Google Find Hub | ఆండ్రాయిడ్ ఫోన్ పోయిందా.. గూగుల్ ఫైండ్ హ‌బ్ ద్వారా ఇలా క‌నిపెట్టొచ్చు..

Google Find Hub | ఆండ్రాయిడ్ ఫోన్ పోయినప్పుడు, ముఖ్యంగా అందులో ఫోటోలు, మెసేజ్‌లు, వ్యక్తిగత సమాచారం ఉన్నప్పుడు అది చాలా ఆందోళన కలిగిస్తుంది. అయితే గూగుల్ అందిస్తున్న ఫైండ్ హ‌బ్ (అంత‌కు ముందు పేరు ఫైండ్ మై డివైస్) ద్వారా యూజ‌ర్‌ ఫోన్‌ను సులభంగా ట్రాక్ చేయడం, లాక్ చేయడం లేదా డేటాను రిమోట్‌గా డిలీట్ చేయడం సాధ్యమవుతుంది. ఫోన్ ఇంట్లో పోయినా, లేక దొంగిలించబడిందని అనుమానం ఉన్నా, ఈ టూల్‌ను ఏ బ్రౌజర్ నుంచైనా లేదా మరో ఆండ్రాయిడ్ డివైస్ నుంచైనా ఉపయోగించవచ్చు. ముందుగా ఫోన్ సరిగ్గా సెటప్ చేసి ఉంటే, యూజ‌ర్‌ డేటాను రక్షించడానికి లేదా డివైస్‌ను తిరిగి పొందడానికి వెంటనే చర్యలు తీసుకోవచ్చు.

రిమోట్‌గా ఫోన్ లాక్ ఇలా..

ముందుగా ఏదైనా బ్రౌజర్‌లో android.com/find వెబ్‌సైట్‌ను ఓపెన్ చేయాలి. లేదా మరో ఆండ్రాయిడ్ ఫోన్‌లో Find Hub యాప్‌ను ఓపెన్ చేయాలి. తరువాత పోయిన ఫోన్‌కు కనెక్ట్ అయిన గూగుల్ అకౌంట్‌తో లాగిన్ అవ్వాలి. స్క్రీన్‌పై కనిపించే లిస్ట్‌లో డివైస్‌ను ఎంచుకోవాలి. డివైస్‌ను సెలెక్ట్ చేసిన వెంటనే ఫైండ్ హబ్ మ్యాప్‌లో ఫోన్ ప్రస్తుత లేదా చివరిగా తెలిసిన లొకేషన్‌ను చూపిస్తుంది. ఫోన్ దగ్గరలోనే ఉంటే Play Sound ఆప్షన్‌ను క్లిక్ చేస్తే, సైలెంట్‌లో ఉన్నా కూడా ఫోన్ ఫుల్ వాల్యూమ్‌లో మోగుతుంది. కొన్ని డివైస్‌లలో Find Nearby ఫీచర్ ద్వారా బ్లూటూత్ లేదా UWB ఉపయోగించి మరింత క‌చ్చితంగా లొకేష‌న్‌ను గుర్తించవచ్చు.

ఫైండ్ హబ్‌లోకి వెళ్లి పోయిన డివైస్‌ను ఎంచుకోవాలి. తరువాత Secure Device లేదా Lock ఆప్షన్‌ను సెలెక్ట్ చేయాలి. ఆ తరువాత కొత్త PIN, పాస్‌వర్డ్ లేదా ప్యాటర్న్‌ను సెట్ చేయాలి. తద్వారా అనధికారిక యాక్సెస్‌ను అడ్డుకోవచ్చు. అదనంగా లాక్ స్క్రీన్‌పై కనిపించేలా మెసేజ్ లేదా కాంటాక్ట్ నంబర్‌ను కూడా ఇవ్వవచ్చు. లాక్ చేసిన వెంటనే ఫోన్ సెక్యూర్ అవుతుంది, గూగుల్ అకౌంట్ నుంచి సైన్ అవుట్ అవుతుంది.

డేటాను ఇలా డిలీట్ చేయ‌వ‌చ్చు..

ముందుగా ఫైండ్ హబ్‌ను ఓపెన్ చేసి గూగుల్ అకౌంట్‌తో సైన్ ఇన్ అవ్వాలి. తరువాత డిలీట్ చేయాలనుకున్న డివైస్‌ను ఎంచుకుని Erase Device ఆప్షన్‌పై క్లిక్ చేయాలి. యూజ‌ర్‌ నిర్ణయాన్ని కన్ఫర్మ్ చేసిన తరువాత ఫ్యాక్టరీ రీసెట్ ప్రక్రియ ప్రారంభమవుతుంది. ఇది పూర్తయ్యాక ఫోన్‌లోని మొత్తం డేటా శాశ్వతంగా తొలగిపోతుంది. డేటా డిలీట్ అయిన తర్వాత ఆ డివైస్ ఫైండ్ హబ్‌లో కనిపించదు, మళ్లీ ఉపయోగించాలంటే గూగుల్ అకౌంట్ అవసరం ఉంటుంది. ఈ ఫీచర్ పనిచేయాలంటే ఆండ్రాయిడ్ ఫోన్ ఆన్‌లో ఉండాలి, అలాగే వై-ఫై లేదా మొబైల్ డేటాతో కనెక్ట్ అయి ఉండాలి. గూగుల్ అకౌంట్ లాగిన్ అయి ఉండాలి. అలాగే ఫైండ్ హబ్, లొకేషన్ సర్వీసులు ముందుగానే ఆన్ చేసి ఉండాలి. గూగుల్ ప్లేలో డివైస్ కనిపించేలా సెట్టింగ్స్ ఉండాలి.

ఫోన్ ఆఫ్‌లైన్‌లో ఉంటే..

ఫోన్ ఆఫ్‌లైన్‌లో ఉన్నా కూడా పూర్తిగా అవకాశాలు కోల్పోవాల్సిన అవ‌స‌రం లేదు. ఫైండ్ హబ్ చివరిసారి తెలిసిన లొకేషన్‌ను చూపిస్తుంది. కొన్ని సందర్భాల్లో సమీపంలోని ఇతర ఆండ్రాయిడ్ డివైస్‌ల సహాయంతో కూడా ఫోన్ లొకేషన్‌ను గుర్తించవ‌చ్చు, అయితే ఈ ఫీచర్లు ముందుగా ఎనేబుల్ చేసి ఉండాలి. ఇక ఫోన్ ఆఫ్‌లైన్‌లో ఉన్న‌ప్పుడు దాని లొకేష‌న్ ను గుర్తిస్తే నెట్ వ‌ర్క్ స‌హాయంతో ట్రాక్ చేసే వీలుంటుంది. కానీ డేటా డిలీట్ చేసిన తర్వాత డివైస్‌ను ట్రాక్ చేయ‌లేరు. ఇక ఫైండ్ హబ్‌ను మాన్యువల్‌గా ఇన్‌స్టాల్ చేయాల్సిన అవ‌స‌రం లేదు. గూగుల్ అకౌంట్ యాడ్ చేసినప్పుడు ఇది ఆటోమేటిక్‌గా ఎనేబుల్ అవుతుంది.