IND Vs NZ T20 | చివరి టీ20కి టీమిండియా సన్నద్ధం.. తుది జ‌ట్టులో భారీ మార్పులు..!

IND Vs NZ T20 | న్యూజిలాండ్‌తో టీ20 సిరీస్‌ను ఘనంగా ముగించాలని టీమిండియా పట్టుదలతో ఉన్న‌ది. ఐదు మ్యాచుల సిరీస్‌లో ఇప్పటికే 3-1తో పైచేయి సాధించినప్పటికీ.. ఆక్లాండ్‌ వేదికగా జరిగిన నాలుగో టీ20లో 87 పరుగుల తేడాతో ఓటమి పాలవడం భారత శిబిరంలో చర్చనీయాంశంగా మారింది. ఈ నేపథ్యంలో ఆదివారం హామిల్టన్‌లో జరగనున్న ఆఖరి టీ20లో ప్రయోగాలకు టీమ్‌ మేనేజ్‌మెంట్‌ సిద్ధమవుతుందా? ముఖ్యంగా యువ సంచలనం వైభవ్‌ సూర్యవంశీకి తుది జట్టులో చోటు దక్కుతుందా? అన్నది ఆసక్తిని రేకెత్తిస్తోంది.

సంజూపై వేటు తప్పదా?

సిరీస్‌ ఆరంభంలో 67 పరుగులతో ఆకట్టుకున్న సంజూ శాంసన్‌ ఆ తర్వాత బ్యాటింగ్‌లో తడబడుతున్నాడు. వరుసగా 14, 18, 4 పరుగులే సాధించడంతో అతడి స్థానంపై ప్రశ్నలు తలెత్తుతున్నాయి. దీంతో చివరి మ్యాచ్‌లో సంజూను పక్కన పెట్టి వైభవ్‌ సూర్యవంశీకి అవకాశం కల్పించవచ్చనే ప్రచారం జరుగుతోంది. మరోవైపు కెప్టెన్‌ శ్రేయస్‌ అయ్యర్‌ కూడా ఆశించిన స్థాయిలో రాణించడం లేదు. వెస్టిండీస్‌తో లక్నోలో తొలి టీ20 శతకం నమోదు చేసిన అనంతరం గత ఎనిమిది ఇన్నింగ్స్‌ల్లో 40, 1, 16, 22, 42, 7, 5, 22 పరుగులే చేశాడు. సిరీస్‌ ముగింపు పోరులోనైనా భారీ స్కోరు సాధించి ఫామ్‌ అందుకోవాలని చూస్తున్నాడు.

స్పిన్‌ విభాగంలో మార్పులుంటాయా?

లోయర్‌ ఆర్డర్‌లో నమన్‌ ధీర్‌, నితీశ్‌ కుమార్‌ రెడ్డి బ్యాట్‌తో ఫర్వాలేదనిపిస్తున్నా.. బౌలింగ్‌లో మాత్రం ఆశించిన ప్రభావం చూపలేకపోతున్నారు. దీంతో స్పిన్‌ విభాగాన్ని బలోపేతం చేసే దిశగా భారత్‌ ఆలోచిస్తున్నట్లు తెలుస్తోంది. కుల్దీప్‌ యాదవ్‌, వరుణ్‌ చక్రవర్తిలలో ఒకరికి తుది జట్టులో అవకాశం దక్కవచ్చని స్పిన్‌ బౌలింగ్‌ కోచ్‌ సాయిరాజ్‌ బహుతులే వ్యాఖ్యలు సూచిస్తున్నాయి. అదనపు స్పిన్నర్‌ను తీసుకోవాలంటే నమన్‌ ధీర్‌పై వేటు వేయాల్సి రావచ్చు. అదే జరిగితే జట్టులో బ్యాటింగ్‌ లోతు తగ్గడంతో పాటు అతడి నుంచి లభిస్తున్న పార్ట్‌టైమ్‌ ఆఫ్‌స్పిన్‌ సేవలను కూడా కోల్పోవాల్సి వస్తుంది. దీంతో తుది జట్టు ఎంపిక టీమ్‌ మేనేజ్‌మెంట్‌కు సవాల్‌గా మారింది.

ఫిలిప్స్‌ భీకర ఫామ్‌..

మరోవైపు ఆతిథ్య న్యూజిలాండ్‌ గ్లెన్‌ ఫిలిప్స్‌పై భారీ ఆశలు పెట్టుకుంది. నాలుగో టీ20లో అద్భుత శతకంతో భారత బౌలర్లకు చుక్కలు చూపించిన ఫిలిప్స్‌.. ఇప్పటివరకు నాలుగు మ్యాచ్‌ల్లో 276 పరుగులు సాధించాడు. ఐదు మ్యాచ్‌ల ద్వైపాక్షిక టీ20 సిరీస్‌లో కివీస్‌ తరఫున అత్యధిక పరుగులు చేసిన ఆటగాళ్ల జాబితాలో మార్క్‌ చాప్‌మన్‌ (290) తర్వాతి స్థానంలో నిలిచాడు. మరోవైపు ఆక్లాండ్‌ మ్యాచ్‌లో అర్ధశతకంతో మెరిసిన మైకేల్‌ బ్రేస్‌వెల్‌ కూడా మంచి టచ్‌లో ఉన్నాడు. వీరిద్దరిని కట్టడి చేయడం భారత బౌలర్లకు కీలకం కానుంది.

స్పిన్నర్ల పోరుపైనే అందరి దృష్టి

హామిల్టన్‌లో ఇరు జట్ల స్పిన్నర్ల ప్రదర్శన మ్యాచ్‌ గమనాన్ని మార్చే అవకాశముంది. కివీస్‌ సారథి మిచెల్‌ శాంట్నర్‌ ఈ సిరీస్‌లో నిలకడగా బౌలింగ్‌ చేస్తుండగా.. భారత స్పిన్నర్‌ అక్షర్‌ పటేల్‌ కూడా తనదైన శైలిలో బంతులను సంధిస్తున్నాడు. శాంట్నర్‌ తన బౌలింగ్‌లో 55 శాతం బంతులను ఫుల్‌ లెంగ్త్‌లో వేయగా.. అక్షర్‌ 72 శాతం బంతులను షార్ట్‌ లెంగ్త్‌లో సంధించాడు. చిన్న బౌండరీలు కలిగిన సెడ్డన్‌ పార్క్‌లో స్పిన్నర్ల లెంగ్త్‌, బౌలింగ్‌ వ్యూహాలు కీలకం కానున్నాయి. ముఖ్యంగా ఎడమచేతి వాటం స్పిన్నర్ల ప్రదర్శనపై ఆసక్తి నెలకొంది.