Portugal vs DR Congo | పోర్చుగల్‌కు డీఆర్ కాంగో షాక్.. రొనాల్డో దారుణ ఫ్లాప్ షోపై థియరీ హెన్రీ ఫైర్!

ఫిపా వరల్డ్ కప్ 2026లో పోర్చుగల్‌కు ఊహించని షాక్. డీఆర్ కాంగోతో మ్యాచ్ 1-1తో డ్రా. రొనాల్డో పేలవ ప్రదర్శనపై ఫుట్‌బాల్ దిగ్గజం థియరీ హెన్రీ తీవ్ర విమర్శలు.

Jagadeesh

Sports | Published On Jun 18, 2026, 10.34 am IST

Portugal vs DR Congo | పోర్చుగల్‌కు డీఆర్ కాంగో షాక్.. రొనాల్డో దారుణ ఫ్లాప్ షోపై థియరీ హెన్రీ ఫైర్!

సంక్షిప్త సారాంశం

ఫిఫా వరల్డ్ కప్ 2026లో డీఆర్ కాంగోతో జరిగిన తొలి మ్యాచ్‌లో ఫేవరెట్‌గా బరిలోకి దిగిన పోర్చుగల్ 1-1తో డ్రాగా ముగించింది. వరల్డ్ కప్ చరిత్రలో తొలిసారిగా గోల్ సాధించిన డీఆర్ కాంగో.. యోన్ విస్సా అద్భుతమైన హెడర్‌తో చరిత్ర సృష్టించింది. పూర్తిగా నిరాశపరిచిన క్రిస్టియానో రొనాల్డో.. 90 నిమిషాల ఆటలో కనీసం ఒక్క 'షాట్ ఆన్ టార్గెట్' కూడా నమోదు చేయలేకపోయాడు. రొనాల్డో ఆటతీరుపై ఫ్రెంచ్ లెజెండ్ థియరీ హెన్రీ తీవ్ర విమర్శలు చేశాడు.. రొనాల్డో జట్టు కోసం కాకుండా తన గోల్ కోసమే ఆడాడని ఫైర్ అయ్యాడు.

1-1తో డ్రాగా ముగించిన పోర్చుగల్
వరల్డ్ కప్ చరిత్రలో తొలిసారి డీఆర్ కాంగో గోల్
పూర్తిగా నిరాశపరిచిన క్రిస్టియానో రొనాల్డో
షాట్ ఆన్ టార్గెట్ నమోదు చేయలేకపోయిన క్రిస్టియానో
రొనాల్డో ఆటతీరుపై ఫ్రెంచ్ లెజెండ్ హెన్రీ విమర్శలు
జట్టు కోసం కాకుండా గోల్ కోసమే ఆడాడంటూ ఫైర్

Portugal vs DR Congo | త్రినేత్ర.న్యూస్ : 2026 ఫిఫా వరల్డ్ కప్‌లో (FIFA World Cup) అగ్రశ్రేణి జట్టు పోర్చుగల్‌కు ఆరంభంలోనే గట్టి ఎదురుదెబ్బ తగిలింది. టెక్సాస్‌లోని హ్యూస్టన్ స్టేడియంలో జూన్ 17న డీఆర్ కాంగో (DR Congo)తో జరిగిన గ్రూప్-కె తొలి మ్యాచ్ 1-1 తేడాతో అనూహ్యంగా డ్రాగా ముగిసింది. పసికూనగా బరిలోకి దిగిన కాంగో అంచనాలకు మించి రాణించి.. బలమైన పోర్చుగల్‌ను నిలువరించడంలో సక్సెస్ అయింది.

ఆరంభం అదిరినా.. ఆ తర్వాతే తడబాటు

మ్యాచ్ మొదలైన 6వ నిమిషంలోనే పెడ్రో నెటో ఇచ్చిన అద్భుతమైన క్రాస్‌ను.. యువ మిడ్‌ఫీల్డర్ జావో నెవ్స్ అద్భుతమైన హెడర్‌తో గోల్‌గా మలిచాడు. దీంతో పోర్చుగల్ 1-0 ఆధిక్యంలోకి దూసుకెళ్లింది. ఆ తర్వాత 75% పొసెషన్ (Possession) పోర్చుగల్ దగ్గరే ఉన్నా.. కాంగో డిఫెన్స్‌ను ఛేదించి గోల్స్ చేయలేకపోయారు.

Cristiano Ronaldo Struggles as Portugal Draws 1-1 vs DR Congo

మొదటి హాఫ్ ఇంజ్యూరీ టైమ్‌లో (45+5') డీఆర్ కాంగో అనూహ్యంగా కౌంటర్ అటాక్‌కు దిగింది. ఆర్థర్ మసువాకు పెనాల్టీ ఏరియాలోకి ఇచ్చిన క్రాస్‌ను యోన్ విస్సా (Yoane Wissa) అద్భుతమైన హెడర్‌తో గోల్‌గా మలిచాడు. వరల్డ్ కప్ చరిత్రలో డీఆర్ కాంగోకు ఇదే తొలి గోల్ కావడం విశేషం. సెకండాఫ్‌లో జావో కాన్సెలో అద్భుతమైన ఓవర్ హెడ్ కిక్‌తో పోర్చుగల్ తరఫున గోల్ చేసినప్పటికీ, VAR దాన్ని ఆఫ్ సైడ్ (Offside) గా తేల్చడంతో నిరాశ తప్పలేదు.

రొనాల్డో ఫ్లాప్ షో.. 25 టచెస్, 0 షాట్స్ ఆన్ టార్గెట్!

తన కెరీర్‌లో రికార్డు స్థాయిలో ఆరో వరల్డ్ కప్ ఆడుతున్న 41 ఏళ్ల క్రిస్టియానో రొనాల్డో (Cristiano Ronaldo) మ్యాచ్ మొత్తం తీవ్రంగా నిరాశపరిచాడు. 90 నిమిషాల ఆటలో అతను బంతిని తాకింది కేవలం 25 సార్లు మాత్రమే. కనీసం ఒక్క 'షాట్ ఆన్ టార్గెట్' కూడా నమోదు చేయలేకపోయాడు. మేజర్ టోర్నీల్లో రొనాల్డో వరుసగా 10 మ్యాచ్‌ల్లో ఒక్క గోల్ కూడా చేయకపోవడం అతని ఫామ్‌పై మరింత ఆందోళన పెంచుతోంది.

"జట్టుకు గోల్ కావాలి.. నీకు కాదు!" - థియరీ హెన్రీ

రొనాల్డో పేలవ ప్రదర్శనపై ఫ్రాన్స్ వరల్డ్ కప్ విజేత, ఫుట్‌బాల్ దిగ్గజం థియరీ హెన్రీ (Thierry Henry) తీవ్రస్థాయిలో విమర్శలు గుప్పించాడు. రొనాల్డో కదలికల వల్ల పోర్చుగల్‌కు లాభం కన్నా నష్టమే ఎక్కువగా జరిగిందని ఫాక్స్ స్పోర్ట్స్ అనాలిసిస్‌లో స్పష్టం చేశాడు.

"జట్టు గోల్ చేయాలి, నువ్వు కాదు. తను గోల్ చేయాలన్న ఆత్రుతలో రొనాల్డో.. బ్రూనో ఫెర్నాండెజ్ (Bruno Fernandes) దారికి అడ్డువచ్చాడు. బ్రూనో కి స్పేస్ క్రియేట్ చేసి ఉంటే అతను సులభంగా టాప్-ఇన్ గోల్ చేసి ఉండేవాడు. కానీ రొనాల్డో స్వార్థంగా ఆడాడు, దీనివల్ల డిఫెండర్లకు పని మరింత సులువైంది," అని హెన్రీ చెప్పుకొచ్చాడు.

తర్వాత ఏంటి?

జూన్ 23న జరిగే తదుపరి మ్యాచ్‌లో పోర్చుగల్.. ఉజ్బెకిస్థాన్‌తో తలపడనుంది. ఆ మ్యాచ్‌లో గెలిచి తిరిగి ఫామ్‌లోకి రావాలని పోర్చుగల్ భావిస్తోంది. మరోవైపు, చారిత్రక డ్రాతో అద్భుతమైన జోష్‌లో ఉన్న డీఆర్ కాంగో తమ తదుపరి మ్యాచ్‌లో కొలంబియాతో తలపడుతుంది.

Find us on