ChatGPT | ఏఐ ప్లాట్‌ఫామ్‌ల‌లో వీటిని అడిగితే.. క‌ట‌క‌టాల్లోకే..

ChatGPT | టెక్నాలజీ యుగంలో చిన్న విషయాల నుంచి పెద్ద సమస్యల వరకు దాదాపు ప్రతిదానికీ చాలా మంది టెక్నాలజీపైనే ఆధారపడుతున్నారు. అందుకే చాట్‌జీపీటీ, జెమిని వంటి కృత్రిమ మేధస్సు సాధనాలు ప్రజల్లో విపరీతమైన ఆదరణ పొందుతున్నాయి. ప్ర‌జ‌ల‌కు వచ్చే ఎలాంటి సందేహాలు, ప్రశ్నలకైనా వీటిని ఆశ్ర‌యిస్తున్నారు. అడిగిన వెంటనే సమాధానాలు లభిస్తుండటంతో వీటిని ఉపయోగించే వారి సంఖ్య రోజురోజుకూ పెరుగుతోంది. ముఖ్యంగా భారతీయులు తమకు ఎదురయ్యే అనేక సమస్యలకు పరిష్కారం కోసం చాట్‌జీపీటీ వంటి ఏఐ సాధనాలను ఆశ్రయిస్తున్నట్లు నిపుణులు చెబుతున్నారు. అయితే ఈ ఏఐ సేవలను అందించే సంస్థలు భారత్‌లో ఉచితంగా సేవలు అందిస్తుండగా, అమెరికా వంటి కొన్ని దేశాల్లో మాత్రం డబ్బులు వసూలు చేస్తున్నాయి. ఉచితంగా సేవలు అందించడం వెనుక వినియోగదారుల డేటాను సేకరించే ఉద్దేశం ఉందనే వాదనలు కూడా బలంగా వినిపిస్తున్నాయి. ఉచితంగా లభిస్తే భారతీయులు ఈ సేవలను మరింత ఎక్కువగా ఉపయోగిస్తారనే విషయాన్ని ఆయా సంస్థలు గుర్తించాయని, అందుకే ఏఐని సున్నితమైన డేటా సేకరణకు కూడా ఉపయోగించే అవకాశం ఉందని టెక్‌ నిపుణులు చెబుతున్నారు.

ఏఐకి తేడా తెలియ‌దు..

చాట్‌జీపీటీ, జెమిని వంటి ఏఐ చాట్‌బాట్లు ప్ర‌జ‌ల‌కు ఎంతో సమాచారాన్ని అందిస్తున్నప్పటికీ, కొన్ని సందర్భాల్లో అవే సమస్యలకు కారణమయ్యే అవకాశం ఉంది. మనకు తెలియకుండానే చట్టపరమైన ఇబ్బందుల్లో చిక్కుకునే పరిస్థితి కూడా వ‌చ్చే అవ‌కాశాలు ఉంటాయ‌ని పోలీసులు హెచ్చరిస్తున్నారు. ప్రస్తుతం ప్రతి ప్రశ్నకు సమాధానం తెలుసుకోవడానికి చాట్‌జీపీటీని ఆశ్రయించడం సాధారణంగా మారిపోయింది. కొందరు తమ వ్యక్తిగత విషయాలను స్నేహితుడితో మాట్లాడినట్లుగా ఏఐతో పంచుకుంటున్నారు. మరికొందరు తమ ప్రేమ వ్యవహారాలు, వ్యక్తిగత జీవితానికి సంబంధించిన విషయాలను కూడా ఏఐ చాట్‌బాట్లలో చర్చిస్తున్నారు. అయితే సరదాగా అడిగిన ప్రశ్న అయినా, నిజంగా ఏదైనా నేరానికి సంబంధించిన సమాచారం తెలుసుకోవాలనే ఉద్దేశంతో అడిగిన ప్రశ్న అయినా ఏఐకి ఆ తేడా ఎప్పుడూ స్పష్టంగా తెలియదు.

ఈ సంభాష‌ణ‌లు వ‌ద్దు..

తమతో తాము మాత్రమే చాట్‌ చేస్తున్నామని, ఈ సంభాషణలను మరెవరూ చూడలేరని చాలామంది భావిస్తుంటారు. కానీ ఏఐ చాట్‌బాట్లలో అడిగే ప్రశ్నల విషయంలో జాగ్రత్తగా ఉండాలని నిపుణులు సూచిస్తున్నారు. ముఖ్యంగా అనుమానాస్పదమైన ప్రశ్నలను పదేపదే అడిగితే వాటి ఆధారంగా భద్రతా వ్యవస్థలు అప్రమత్తమయ్యే అవకాశం ఉందని, కొన్ని సందర్భాల్లో పోలీసుల దృష్టికి కూడా విషయం వెళ్లే అవకాశం ఉంటుందని హెచ్చరిస్తున్నారు. అందువల్ల నేరాలకు సంబంధించిన అనుమానాస్పద ప్రశ్నలను ఏఐ చాట్‌బాట్లలో అడగకూడ‌దు. ఇప్పటికే కొన్ని నేర కేసుల్లో నిందితులు తమకు వచ్చిన సందేహాలను చాట్‌జీపీటీ వంటి ఏఐ సాధనాల్లో అడిగిన విషయాలు వెలుగులోకి వచ్చినట్లు కథనాలు పేర్కొంటున్నాయి. ఈ నేపథ్యంలో ఏఐ సాధనాలను ఉపయోగించేటప్పుడు మరింత అప్రమత్తంగా ఉండాలని సూచిస్తున్నారు. చిన్న అనుమానాస్పద ప్రశ్న కూడా కొన్ని సందర్భాల్లో అనవసరమైన సమస్యలకు దారితీసే అవకాశం ఉన్నందున, ఏఐ చాట్‌బాట్లను జాగ్రత్తగా ఉపయోగించాలని పోలీసులు హెచ్చరిస్తున్నారు.

వ్య‌క్తిగ‌త స‌మాచారం కూడా షేర్ చేయొద్దు..

అదేవిధంగా ఏఐ ప్లాట్‌ఫామ్‌లలో వ్యక్తిగత సమాచారాన్ని పంచుకోవద్దని నిపుణులు సూచిస్తున్నారు. వినియోగదారులు అందించే డేటాను కొన్ని సందర్భాల్లో ఏఐ నమూనాల శిక్షణకు ఉపయోగించే అవకాశం ఉంటుంది. కాబట్టి బ్యాంకు ఖాతా వివరాలు, ఆర్థిక సమాచారం, పాస్‌వర్డ్‌లు, వ్యక్తిగత గుర్తింపు వివరాలు లేదా సంస్థలకు సంబంధించిన గోప్యమైన సమాచారాన్ని చాట్‌జీపీటీ వంటి ఏఐ సంభాషణల్లో నమోదు చేయకపోవడం మంచిది. అలాగే ఏఐ అందించే ప్రతి సమాధానం వంద శాతం కచ్చితమైనదని భావించకూడదు. కొన్నిసార్లు తప్పు లేదా కల్పిత సమాచారాన్ని కూడా నిజమైన సమాచారంగా ఏఐ చూపించే అవకాశం ఉంటుంది. అందువల్ల వైద్య చికిత్స, న్యాయ సలహాలు, ఆర్థిక పెట్టుబడులు వంటి కీలకమైన విషయాల్లో ఏఐపై పూర్తిగా ఆధారపడకుండా, సంబంధిత నిపుణుల సలహా తీసుకోవడం అవసరం.