Google | ఆటోమేటిక్ ఏఐ ఏజెంట్‌ను లాంచ్ చేసిన గూగుల్‌.. యూజర్ల ప‌నుల‌న్నీ వేగంగా పూర్తి చేస్తుంది..

Google | గూగుల్ తన కొత్త ఆటోమేటిక్ ఆర్టిఫిషియల్ ఇంటెలిజెన్స్ (ఏఐ) ఏజెంట్ జెమిని స్పార్క్ ను భారత్‌లోని గూగుల్ ఏఐ ప్రొ, గూగుల్ ఏఐ అల్ట్రా సబ్‌స్క్రైబర్లకు అందుబాటులోకి తీసుకువ‌చ్చింది. ఈ కొత్త ఏఐ ఏజెంట్ గూగుల్ వర్క్‌స్పేస్‌లో వినియోగదారుల తరఫున డిజిటల్ పనులను స్వయంగా నిర్వహించేలా ప‌నిచేస్తుంది. జెమిని స్పార్క్ గూగుల్ క్లౌడ్ మౌలిక వసతులపై పనిచేస్తుంది. వినియోగదారు మొబైల్ లేదా కంప్యూటర్‌ను ష‌ట్ డౌన్ చేసినా లేదా లాక్ చేసినా, ఇది బ్యాక్‌గ్రౌండ్‌లో వివిధ దశల పనులను కొనసాగిస్తూ పూర్తి చేస్తుంది. జెమిని 3.6 ఫ్లాష్ మోడల్ ఆధారంగా పనిచేసే జెమిని స్పార్క్ వినియోగదారు అడిగిన ప్రశ్నలకు మాత్రమే సమాధానం ఇచ్చే ఏఐ నుంచి, స్వయంగా పనులు నిర్వహించే ఏఐ ఏజెంట్‌గా మారింది. ఇది ఎలాంటి ప్రత్యేక సెటప్ లేదా మాన్యువల్ కాన్ఫిగరేషన్ అవసరం లేకుండానే జీమెయిల్, గూగుల్ డాక్స్, గూగుల్ షీట్స్ వంటి గూగుల్ వర్క్‌స్పేస్ యాప్‌లతో నేరుగా అనుసంధానమై పనిచేస్తుంది.

డివైస్ యాక్టివ్‌గా లేక‌పోయినా..

జెమిని స్పార్క్ ప్రధానంగా సురక్షితమైన క్లౌడ్ మౌలిక వసతులపై బ్యాక్‌గ్రౌండ్‌లో పనిచేస్తుంది. వినియోగదారు పరికరం యాక్టివ్‌గా లేకపోయినా, ముందుగా షెడ్యూల్ చేసిన లేదా నిర్దిష్ట ట్రిగ్గర్‌ల ఆధారంగా పనులను పూర్తి చేస్తుంది. గూగుల్ వర్క్‌స్పేస్‌లోని అనుసంధానమైన యాప్‌లలోని సమాచారాన్ని చదవడం, అప్‌డేట్ చేయడం, ఫార్మాట్ చేయడం వంటి పనులను వినియోగదారు సూచించిన వర్క్‌ఫ్లో ప్రకారం నిర్వహిస్తుంది. భద్రత పరంగా కూడా గూగుల్ ప్రత్యేక జాగ్రత్తలు తీసుకుంది. ఆర్థిక లావాదేవీలు చేయడం లేదా ఇతరులకు ఈ-మెయిల్ పంపడం వంటి కీలక చర్యలను తుది దశలో అమలు చేయడానికి ముందు వినియోగదారు నుంచి స్పష్టమైన అనుమతి తప్పనిసరిగా తీసుకుంటుంది. అలాగే జెమిని స్పార్క్‌కు ఏయే యాప్‌లకు యాక్సెస్ ఇవ్వాలనే అంశాన్ని పూర్తిగా వినియోగదారే నిర్ణయించవచ్చు. అవసరమైతే ఈ సేవను ఎప్పుడైనా ఆన్ లేదా ఆఫ్ చేసుకునే అవకాశం కూడా ఉంటుంది.

రోజువారీ ప‌నులు సుల‌భంగా..

రోజువారీ పరిపాలనా పనులను సులభతరం చేయడమే జెమిని స్పార్క్ ప్రధాన లక్ష్యం. ప్రయాణాలకు సంబంధించిన కన్ఫర్మేషన్ ఈ-మెయిల్‌లను స్వయంగా విశ్లేషించి, గూగుల్ షీట్స్‌లో ట్రిప్ వివరాలను అప్‌డేట్ చేయడంతోపాటు గూగుల్ క్యాలెండర్‌లో ఖాళీగా ఉన్న సమయాల్లో స్థానిక ఈవెంట్‌లను కూడా పొందుపరుస్తుంది. ఈవెంట్ మేనేజ్‌మెంట్‌లో భాగంగా ఇన్‌బాక్స్‌లో వచ్చిన ఆర్‌ఎస్‌వీపీ వివరాలు, అతిథుల ఆహార అభిరుచులను సేకరించి, ఈవెంట్ నిర్వాహకులకు ఉపయోగపడే విధంగా సమగ్ర పట్టికలను రూపొందిస్తుంది. ఆర్థిక నిర్వహణలో భాగంగా ప్రతి నెల జీమెయిల్‌లోని ఇన్‌వాయిస్‌లను పరిశీలించి, సబ్‌స్క్రిప్షన్ ధరలు పెరిగాయా, ఉచిత ట్రయల్‌లు ముగియనున్నాయా అనే విషయాలను గుర్తిస్తుంది. అవసరమైతే సబ్‌స్క్రిప్షన్ రద్దు కోసం ముందుగానే డ్రాఫ్ట్ ఈ-మెయిల్‌ను సిద్ధం చేసి వినియోగదారుడి పరిశీలనకు అందిస్తుంది.

క‌మ్యూనికేష‌న్ విభాగంలో..

కమ్యూనికేషన్ విభాగంలో ఇన్‌బాక్స్‌లో వచ్చే ప్రశ్నలను విశ్లేషించి, వాటికి తగిన సమాధానాల డ్రాఫ్ట్‌లను రూపొందిస్తుంది. అంతేకాకుండా వినియోగదారు గతంలో రాసిన నమూనాలను విశ్లేషించి, అదే రచనా శైలిలో భవిష్యత్తు డ్రాఫ్ట్‌లను రూపొందించేలా కస్టమ్ రైటింగ్ స్టైల్ ప్రొఫైల్‌ను కూడా సృష్టిస్తుంది. జెమిని స్పార్క్ ఆవిష్కరణతో గూగుల్ ఏఐ వినియోగంలో మరో కీలక దశలో అడుగుపెట్టింది. ఇప్పటివరకు సమాచారం అందించే సహాయకారులుగా ఉన్న ఏఐ వ్యవస్థలు, ఇకపై వినియోగదారుల ఆదేశాల మేరకు పునరావృతమయ్యే డిజిటల్ పనులను ఆటోమేటిగ్గా నిర్వహించే ఆపరేషనల్ ఏజెంట్‌లుగా మారుతున్నాయని ఈ పరిణామం సూచిస్తోంది.