్తారు. మరోవైపు బ్యాంకులు డిపాజిట్లపై వడ్డీ రేట్లను పెంచితే పొదుపు చేసే వారికి కొంత అదనపు వడ్డీ ఆదాయం లభించే అవకాశం ఉంటుంది. ఇలా రుణాల వ్యయాన్ని పెంచడం, మార్కెట్‌లో అదనపు నగదు లభ్యతను తగ్గించడం ద్వారా ద్రవ్యోల్బణాన్ని నియంత్రించడమే ఆర్‌బీఐ చర్యల ప్రధాన ఉద్దేశంగా ఉండ‌నుంద‌ని విశ్లేష‌కులు చెబుతున్నారు.