Apple | ఐక్లౌడ్ సేవ‌ల‌ను విస్త‌రించిన యాపిల్‌.. నెల‌కు రూ.75కే ప్లాన్‌, 50జీబీ స్టోరేజ్‌..

Apple | టెక్ దిగ్గ‌జ సంస్థ యాపిల్ త‌న ఐక్లౌడ్ సేవ‌ల‌ను భార‌త్‌లో మ‌రింత విస్త‌రిస్తున్న‌ట్లు ఒక ప్ర‌క‌ట‌న‌లో తెలిపింది. అందులో భాగంగానే ఐక్లౌడ్ ప్ల‌స్ సేవ‌ల‌ను ప్రారంభించిన‌ట్లు తెలియ‌జేసింది. త‌క్కువ రుసుముకే ఈ ప్లాన్ల‌ను అందిస్తున్న‌ట్లు వివ‌రించింది. దేశంలోని యాపిల్ వినియోగ‌దారుల‌కు ఈ కొత్త సేవ‌లు, సబ్‌స్క్రిప్షన్‌ విధానం మంగ‌ళ‌వారం నుంచి ద‌శ‌ల‌వారీగా అందుబాటులోకి వ‌స్తున్న‌ట్లు తెలిపింది. భార‌త్‌లో ఐక్లౌడ్ ప్ల‌స్ సబ్‌స్క్రైబర్లకు యాపిల్ టీవీ స‌ర్వీస్‌ను సైతం ఆ సంస్థ అందిస్తోంది. ఇందులో డ్రామా, కామెడీ సిరీస్‌, సినిమాలు, డాక్యుమెంట‌రీలు, పిల్ల‌లు, కుటుంబ వినోద కార్య‌క్ర‌మాలు ఉంటాయి. ప్ర‌తి వారం కొత్త కంటెంట్‌ను కూడా విడుద‌ల చేస్తారు.

అనేక సిరీస్‌లు, సినిమాలు..

యాపిల్‌ టీవీలో బహుళ ఎమ్మీ అవార్డులు గెలుచుకున్న కామెడీ సిరీస్‌లు ది స్టూడియో, టెడ్‌ లాసోతోపాటు సెవెరెన్స్‌, యాపిల్‌ అత్యధికంగా వీక్షించిన డ్రామాగా పేర్కొంటున్న ప్లూరిబస్‌, అకాడమీ అవార్డు బెస్ట్‌ పిక్చర్‌ గెలుచుకున్న కోడా, అకాడమీ అవార్డు గెలుచుకున్న ఎఫ్‌1 వంటి కంటెంట్‌ అందుబాటులో ఉంటుంది. ఎఫ్‌1 చిత్రం అత్యధిక వసూళ్లు సాధించిన స్పోర్ట్స్‌ ఫీచర్‌గా నిలిచిందని యాపిల్‌ పేర్కొంది. ప్రపంచవ్యాప్తంగా 2019 నవంబర్‌ 1న ప్రారంభమైనప్పటి నుంచి యాపిల్‌ ఒరిజినల్‌ సినిమాలు, డాక్యుమెంటరీలు, సిరీస్‌లు 900కు పైగా అవార్డులు గెలుచుకున్నాయి. అలాగే 3,800కు పైగా అవార్డు నామినేషన్లు దక్కించుకున్నాయి. ఐఫోన్‌, ఐప్యాడ్‌, యాపిల్‌ టీవీ 4కె, మ్యాక్‌, ప్రముఖ స్మార్ట్‌ టీవీలు, గేమింగ్‌ కన్సోల్స్‌, టీవీ డాట్‌ యాపిల్‌ డాట్‌ కామ్‌ సహా ప్రపంచవ్యాప్తంగా 100 కోట్లకు పైగా స్క్రీన్లలో యాపిల్‌ టీవీ యాప్‌ అందుబాటులో ఉంది.

యాపిల్‌ ఆర్కేడ్ ఉచితం..

ఐక్లౌడ్ ప్ల‌స్ సబ్‌స్క్రైబర్లకు యాపిల్‌ ఆర్కేడ్‌కు కూడా అపరిమిత యాక్సెస్‌ లభించనుంది. యాపిల్‌ ఆర్కేడ్‌లో 200కు పైగా గేమ్స్‌ అందుబాటులో ఉన్నాయి. ఫుట్‌బాల్‌ మేనేజర్‌ 26 టచ్‌, ఎన్‌బీఏ 2కె26 ఆర్కేడ్‌ ఎడిషన్‌, మ్యాడెన్‌ ఎన్‌ఎఫ్‌ఎల్‌ 27 ఆర్కేడ్‌ ఎడిషన్‌, హలో కిట్టీ ఐలాండ్‌ అడ్వెంచర్‌, స్నీకీ సాస్క్వాచ్‌, యాంగ్రీ బర్డ్స్‌ రీలోడెడ్‌, కుకింగ్‌ మామా: క్యూజిన్‌!, బ్లాక్‌ బ్లాస్ట్ ప్ల‌స్‌, సబ్‌వే సర్ఫర్స్ ప్ల‌స్‌, అల్టిమేట్‌ 8 బాల్‌ పూల్ ప్ల‌స్ వంటి గేమ్స్‌ ఇందులో ఉన్నాయి. యాపిల్‌ ఆర్కేడ్‌ గేమ్స్‌లో ప్రకటనలు లేదా యాప్‌లో కొనుగోళ్లు ఉండవు. ఆఫ్‌లైన్‌లోనూ గేమ్స్‌ ఆడుకోవచ్చు. ఈ సేవ యాపిల్‌ వినియోగదారుల గోప్యతా ప్రమాణాలను కూడా అనుసరిస్తుంది. ఐఫోన్‌, ఐప్యాడ్‌, మ్యాక్‌, యాపిల్‌ టీవీ 4కె పరికరాల్లో గేమ్స్‌ ఆడుకోవచ్చు. యాప్‌ స్టోర్‌లోని ఆర్కేడ్‌ ట్యాబ్‌, యాపిల్‌ గేమ్స్‌ యాప్‌ ద్వారా గేమ్స్‌ క్యాటలాగ్‌ను బ్రౌజ్‌ చేయవచ్చు.

మ్యూజిక్‌ సెలెక్ట్ కూడా..

ఇక ఐక్లౌడ్ ప్ల‌స్ సబ్‌స్క్రైబర్లకు యాపిల్‌ మ్యూజిక్‌ సెలెక్ట్‌ కూడా లభించనుంది. యాపిల్‌ మ్యూజిక్‌ రూపొందించే ప్రకటనలు లేని స్టేషన్ల సమాహారమే ఇది. ఇందులో ప్రాంతీయ సంగీతంతోపాటు టాప్‌ సాంగ్స్‌, 80ఎస్‌, 90ఎస్‌ వంటి స్టేషన్లు ఉంటాయి. యాపిల్‌ మ్యూజిక్‌ యాప్‌లోని హోమ్‌ ట్యాబ్‌ నుంచి వీటిని యాక్సెస్‌ చేయవచ్చు. పూర్తి యాపిల్‌ మ్యూజిక్‌ సబ్‌స్క్రిప్షన్‌ కావాలనుకునే వినియోగదారులు నేరుగా యాపిల్‌ నుంచి సబ్‌స్క్రైబ్‌ చేసుకోవచ్చు. ఇండివిడ్యువల్‌ ప్లాన్‌ ధర నెలకు రూ.115 కాగా, ఫ్యామిలీ ప్లాన్‌ ధర నెలకు రూ.145గా ఉంది. ఫ్యామిలీ షేరింగ్‌ ద్వారా ఐక్లౌడ్ ప్ల‌స్‌ పొందుతున్న వినియోగదారుల విషయంలో ఐక్లౌడ్ ప్ల‌స్ సబ్‌స్క్రిప్షన్‌ కోసం చెల్లించే వ్యక్తికి ఈ నెలవారీ ధర వర్తిస్తుంది. పూర్తి యాపిల్‌ మ్యూజిక్‌ సబ్‌స్క్రిప్షన్‌లో డిమాండ్‌ మేరకు సంగీతాన్ని వినే సౌకర్యం, స్పేషియల్‌ ఆడియో, లిరిక్స్‌ ట్రాన్స్‌లేషన్‌, ఆటోమిక్స్‌, ఎడిటోరియల్‌ ప్లేలిస్టులు, ప్రత్యేక కంటెంట్‌ వంటి ఫీచర్లు ఉంటాయి.

అద‌న‌పు స్టోరేజ్‌, మెరుగైన ప్రైవ‌సీ..

ఐక్లౌడ్ ప్ల‌స్ లో అదనపు స్టోరేజ్‌తోపాటు యాపిల్‌ ఇన్వైట్స్‌లో ఈవెంట్లు సృష్టించే సదుపాయం, మెరుగైన ప్రైవసీ ఫీచర్లు కొనసాగుతాయి. ఐఫోన్‌, ఐప్యాడ్‌, మ్యాక్‌, యాపిల్‌ విజన్ ప్రొలోని సెట్టింగ్స్‌ యాప్‌ ద్వారా వినియోగదారులు తమ సబ్‌స్క్రిప్షన్‌ వివరాలను పరిశీలించి ఐక్లౌడ్‌ ప్లాన్‌ను మార్చుకోవచ్చు. ఫ్యామిలీ షేరింగ్‌ ద్వారా ఐక్లౌడ్ ప్ల‌స్ సబ్‌స్క్రిప్షన్‌ను గరిష్ఠంగా ఐదుగురు కుటుంబ సభ్యులతో పంచుకోవచ్చు. యాపిల్‌ పరికరాల్లోని వ్యక్తిగత కంటెంట్‌ను బ్యాకప్‌ చేయడం, స్టోర్‌ చేయడం, షేర్‌ చేయడం వంటి సదుపాయాలను కూడా ఐక్లౌడ్ ప్ల‌స్ అందిస్తుంది. విస్తరించిన ఐక్లౌడ్ ప్ల‌స్ ప్లాన్‌ ప్రపంచవ్యాప్తంగా 100కు పైగా దేశాలు, ప్రాంతాల్లో సెప్టెంబర్‌ చివరి వరకు దశలవారీగా అందుబాటులోకి రానుంది. భారత్‌తోపాటు సౌదీ అరేబియా, సింగపూర్‌, టర్కీ, యునైటెడ్‌ అరబ్‌ ఎమిరేట్స్‌ వంటి దేశాల్లోనూ ఈ మార్పులు అమల్లోకి వస్తాయి. ఈ విస్తరణతో యాపిల్‌ టీవీ అదనంగా 59 దేశాల్లో అందుబాటులోకి వచ్చి, ప్రపంచవ్యాప్తంగా మొత్తం 170 దేశాలకు చేరుకోనుంది.

నెల‌కు రూ.75కే ప్లాన్‌..

భారత్‌లో ఐక్లౌడ్ ప్ల‌స్ ధరలు నెలకు రూ.75 నుంచి ప్రారంభమవుతాయి. ఇందులో 50 జీబీ స్టోరేజ్‌ లభిస్తుంది. అదనపు స్టోరేజ్‌ కోసం ఇతర టియర్‌లు కూడా అందుబాటులో ఉంటాయి. భారత్‌లో యాపిల్‌ టీవీ, యాపిల్‌ ఆర్కేడ్‌ ఇకపై యాపిల్‌ నుంచి విడిగా సబ్‌స్క్రిప్షన్‌ సేవలుగా అందుబాటులో ఉండవు. ఇప్పటికే వ్యక్తిగతంగా ఈ సేవలకు సబ్‌స్క్రైబ్‌ అయిన వినియోగదారులు ఐక్లౌడ్ ప్ల‌స్ ద్వారా వీటిని కొనసాగించవచ్చు. వారి ప్రస్తుత వ్యక్తిగత సబ్‌స్క్రిప్షన్లు రద్దవుతాయి. అయితే యాపిల్‌ ఆర్కేడ్‌లో గేమ్‌ ప్రోగ్రెస్‌, సేవ్‌ డేటా మాత్రం అలాగే భద్రంగా ఉంటాయి. ఎయిర్‌టెల్‌ వినియోగదారులకు కూడా ప్రత్యేక ప్రయోజనాలు లభించనున్నాయి. అర్హత ఉన్న ఎయిర్‌టెల్‌ పోస్ట్‌పెయిడ్‌ ప్లాన్లను ఉపయోగించే ఐఫోన్‌ కస్టమర్లు యాపిల్‌ టీవీ, యాపిల్‌ ఆర్కేడ్‌తో కూడిన ఐక్లౌడ్ ప్ల‌స్ ను యాక్సెస్‌ చేయవచ్చు. ఎంపిక చేసిన ఎయిర్‌టెల్‌ పోస్ట్‌పెయిడ్‌ ప్లాన్ల ద్వారా ఇప్పటికే యాపిల్‌ టీవీకి సబ్‌స్క్రైబ్‌ అయిన కస్టమర్లు ఎలాంటి అదనపు ఖర్చు లేకుండా యాపిల్‌ టీవీ, యాపిల్‌ ఆర్కేడ్‌తో కూడిన ఐక్లౌడ్ ప్ల‌స్ కు మారవచ్చు. భారత్‌లో కొత్త వినియోగదారుల కోసం యాపిల్‌ వన్‌ ఇకపై అందుబాటులో ఉండదు. అయితే ఇప్పటికే యాపిల్‌ వన్‌ సబ్‌స్క్రిప్షన్‌ ఉన్నవారు తమ ప్రస్తుత సబ్‌స్క్రిప్షన్‌ ప్రయోజనాలను కొనసాగించవచ్చు. నిర్దిష్ట ఐక్లౌడ్ ప్ల‌స్ ఫీచర్లు, యాపిల్‌ టీవీ కంటెంట్‌, యాపిల్‌ ఆర్కేడ్‌ గేమ్స్‌ దేశం, ప్రాంతం లేదా ఉపయోగిస్తున్న పరికరాన్ని బట్టి మారే అవకాశం ఉందని యాపిల్‌ స్పష్టం చేసింది.