Saroornagar Illegal Egg Donation | భారీ అండాల మాఫియా గుట్టురట్టు: హాస్టల్ కేంద్రంగా పేద యువతులకు వల.. కార్పొరేట్ ఆసుపత్రులకు విక్రయాలు

Saroornagar Illegal Egg Donation | త్రినేత్ర న్యూస్ : భాగ్యనగరంలో మరో దారుణమైన అక్రమ వ్యాపారం వెలుగులోకి వచ్చింది. సంతానలేమితో బాధపడే దంపతుల బలహీనతను ఆసరాగా చేసుకుని, అమాయక యువతుల శరీరాలతో వ్యాపారం చేస్తున్న ఓ ముఠా గుట్టును సరూర్‌నగర్ పోలీసులు రట్టు చేశారు. పేదరికాన్ని ఆసరాగా చేసుకుని ఇతర రాష్ట్రాల యువతులను రప్పించి, వారి నుంచి అండాలు సేకరించి కార్పొరేట్ ఆసుపత్రులకు అమ్ముతున్న సంచలన రాకెట్‌ను బయటపెట్టారు.

ఈ అక్రమ దందాకు సరూర్‌నగర్ వెంకటేశ్వర కాలనీలోని ‘శెట్టి వర్కింగ్ ఉమెన్స్ హాస్టల్’ అడ్డాగా మారినట్లు పోలీసుల ప్రాథమిక విచారణలో తేలింది. ఇతర రాష్ట్రాలకు చెందిన పేద యువతులకు భారీగా డబ్బు ఆశ చూపించి హైదరాబాద్‌కు తీసుకొచ్చేవారు. వారిని ఈ అద్దె హాస్టల్‌లో ఉంచి, నెలనెలా హార్మోన్ల ఇంజెక్షన్లు ఇస్తూ అండాలను సేకరించేవారని సమాచారం.

కార్పొరేట్ ఆసుపత్రులకు లక్షల్లో అమ్మకాలు

సేకరించిన అండాలను నగరంలోని పలు ప్రైవేట్, కార్పొరేట్ ఫెర్టిలిటీ (IVF) కేంద్రాలకు భారీ మొత్తాలకు విక్రయిస్తున్నట్లు విశ్వసనీయ సమాచారం అందింది. వైద్య నిబంధనల ప్రకారం అండాల దానం (Egg Donation) పై కఠినమైన చట్టాలు, వయోపరిమితులు, పరిమితులు ఉంటాయి. అయితే, కాసుల కక్కుర్తితో నిబంధనలను తుంగలో తొక్కి, యువతుల ప్రాణాలతో చెలగాటమాడుతూ పదేపదే వారి నుంచి అండాలు తీస్తున్నట్లు తీవ్ర ఆరోపణలు వెల్లువెత్తాయి.

సూత్రధారి దుర్గాప్రసాద్ అరెస్ట్.. ఆసుపత్రులపై పోలీసుల నజర్

సమాచారం అందుకున్న సరూర్‌నగర్ పోలీసులు రంగంలోకి దిగి హాస్టల్‌పై విచారణ జరిపారు. ఈ వ్యవహారంలో కీలక పాత్ర పోషిస్తున్నట్లు భావిస్తున్న దుర్గాప్రసాద్ అనే వ్యక్తిని అదుపులోకి తీసుకున్నారు.

ఈ రాకెట్ వెనుక ఇంకా ఎవరెవరు ఉన్నారు? ఏయే కార్పొరేట్ ఆసుపత్రులు వీరి నుంచి అండాలు కొనుగోలు చేస్తున్నాయి? ఆసుపత్రులకు చట్టబద్ధమైన అనుమతులు ఉన్నాయా లేదా వైద్యులు కూడా ఇందులో కుమ్మక్కయ్యారా? అనే కోణాల్లో సరూర్‌నగర్ పోలీసులు సమగ్ర దర్యాప్తు ముమ్మరం చేశారు. చట్టవ్యతిరేకంగా సాగుతున్న ఈ అండాల దందాలో మరిన్ని అరెస్టులు జరిగే అవకాశముంది.