Smart Phone | వర్షాకాలంలో ఫోన్ సేఫ్‌గా ఉండాలంటే.. తప్పక పాటించాల్సిన 15 జాగ్రత్తలు..

Smart Phone | వర్షాకాలంలో స్మార్ట్‌ఫోన్‌ను రక్షించుకోవడానికి వాటర్‌ప్రూఫ్ ఫోన్ పౌచ్ ఉపయోగించడం అత్యంత సులభమైన మార్గాల్లో ఒకటి. ఇది భారీ వర్షంలో నీటి చినుకుల నుంచి ఫోన్‌ను కాపాడటమే కాకుండా, కాల్స్ చేయడం, మ్యాప్స్ ఉపయోగించడం, మెసేజ్‌లు పంపడం వంటి పనులకు టచ్‌స్క్రీన్‌ను సాధారణంగా ఉపయోగించుకునే వీలును కూడా కల్పిస్తుంది. వర్షంలో తడిసిన దుస్తుల కారణంగా ఫోన్ నేరుగా నీటిలో పడకపోయినా తేమకు గురయ్యే అవకాశం ఉంటుంది. అందువల్ల ఫోన్‌ను వాటర్‌ప్రూఫ్ బ్యాగ్‌లో, బ్యాక్‌ప్యాక్‌లోని పొడి కంపార్ట్‌మెంట్‌లో లేదా లోపలి పొడి జేబులో ఉంచడం మంచిది. చార్జింగ్ పోర్ట్‌లో తేమ ఉన్నప్పుడు ఫోన్‌ను చార్జ్ చేయడం వల్ల అంతర్గత భాగాలు దెబ్బతినే ప్రమాదం ఉంటుంది. అలాగే భద్రతా హెచ్చరికలు కూడా క‌నిపిస్తాయి. కాబట్టి చార్జింగ్‌కు ముందు ఫోన్ పూర్తిగా త‌డి ఆరిపోయిందని నిర్ధారించుకోవాలి.

షాక్ ప్రూఫ్ కేస్‌ల‌ను వాడాలి..

షాక్‌ప్రూఫ్ కేస్‌తోపాటు పైకి లేచిన అంచులు ఉన్న కవర్ ఉపయోగించడం వల్ల జారుడు రోడ్లపై ఫోన్ పడిపోయినా రక్షణ లభిస్తుంది. తేలికపాటి వర్షం ప్రభావాన్ని కూడా ఇది కొంతవరకు తగ్గిస్తుంది. వర్షపు చినుకులు, వేలిముద్రలు స్క్రీన్‌తోపాటు కెమెరా నాణ్యతను కూడా ప్రభావితం చేస్తాయి. మైక్రోఫైబర్ క్లాత్‌తో తేమను నెమ్మ‌దిగా తుడవడం ద్వారా స్క్రీన్, కెమెరా లెన్స్‌లపై గీతలు పడకుండా శుభ్రం చేయవచ్చు. తడిసిన ఫోన్‌ను బియ్యంలో పెట్టడం వల్ల అది త్వరగా ఆరిపోతుందని చాలామంది నమ్ముతారు. అయితే ఇది ఒక అపోహ మాత్రమే. నిపుణుల సూచనల ప్రకారం ఫోన్‌ను వెంటనే స్విచ్ ఆఫ్ చేసి, జాగ్రత్తగా ఆరబెట్టి, తయారీ సంస్థ సూచించిన విధానాలను అనుసరించాలి.

ఫోన్ నీటిలో ప‌డితే..

అనుకోకుండా నీటి వల్ల ఫోన్ పూర్తిగా పనిచేయకుండా పోయే అవకాశం ఉంటుంది. అలాంటి పరిస్థితుల్లో ఫొటోలు, కాంటాక్ట్‌లు, ముఖ్యమైన ఫైళ్లను కోల్పోకుండా ఉండేందుకు ఆటోమేటిక్ క్లౌడ్ బ్యాకప్‌ను ముందుగానే ప్రారంభించి ఉంచడం మంచిది. అధిక తేమ, ఆవిరి కూడా క్రమంగా ఫోన్‌లోకి తేమ చేరేలా చేస్తాయి. అందుకే వేడి షవర్‌లు, ఆవిరితో నిండిన బాత్‌రూమ్‌ల దగ్గర ఫోన్‌ను ఎక్కువసేపు ఉంచకూడ‌దు. చార్జింగ్ పోర్ట్‌లో నీరు చేరితే, పోర్ట్ భాగం కిందికి ఉండేలా ఫోన్‌ను నెమ్మ‌దిగా తట్టి, గాలి బాగా వచ్చే పొడి ప్రదేశంలో కొంతసేపు ఉంచాలి. టిష్యూ పేపర్, కాటన్ బడ్స్ లేదా లోహ వస్తువులను పోర్ట్‌లో పెట్టి శుభ్రం చేయడానికి ప్రయత్నించకూడదు. వర్షపు చినుకులు, దుమ్ము కారణంగా ఫొటోల నాణ్యత తగ్గుతుంది. వర్షాకాలంలో ఫొటోలు తీసే ముందు కెమెరా లెన్స్‌లను మృదువుగా తుడవడం అలవాటు చేసుకోవాలి. సిలికా జెల్ ప్యాకెట్లు బ్యాగ్‌లు, ఫోన్ కేస్‌లలోని అదనపు తేమను పీల్చుకుంటాయి. ప్రయాణాల సమయంలో ఎలక్ట్రానిక్ పరికరాలకు ఇవి అదనపు రక్షణను అందిస్తాయి.

ఫోన్‌ను ఆన్‌లో ఉంచ‌వ‌ద్దు..

ఫోన్ అనుకోకుండా నీటిలో తడిస్తే వెంటనే స్విచ్ ఆఫ్ చేయాలి. ఫోన్ ఆన్‌లో ఉంచితే అంతర్గత భాగాలు మరింత దెబ్బతినే ప్రమాదం పెరుగుతుంది. భారీ వర్షంలో ఫోన్ ఉపయోగించడం వల్ల స్పీకర్లు, మైక్రోఫోన్‌లు, చార్జింగ్ పోర్ట్‌లలోకి నీరు చేరే అవకాశం ఎక్కువగా ఉంటుంది. సాధ్యమైనంత వరకు ఆశ్రయం ఉన్న ప్రదేశానికి వెళ్లిన తర్వాత మాత్రమే ఫోన్ ఉపయోగించడం మంచిది. అత్యవసర ఫోన్ నంబర్లను క్లౌడ్ సేవల్లో భద్రపరచడం లేదా ముఖ్యమైన నంబర్లను ప్రత్యేకంగా రాసి ఉంచడం మంచిది. ఫోన్ పనిచేయకపోయినా అవసరమైన సంప్రదింపులు అందుబాటులో ఉంటాయి. అన్ని స్మార్ట్‌ఫోన్‌లు ఒకే స్థాయి నీటి రక్షణను అందించవు. మీ ఫోన్‌లో ఉన్న ఐపీ రేటింగ్‌ను పరిశీలించి అది ఎంతవరకు నీటి ప్రభావాన్ని తట్టుకోగలదో తెలుసుకోవాలి. ముఖ్యంగా వాటర్ రెసిస్టెంట్ అంటే పూర్తిగా వాటర్‌ప్రూఫ్ అని అర్థం కాదని గుర్తుంచుకోవాలి.