Windfall Tax | పెట్రోల్‌ ఎగుమతులపై జీరో సుంకం.. డీజిల్‌, ఏటీఎఫ్‌పై పెంపు

Windfall Tax | పశ్చిమాసియాలో యుద్ధం.. అంతర్జాతీయంగా చమురు సరఫరాలో అనిశ్చితి నేపథ్యంలో కేంద్ర ప్రభుత్వం కీలక నిర్ణయం తీసుకుంది. పెట్రోల్‌ ఎగుమతులపై ప్రత్యేక అదనపు ఎక్సైజ్‌ సుంకాన్ని (SAED) పూర్తిగా రద్దు చేసింది. అదే సమయంలో డీజిల్‌, విమాన ఇంధనం (ఏటీఎఫ్‌) ఎగుమతులపై సుంకాలను పెంచింది. ఈ మేరకు కేంద్ర ఆర్థిక శాఖ శనివారం ఉత్తర్వులు జారీ చేసింది. సవరించిన సుంకాలు తక్షణమే అమల్లోకి వచ్చాయి.

సవరించిన సుంకాలు ఇలా..

పెట్రోల్‌ ఎగుమతులపై లీటరుకు రూ.2.50గా ఉన్న సుంకాన్ని కేంద్రం పూర్తిగా ఎత్తివేసింది. డీజిల్‌పై రూ.8.50గా ఉన్న సుంకాన్ని రూ.11.50కి పెంచింది. ఏటీఎఫ్‌పై రూ.10.50గా ఉన్న సుంకాన్ని రూ.11కి సవరించింది. పశ్చిమాసియాలో ఘర్షణలతో అంతర్జాతీయ ముడిచమురు సరఫరాకు ఆటంకాలు ఏర్పడ్డాయి. ముఖ్యంగా హర్మూజ్‌ జలసంధి మీదుగా జరిగే వాణిజ్య నౌకాయానంపై ప్రభావం పడింది. యుద్ధానికి ముందు భారత్‌ దిగుమతి చేసుకునే ముడిచమురులో దాదాపు 45 శాతం ఈ మార్గం ద్వారానే వచ్చేది. తాజా పరిణామాలతో భారత్‌ ప్రత్యామ్నాయ సరఫరా మార్గాలపై దృష్టి సారించింది. అంతర్జాతీయ మార్కెట్‌లో అధిక ధరలు లభిస్తుండటంతో రిఫైనరీలు దేశీయ అవసరాల కంటే ఎగుమతులకే ప్రాధాన్యమిచ్చే అవకాశం ఉంది. దీన్ని నియంత్రించి దేశీయంగా ఇంధన లభ్యతను కాపాడటమే ఎగుమతి సుంకాల సవరణ వెనుక ప్రధాన ఉద్దేశం. పెట్రోల్‌పై సుంకం రద్దు ఎగుమతిదారులకు ఊరటనివ్వగా.. డీజిల్‌, ఏటీఎఫ్‌పై పెంపు ద్వారా దేశీయ సరఫరాకు ప్రాధాన్యమిచ్చింది.

50శాతం పెరిగిన ఎగుమతి ఆదాయం

అంతర్జాతీయంగా ముడిచమురు ధరలు పెరగడం, రూపాయి బలహీనపడటం వంటి పరిణామాలతో ఏప్రిల్‌-సెప్టెంబర్‌ మధ్య భారత్‌ ఇంధన ఎగుమతుల పరిమాణం తగ్గింది. అయినప్పటికీ ఎగుమతుల ద్వారా వచ్చిన ఆదాయం దాదాపు 50 శాతం పెరిగింది. మరోవైపు అంతర్జాతీయ మార్కెట్‌లో ధరలు పెరిగినా దేశీయంగా పెట్రోల్‌, డీజిల్‌ రిటైల్‌ ధరలను స్థిరంగా కొనసాగిస్తోంది. ప్రపంచ ఇంధన సంక్షోభం ప్రభావం దేశీయ మార్కెట్‌పై పడకుండా సరఫరాలను సమతుల్యం చేసేందుకు కేంద్రం తాజా నిర్ణయం తీసుకున్నట్లు స్పష్టమవుతోంది.