T20 World Cup 2026 | ఆఫ్గ‌న్ ప్లేయర్ మ‌హ్మ‌ద్ న‌బీపై ఐసీసీ భారీ జరిమానా.. అంపైర్‌పై ఆగ్ర‌హం వ్య‌క్తం చేసినందుకే..

T20 World Cup 2026 | ఆఫ్గ‌నిస్తాన్‌కు చెందిన సీనియర్ ఆల్‌రౌండర్ మహ్మద్ నబీపై ఇంటర్నేష‌న‌ల్ క్రికెట్ కౌన్సిల్‌ (ICC) భారీ జరిమానా విధించింది. ఐసీసీ కోడ్ ఆఫ్ కండక్ట్ ప్రకారం లెవల్ 1 ఉల్లంఘనకు పాల్ప‌డినందుకు ఈ చర్యలు తీసుకుంది. ఫిబ్రవరి 11, 2026న అహ్మదాబాద్‌లో సౌతాఫ్రికాతో జరిగిన డబుల్ సూపర్ ఓవర్ మ్యాచ్ సందర్భంగా ఈ ఘటన చోటుచేసుకుంది. ఐసీసీ ప్లేయర్లు, ప్లేయర్ సపోర్ట్ సిబ్బందికి వర్తించే కోడ్ ఆఫ్ కండక్ట్‌లోని ఆర్టికల్ 2.8ను న‌బీ ఉల్లంఘించినట్లు తేలింది. ఈ నిబంధన ప్రకారం అంతర్జాతీయ మ్యాచ్ సందర్భంగా అంపైర్ నిర్ణయంపై అసమ్మతి వ్యక్తం చేయడం నిషేధం.

మ్యాచ్ ఫీజులో 25 శాతం జరిమానా, ఒక డీమెరిట్ పాయింట్‌..

రెండో సూపర్ ఓవర్‌లో ఎల్బీడబ్ల్యూ అప్పీల్‌పై అంపైర్ నాట్ అవుట్‌గా నిర్ణయం ఇవ్వడంతో నబీ తీవ్ర అసంతృప్తిని వ్యక్తం చేశాడు. అతను ఆగ్రహభావంతో స్పందించినట్లు మ్యాచ్ అధికారులు గుర్తించారు. ఈ ఉల్లంఘనకు గాను నబీ మ్యాచ్ ఫీజులో 25 శాతం జరిమానా విధించారు. అదనంగా అతని క్రమశిక్షణ రికార్డులో ఒక డీమెరిట్ పాయింట్ ను చేర్చారు. గత 24 నెలల్లో అతనికి ఇప్పటికే ఒక పాయింట్ ఉండటంతో, మొత్తం రెండు డీమెరిట్ పాయింట్లు నమోదయ్యాయి. ఈ ఆరోపణలను ఆన్‌ఫీల్డ్ అంపైర్లు, థర్డ్ అంపైర్ నమోదు చేశారు. మహ్మద్ నబీ తన తప్పును అంగీకరించి మ్యాచ్ రిఫరీ ప్రతిపాదించిన శిక్షను ఒప్పుకున్నాడు. దీంతో అధికారిక విచారణ అవసరం లేకుండా వ్యవహారం ముగిసింది.

జ‌ట్టు యాజ‌మాన్యం మ‌ద్ద‌తు..

టోర్నమెంట్ చరిత్రలో అత్యంత ఉత్కంఠభరితంగా సాగిన మ్యాచ్‌లలో ఒకటిగా ఆఫ్గ‌నిస్థాన్‌, సౌతాఫ్రికా మ్యాచ్ నిలిచింది. ఆఫ్గ‌నిస్తాన్ రెండో టై బ్రేకర్‌లో తక్కువ తేడాతో ఓడిపోవడం మ్యాచ్‌లో తీవ్ర ఒత్తిడిని సృష్టించింది. అదే నేపథ్యంలో ఆటగాళ్ల భావోద్వేగాలు ఉధృతమయ్యాయని భావిస్తున్నారు. 25 శాతం జరిమానా ఆర్థిక పరంగా దెబ్బ అయినప్పటికీ, డీమెరిట్ పాయింట్ జట్టుకు ఎక్కువ ఆందోళన కలిగిస్తోంది. 24 నెలల్లో 4 డీమెరిట్ పాయింట్లు చేరితే ఆటగాడిపై సస్పెన్షన్ విధించే అవకాశం ఉంటుంది. డ్రెస్సింగ్ రూమ్‌లో సీనియర్ పాత్ర పోషించే నబీ నుంచి ఇలాంటి స్పందన వ‌స్తుంద‌ని చాలా మంది ఊహించ‌లేదు. అయితే ఇలాంటి పరిస్థితులలో తీవ్ర ఒత్తిడిని దృష్టిలో ఉంచుకుని జట్టు యాజమాన్యం అతనికి మద్దతుగా నిలిచినట్లు తెలుస్తోంది. ఇక ఆఫ్గ‌నిస్థాన్ త‌న త‌దుప‌రి మ్యాచ్‌ను ఈ నెల 16వ తేదీన యూఏఈతో ఆడ‌నుంది. సూప‌ర్ 8 ద‌శ‌కు చేరాలంటే ఇక‌పై మ్యాచ్‌ల‌ను ఆఫ్గ‌నిస్థాన్ త‌ప్ప‌క గెల‌వాల్సిన ప‌రిస్థితి ఏర్ప‌డింది. అలాగే ర‌న్ రేట్ కూడా కీల‌కం కానుంది.