Abhishek Porel | పెండ్లి పేరుతో మోసం చేశాడు.. ఐపీఎల్ ఆట‌గాడిపై యువ‌తి ఫిర్యాదు

Abhishek Porel | త్రినేత్ర‌.న్యూస్‌: బెంగాల్ క్రికెట‌ర్‌, ఇండియ‌న్ ప్రీమియ‌ర్ లీగ్‌ (IPL) ఆట‌గాడు అభిషేక్ పోరెల్ (Abhishek Porel) వివావాదంలో చిక్కుకున్నాడు. పెండ్లి చేసుకుంటాన‌ని న‌మ్మించి ఓ మెడిక‌ల్ విద్యార్థినితో స‌హ‌జీవ‌నం చేస్తున్న పోరెల్‌.. ఆమెతో శారీర‌క సంబంధం పెట్టుకున్నాడు. ఆ త‌ర్వాత ఆమెపై దాడిచేసి బెదింపుల‌కు పాల్ప‌డుతున్నాడంటూ బాధిత యువ‌తి పోలీసుల‌కు ఫిర్యాదు చేసింది.

క‌ర్ణాట‌కలోని హుగ్లీ జిల్లా చంద‌నాన‌గ‌ర్‌కు చెందిన పోరెల్ (23) బెంగాల్ ఆట‌గాడిగా కొన‌సాగుతున్నాడు. ఈ వికెట్ కీప‌ర్ బ్యాట‌ర్‌ ఇండియా ఏ టీమ్ తరఫున యూకే, ఆస్ట్రేలియా పర్యటించాడు. ఐపీఎల్‌లో ఢిల్లీ క్యాపిటల్స్‌కు (Delhi Capitals) ప్రాతినిథ్యం వ‌హిస్తున్నాడు. 2026 ఐపీఎల్‌లో ఇప్ప‌టివ‌ర‌కు 34 మ్యాచ్‌లు ఆడి 769 ప‌రుగులు చేశాడు. సీజ‌న్‌లో 4 మ్యాచుల్లో మాత్ర‌మే ఆడాడు.

మూడేండ్లుగా రిలేష‌న్‌లో..

కాగా, ప‌శ్చిమ‌బెంగాల్‌కు చెందిన యువ‌తితో గ‌త మూడేండ్లుగా రిలేష‌న్ షిప్‌లో ఉన్నాడు. పెండ్లి చేసుకుంటానని అబద్ధపు ప్రామిస్ చేసి ఆమెతో శారీరక సంబంధం పెట్టుకున్నాడు. ఆ తర్వాత తనపై దాడి చేసి క్రిమినల్ బెదిరింపులకు గురిచేశాడ‌ని హుగ్లీ జిల్లాలోని మొగ్రా పోలీస్ స్టేషన్‌లో త‌న త‌ల్లితో క‌లిసి ఫిర్యాదు చేసింది. గ‌తేడాది నుంచి త‌మ మ‌ధ్య బేధాభిప్రాయాలు వ‌చ్చాయ‌ని, ఆ త‌ర్వాత త‌న‌ను దూరం పెట్టడం ప్రారంభించాడ‌ని ఆరోపించింది. తనను పెళ్లి చేసుకుంటానని నమ్మించి శారీరకంగా వాడుకున్నాడని, ఇప్పుడు పెండ్లి చేసుకోవడానికి ఒప్పుకోవడం లేదని పేర్కొంది. అంతేకాకుండా అడిగితే తనపై దాడిచేసి, చంపేస్తానంటూ క్రిమినల్ బెదిరింపులకు పాల్పడ్డాడని చెప్పింది. గ‌తంలోనే ఈ విష‌యం పోలీస్ స్టేష‌న్‌కు చేరిన‌ప్ప‌టికీ, అప్పుడు ఆమె ఫిర్యాదు చేయ‌లేద‌ని, కానీ ఇప్పుడు త‌న త‌ల్లితో వ‌చ్చి ఫిర్యాదు చేసింద‌ని పోలీసులు వెల్ల‌డించారు.

బాగా ఆడుతున్నందుకే..

ఈ ఆరోప‌ణ‌ల‌ను అభిషేక్ పోరెల్ కొట్టిపారేశాడు. అవ‌న్నీ అబద్ధాలని చెప్పాడు. ప్ర‌స్తుతం తాను క్రికెట్‌లో బాగా రాణిస్తున్నందుకే త‌న‌పై ఇలాంటి రకరకాల విష‌యాలు బయటకు వస్తున్నాయన్నాడు. పోలీసులు ఇప్పటివరకు తనను సంప్ర‌దించ‌లేద‌ని తెలిపాడు.