Rinku Singh | రింకు సింగ్ ఇంట్లో విషాద ఛాయ‌లు.. క్యాన్స‌ర్‌తో క‌న్నుమూసిన తండ్రి..

Rinku Singh | భార‌త క్రికెట్ జ‌ట్టు బ్యాట‌ర్ రింకు సింగ్ ఇంట్లో విషాద ఛాయ‌లు అలుముకున్నాయి. ఆయ‌న తండ్రి ఖాన్‌చంద్‌ సింగ్ స్టేజ్ 4 లివ‌ర్ క్యాన్స‌ర్‌తో ఐసీయూలో చికిత్స పొందుతూ శుక్ర‌వారం మృతి చెందారు. గ్రేట‌ర్ నోయిడాలోని యథార్థ్ హాస్పిట‌ల్‌లో ఖాన్‌చంద్‌ సింగ్ తుది శ్వాస విడిచారు. గ‌త కొంత కాలంగా ఖాన్‌చంద్‌ సింగ్ ఆరోగ్యం పూర్తిగా క్షీణించింది. దీంతో ఆయ‌న‌ను హాస్పిట‌ల్‌లో అత్య‌వ‌స‌ర చికిత్స విభాగంలో చేర్పించారు. ఆయ‌న ప‌రిస్థితి విష‌మించ‌డంతో వైద్యులు ఇప్ప‌టికే వెంటిలేట‌ర్ పై చికిత్స అందిస్తూ వ‌చ్చారు. రెనాల్ రీప్లేస్‌మెంట్ థెర‌పీ (సీఆర్టీ)ని కూడా నిర్వ‌హించిన‌ట్లు వైద్యులు వివ‌రించారు. అయిన‌ప్ప‌టికీ క్యాన్స‌ర్ తీవ్ర‌త మ‌రీ అధికంగా ఉండ‌డంతో వైద్యులు ఆయ‌న ప్రాణాల‌ను కాపాడ‌లేకపోయారు. శుక్ర‌వారం ఉద‌యం ఖాన్‌చంద్‌ సింగ్ క‌న్నుమూశార‌ని వైద్యులు తెలిపారు.

రింకు కుటుంబానికి ప్ర‌గాఢ సానుభూతి..

టీ20 వ‌రల్డ్ క‌ప్ 2026 టోర్నీలో ఆడుతున్న రింకు సింగ్ సౌతాఫ్రికాతో జ‌రిగిన సూప‌ర్ 8 మ్యాచ్ అనంత‌రం త‌న తండ్రికి సీరియ‌స్ ఉండ‌డంతో ఇంటికి వెళ్లాడు. ఆయ‌న ప‌రిస్థితిని స‌మీక్షించాక తిరిగి జ‌ట్టుతో రింకు చేరాడు. గురువారం చెన్నైలో జింబాబ్వేతో జ‌రిగిన మ్యాచ్‌లో రింకు ఆడ‌లేదు. కానీ డ్రింక్స్ అందిస్తూ మైదానంలో క‌నిపించాడు. అయితే తండ్రి ప‌రిస్థితి విష‌మించింద‌ని తెలియ‌డంతో అత‌ను మళ్లీ గ్రేట‌ర్ నోయిడాకు వెళ్లాడు. కాగా రింకు తండ్రి మ‌ర‌ణ‌వార్త‌పై బీసీసీఐ, తోటి ప్లేయ‌ర్లు, మాజీలు విచారం వ్య‌క్తం చేశారు. రింకు కుటుంబానికి త‌మ ప్ర‌గాఢ సానుభూతి తెలిపారు. ఎక్స్ వేదిక‌గా స్పందించిన మాజీ ప్లేయ‌ర్ హ‌ర్భ‌జ‌న్ సింగ్ ఇది అత్యంత క్లిష్ట స‌మ‌య‌మ‌ని, రింకు తండ్రి ఆత్మ‌కు శాంతి క‌ల‌గాల‌ని కోరుకుంటున్న‌ట్లు తెలిపారు.

Pained to learn about the demise of Shri Khanchand Singh Ji, father of Rinku Singh. This must be an especially difficult time for Rinku and his family, even as he remains committed to his responsibilities during the T20 World Cup.
My heartfelt thoughts and prayers are with him…

— Harbhajan Turbanator (@harbhajan_singh) February 27, 2026

కాగా ఖాన్‌చంద్‌ సింగ్ ఎల్‌పీజీ సిలిండ‌ర్ ల‌ను డెలివ‌రీ చేస్తూ కుటుంబాన్ని పోషించారు. రింకు ప్ర‌స్తుతం ఇంత‌టి స్థాయిలో ఉండేందుకు అత‌ని తండ్రి క‌ఠిన శ్ర‌మే కార‌ణ‌మ‌ని చెప్ప‌వ‌చ్చు. ఆయ‌న ఎంతో క‌ష్ట‌ప‌డ్డార‌ని, కుటుంబాన్ని పోషించ‌డంతోపాటు రింకును ఈ స్థాయిలో చూసేందుకు తీవ్రంగా శ్ర‌మించార‌ని తోటి ప్లేయ‌ర్లు తెలిపారు.