Asian Games | ఆసియా గేమ్స్‌లో దాయాదుల సమరం.. అక్టోబ‌ర్ 1న హైవోల్టేజ్ మ్యాచ్‌

Asian Games | ఆసియా గేమ్స్‌లో హాకీ అభిమానులకు మరోసారి దాయాదుల సమరం కనువిందు చేయనుంది. పురుషుల హాకీలో భారత్, పాకిస్తాన్ జట్లు సెమీఫైనల్లో తలపడనున్నాయి. గురువారం (అక్టోబర్‌ 1) జరిగే ఈ మ్యాచ్‌లో గెలిచిన జట్టు ఫైన‌ల్ అంటే గోల్డ్ మెడ‌ల్ పోరుకు అర్హ‌త సాధిస్తాయి. ఓడిన జట్టుకు కాంస్య పతకం కోసం పోటీ చేసే అవకాశం ఉంటుంది. ఆసియా గేమ్స్‌లో డిఫెండింగ్‌ చాంపియన్ అయిన భార‌త్.. పూల్‌-బీలో అద్భుత ప్రదర్శనతో సెమీస్‌ బెర్త్‌ ఖాయం చేసుకుంది. ఇప్పటివరకు ఆడిన నాలుగు మ్యాచ్‌ల్లోనూ వరుస విజయాలు సాధించింది. ఇండోనేషియాను 13-1తో, శ్రీలంకను 16-1తో, దక్షిణ కొరియాను 8-2తో, ఆతిథ్య జపాన్‌ను 2-0తో చిత్తు చేసింది. చివరి గ్రూప్‌ మ్యాచ్‌లో బంగ్లాదేశ్‌తో తలపడనుంది. మరోవైపు పాకిస్తాన్‌ కూడా గ్రూప్‌ దశలో సమర్థవంతమైన ప్రదర్శనతో సెమీఫైనల్‌కు చేరింది. తన గ్రూప్‌లో రెండో స్థానంలో నిలిచి భారత్‌తో కీలక పోరుకు సిద్ధమైంది.

హర్మన్‌ప్రీత్‌ సేనపై భారీ అంచనాలు

కెప్టెన్‌ హర్మన్‌ప్రీత్‌ సింగ్‌ నేతృత్వంలోని భారత జట్టు ఫీల్డ్‌ గోల్స్‌తో పాటు పెనాల్టీ కార్నర్లను గోల్స్‌గా మలచడంలో సత్తా చాటుతోంది. అయితే నాకౌట్‌ మ్యాచ్‌లో చిన్న పొరపాటు కూడా భారీ మూల్యం చెల్లించేలా చేసే అవకాశం ఉండటంతో.. వ్యూహాత్మకంగా మరింత అప్రమత్తంగా ఉండాలని కోచ్‌ సూచిస్తున్నాడు. భారత్‌-పాకిస్తాన్‌ మ్యాచ్‌ అంటేనే ఉత్కంఠ, ఒత్తిడి, భావోద్వేగాల కలయిక. ఇరు జట్ల అభిమానుల్లో ఈ మ్యాచ్‌పై ఎప్పుడూ ప్రత్యేక ఆసక్తి ఉంటుంది. ఈసారి కూడా అదే స్థాయిలో మ్యాచ్ ఉత్కంఠ‌గా సాగే అవ‌కాశం ఉంది.

గత రికార్డులు ఎలా ఉన్నాయంటే..?

భారత్‌-పాకిస్తాన్‌ మధ్య పురుషుల హాకీలో ఇప్పటివరకు జరిగిన పోటీల్లో మొత్తంగా పాకిస్తాన్‌దే అధిక విజయాల రికార్డు. ఇటీవలి సంవత్సరాల్లో భారత జట్టు ఆధిపత్యం చెలాయిస్తోంది. గత పదేళ్లుగా పాకిస్తాన్‌పై భారత్‌ ఓటమి అన్న‌దే లేకుండా ముందుకు సాగుతోంది. ఇటీవల ఎఫ్‌ఐహెచ్‌ వరల్డ్‌కప్‌లో ఇరు జట్లు తలపడగా.. భారత్‌ 5-3తో పాకిస్తాన్‌ను ఓడించింది. ఈ నేపథ్యంలో ఆసియా గేమ్స్‌ సెమీఫైనల్‌లో దాయాదుల పోరు మరింత ఆసక్తిని రేపుతోంది. విజయం సాధించిన జట్టు స్వర్ణ పతక పోరులో అడుగుపెట్టనుండటంతో.. గురువారం జరిగే మ్యాచ్‌పై అందరి దృష్టి నెలకొంది.

𝗧𝗛𝗘 𝗕𝗜𝗚𝗚𝗘𝗦𝗧 𝗥𝗜𝗩𝗔𝗟𝗥𝗬 𝗥𝗘𝗧𝗨𝗥𝗡𝗦 𝗢𝗡 𝗧𝗛𝗘 𝗔𝗦𝗜𝗔𝗡 𝗦𝗧𝗔𝗚𝗘! 🇮🇳🔥

The Indian Men’s Team will take on Pakistan on October 1 in the men’s hockey semi-finals at Asian Games 2026 in Japan.

The stakes couldn’t be higher when a spot in the gold medal match… pic.twitter.com/F3ChjCYQ4d

— Hockey India (@TheHockeyIndia) September 28, 2026