France vs Paraguay | ఫ్రాన్స్‌ను వణికించిన పరాగ్వే.. ఎంబాపే మ్యాజిక్

• ఉత్కంఠ పోరులో ఫ్రాన్స్ జయభేరి
• పరాగ్వే అద్భుత ప్రయాణానికి బ్రేక్ వేసిన ఎంబాపే
• ఫిఫా వరల్డ్ కప్ 2026 రౌండ్-16లో పరాగ్వేపై 1-0 తేడాతో ఫ్రాన్స్ సంచలన విజయం
• మ్యాచ్ 70వ నిమిషంలో పెనాల్టీ కిక్ ద్వారా ఫ్రాన్స్ కెప్టెన్ ఎంబాపే ఏకైక గోల్
• ఆద్యంతం అద్భుతమైన డిఫెన్స్‌తో ఫ్రాన్స్‌కు ముచ్చెమటలు పట్టించిన పరాగ్వే
• జూలై 9న జరగనున్న క్వార్టర్ ఫైనల్స్‌లో మొరాకోతో తలపడనున్న ఫ్రాన్స్

త్రినేత్ర.న్యూస్ : ఫిలడెల్ఫియా స్టేడియం వేదికగా జరిగిన ఫిఫా వరల్డ్ కప్ 2026 రౌండ్-16 మ్యాచ్ ఫుట్‌బాల్ అభిమానులను మునివేళ్లపై నిలబెట్టింది. దాదాపు 38 డిగ్రీల భగభగమండే ఎండలో జరిగిన ఈ ఫిజికల్ అండ్ ఇంటెన్స్ మ్యాచ్‌లో పరాగ్వేపై 1-0 తేడాతో ఫ్రాన్స్ అతికష్టం మీద విజయం సాధించింది. వరుసగా నాలుగోసారి క్వార్టర్ ఫైనల్స్‌కు దూసుకెళ్లింది.

గోడలా నిలబడ్డ పరాగ్వే డిఫెన్స్

టోర్నీలో ఫేవరెట్‌గా బరిలోకి దిగిన ఫ్రాన్స్‌కు పరాగ్వే ఆటగాళ్లు చుక్కలు చూపించారు. డిఫెన్స్‌లో పకడ్బందీ వ్యూహంతో ముందుకు వెళ్లిన పరాగ్వే.. ఫస్ట్ హాఫ్‌లో ఫ్రాన్స్ దాడులను సమర్థవంతంగా తిప్పికొట్టింది. బాల్ పొసెషన్ ఎక్కువగా ఫ్రాన్స్ చేతిలోనే ఉన్నప్పటికీ గోల్ చేసే అవకాశాన్ని మాత్రం పరాగ్వే డిఫెండర్లు, గోల్ కీపర్ ఓర్లాండో గిల్ ఇవ్వలేదు. దీంతో ఫస్ట్ హాఫ్ 0-0 తో ముగిసింది.

మ్యాచ్‌ను మలుపు తిప్పిన ఆ VAR రివ్యూ

సెకండ్ హాఫ్‌లోనూ అదే సీన్ రిపీట్ అవుతున్న తరుణంలో, 69వ నిమిషంలో మ్యాచ్ కీలక మలుపు తిరిగింది. ఫ్రాన్స్ సబ్‌స్టిట్యూట్ ఆటగాడు డిజైర్ డ్యూయెను పరాగ్వే ప్లేయర్ డియెగో గోమెజ్ బాక్స్‌లో కిందపడేయడంతో రిఫరీ VAR (వార్) రివ్యూ కోరాడు. రివ్యూలో ఫౌల్ అని తేలడంతో ఫ్రాన్స్‌కు పెనాల్టీ లభించింది. 70వ నిమిషంలో కెప్టెన్ కిలియన్ ఎంబాపే కూల్‌గా గోల్ చేసి ఫ్రాన్స్‌కు 1-0 ఆధిక్యాన్ని అందించాడు.

ఎంబాపే రికార్డుల మోత

ఈ మ్యాచ్‌లో చేసిన పెనాల్టీ గోల్‌తో కిలియన్ ఎంబాపే ఈ 2026 టోర్నమెంట్‌లో తన గోల్స్ సంఖ్యను 7కు పెంచుకున్నాడు. దీంతో గోల్డెన్ బూట్ రేసులో అర్జెంటీనా స్టార్ లియోనెల్ మెస్సీతో సమానంగా టాప్‌లో నిలిచాడు. అంతేకాకుండా, వరల్డ్ కప్ కెరీర్‌లో ఇది ఎంబాపేకు 19వ గోల్ కావడం విశేషం.

నెక్స్ట్ ఏంటి?

ఫ్రాన్స్: ఈ విజయంతో క్వార్టర్స్‌కు చేరిన ఫ్రాన్స్, గురువారం (జూలై 9, 2026) న ఫాక్స్‌బోరోలోని జిల్లెట్ స్టేడియంలో జరిగే మ్యాచ్‌లో మొరాకోతో తలపడనుంది.

పరాగ్వే: టోర్నీ నుంచి నిష్క్రమించినప్పటికీ పరాగ్వే ప్రయాణం చిరస్మరణీయం. రౌండ్-32లో జర్మనీ లాంటి పటిష్టమైన జట్టును ఓడించి చరిత్ర సృష్టించిన గర్వంతో.. ఫ్యాన్స్ గుండెల్లో చెరగని ముద్ర వేసి ఆ జట్టు స్వదేశానికి పయనం కానుంది.