IND Vs WI | ఆ ఓవర్‌ కుల్దీప్‌కు ఇవ్వడమే తప్పిద‌మే : సునీల్ గ‌వాస్క‌ర్‌

IND Vs WI | వెస్టిండీస్‌తో రెండో టీ20లో టీమిండియా ఓటమిపై దిగ్గజ క్రికెటర్‌ సునీల్‌ గవాస్కర్‌ స్పందించాడు. కీలకమైన 17వ ఓవర్‌ను స్పిన్నర్‌ కుల్దీప్‌ యాదవ్‌కు ఇవ్వడం జట్టు మేనేజ్‌మెంట్‌ చేసిన ఘోర తప్పిదమని అభిప్రాయపడ్డాడు. ఆ సమయంలో పేసర్లు మయాంక్‌ యాదవ్‌, అర్ష్‌దీప్‌ సింగ్‌తో బౌలింగ్‌ చేయించి ఉంటే ఫలితం మరోలా ఉండేదని పేర్కొన్నాడు. ఈ ఓవర్‌లో కుల్దీప్‌ 24 పరుగులు సమర్పించుకోవడం మ్యాచ్‌పై ప్రభావం చూపిందని తెలిపాడు. ‘17వ ఓవర్‌ను అర్ష్‌దీప్‌, మయాంక్‌తో వేయించేవాడిని. అర్ష్‌దీప్‌ తన చివరి ఓవర్‌ (18వ ఓవర్‌)లో ఎక్కువ పరుగులిచ్చాడు. అయితే, మయాంక్‌ ఆరంభంలో కీలక వికెట్లు తీశాడు. అత‌ని ఎకానమీ రేటు ఓవర్‌కు సుమారు 12 పరుగులుగా ఉన్నప్పటికీ, ఆ సమయంలో వెస్టిండీస్‌ మరిన్ని పరుగులు చేయాల్సి ఉంది. అలాంటి పరిస్థితిలో మయాంక్‌కు బంతి ఇచ్చి ఉంటే వికెట్‌ తీసే అవకాశం ఉండేది. అప్పుడు మ్యాచ్‌ భారత్‌ వైపు మొగ్గు చూపేదేమో’ అని గవాస్కర్ పేర్కొన్నారు.

ఒక కీలక సమయంలో వికెట్‌ తీస్తే ప్రత్యర్థి జట్టుపై ఒత్తిడి పెరుగుతుందని గవాస్కర్‌ పేర్కొన్నాడు. కొత్త బ్యాటర్‌ క్రీజులోకి రావాల్సి వస్తుందని, దీంతో ఛేజింగ్‌ జట్టు ఇబ్బందుల్లో పడే అవకాశముంటుందని వివరించాడు. అందుకే ఆ సమయంలో మయాంక్‌ను ప్రయత్నించి ఉండాల్సిందని అభిప్రాయపడ్డాడు. శివమ్‌ దూబేతో తొమ్మిదో ఓవర్‌ వేయించడం కూడా సరైన నిర్ణయం కాదని గవాస్కర్‌ పేర్కొన్నాడు. ‘ఆ సమయంలో బ్యాటర్లు క్రీజులో కుదురుకునే ప్రయత్నంలో ఉన్నారు. అలాంటి పరిస్థితిలో దూబేకు బదులుగా కుల్దీప్‌తో బౌలింగ్‌ చేయించి ఉంటే బాగుండేది’ అని సూచించాడు.

రెండో టీ20లో తొలుత భారత్‌ భారీ స్కోరు సాధించగా.. 250 పరుగుల లక్ష్య ఛేదనలో వెస్టిండీస్‌ అదరగొట్టింది. కుల్దీప్‌ వేసిన 17వ ఓవర్‌లో మూడు సిక్సర్లు, ఒక ఫోర్‌తో పాటు వైడ్‌ రూపంలో పరుగులు రావడంతో విండీస్‌ ఆధిపత్యం పెరిగింది. చివరకు ఆ జట్టు ఆరు వికెట్ల తేడాతో విజయం సాధించి ఐదు మ్యాచ్‌ల సిరీస్‌ను 1-1తో సమం చేసింది. టీ20 అంతర్జాతీయ క్రికెట్‌లో అత్యధిక లక్ష్య ఛేదనల్లో ఇది రెండో అత్యుత్తమ ప్రదర్శనగా నిలిచింది. ఈ ఫార్మాట్‌లో అత్యధిక లక్ష్య ఛేదన రికార్డు దక్షిణాఫ్రికా పేరిట ఉంది. వెస్టిండీస్‌పై 259 పరుగుల లక్ష్యాన్ని ఛేదించి దక్షిణాఫ్రికా ఈ ఘనత సాధించింది. టీ20 క్రికెట్‌లో 250 లేదా అంతకంటే ఎక్కువ పరుగుల లక్ష్యాన్ని విజయవంతంగా ఛేదించడం ఇది ఏడోసారి.