Telangana Graduate MLC Voter Registration | గ్రాడ్యుయేట్ ఎమ్మెల్సీ ఓటు నమోదు షురూ: అర్హతలు ఇవే.. ఫోన్ నుంచే ఫారమ్-18 కు ఎలా దరఖాస్తు చేసుకోవాలి

Telangana Graduate MLC Voter Registration | త్రినేత్ర న్యూస్ : తెలంగాణలోని గ్రాడ్యుయేట్లకు రాష్ట్ర ఎన్నికల సంఘం కీలక ప్రకటన చేసింది. మహబూబ్‌నగర్-రంగారెడ్డి-హైదరాబాద్‌తో పాటు వరంగల్-ఖమ్మం-నల్గొండ పట్టభద్రుల ఎమ్మెల్సీ నియోజకవర్గాలకు సంబంధించి తాజా ఓటర్ల జాబితా రూపకల్పన (De-novo Electoral Roll) ప్రక్రియను అధికారికంగా ప్రారంభించింది. ఈ స్థానాల ప్రస్తుత పదవీకాలం 2027 మార్చితో ముగియనున్న నేపథ్యంలో, అర్హులైన గ్రాడ్యుయేట్లు వెంటనే తమ ఓటు హక్కును నమోదు చేసుకోవాలని అధికారులు సూచించారు.

పాత ఓటు ఉంటే సరిపోదా? మళ్లీ ఎందుకు అప్లై చేయాలి?

చాలామంది గ్రాడ్యుయేట్లలో ఉండే ప్రధాన సందేహం ఇది. సాధారణంగా అసెంబ్లీ లేదా పార్లమెంట్ ఎన్నికల ఓటర్ కార్డులు వేరు, గ్రాడ్యుయేట్ ఎమ్మెల్సీ ఓటు వేరు. అంతే కాకుండా, గత ఎమ్మెల్సీ ఎన్నికల్లో మీరు ఓటు వేసినప్పటికీ.. ప్రతిసారి ఎన్నికల సంఘం పాత లిస్ట్‌ను రద్దు చేసి సరికొత్త ఓటర్ల జాబితాను రూపొందిస్తుంది. కాబట్టి పాత ఓటర్లతో పాటు కొత్తగా డిగ్రీ పూర్తి చేసిన ప్రతి ఒక్కరూ కచ్చితంగా 'ఫారమ్-18' (Form-18) ద్వారా మళ్లీ దరఖాస్తు చేసుకోవడం తప్పనిసరి.

ఎవరు అర్హులు? (Eligibility Criteria)

క్వాలిఫైయింగ్ కటాఫ్: నవంబర్ 1, 2026 నాటికి కనీసం మూడేళ్ల క్రితమే గుర్తింపు పొందిన విశ్వవిద్యాలయం నుంచి డిగ్రీ లేదా దానికి సమానమైన ప్రొఫెషనల్ డిప్లొమా పూర్తి చేసి ఉండాలి.

స్థానికత: దరఖాస్తుదారుడు సంబంధిత పట్టభద్రుల నియోజకవర్గ పరిధిలోని జిల్లాల్లో స్థిర నివాసి అయి ఉండాలి.

దరఖాస్తుకు కావాల్సిన కీలక పత్రాలు (Required Documents)

ఆన్‌లైన్‌లో అప్లై చేసే ముందు ఈ డాక్యుమెంట్లను సిద్ధంగా ఉంచుకోవాలి.

డిగ్రీ సర్టిఫికేట్: ఒరిజినల్ డిగ్రీ, కాన్వొకేషన్ లేదా ప్రొవిజనల్ మార్కుల మెమో (గెజిటెడ్ ఆఫీసర్ లేదా నోటరీతో అటెస్టేషన్ తప్పనిసరి - 200 KB లోపు సైజు).

అడ్రస్ ప్రూఫ్: ఆధార్ కార్డు, డ్రైవింగ్ లైసెన్స్ లేదా ఓటరు గుర్తింపు కార్డు.

పాస్‌పోర్ట్ సైజ్ ఫోటో: ఇటీవల తీసుకున్న కలర్ ఫోటో (100 KB లోపు సైజు).

ఆన్‌లైన్‌లో స్టెప్ బై స్టెప్ అప్లికేషన్ ప్రాసెస్

తెలంగాణ ఎన్నికల ప్రధానాధికారి అధికారిక పోర్టల్ ceotelangana.nic.in లేదా డైరెక్ట్ లింక్ ceotserms2.telangana.gov.in/MLC/Form18.aspx ఓపెన్ చేయండి.

హోమ్‌పేజీలోని "Council Constituency" సెక్షన్‌లోకి వెళ్లి "Form-18" ఎంచుకోండి.

మీ పేరు, పుట్టిన తేదీ, ప్రస్తుత నివాస చిరునామా, గ్రాడ్యుయేషన్ వివరాలను నమోదు చేయండి.

గెజిటెడ్ సంతకం ఉన్న డిగ్రీ సర్టిఫికేట్, ఆధార్, ఫోటోలను నిర్దేశిత సైజుల్లో అప్‌లోడ్ చేయండి.

వివరాలు సరిచూసుకుని సబ్మిట్ చేసిన వెంటనే వచ్చే Acknowledgement ID/Application Numberను సేవ్ చేసుకోండి. దీని ద్వారా మీ అప్లికేషన్ స్టేటస్‌ను ట్రాక్ చేయవచ్చు.

ఆఫ్‌లైన్ విధానం: సమీపంలోని తహసీల్దార్ (MRO), ఆర్డీవో (RDO) లేదా ERO/AERO కార్యాలయాల నుంచి ఫారమ్-18 తీసుకుని, అవసరమైన సర్టిఫికెట్ల జిరాక్స్ ప్రతులు జతచేసి నేరుగా అందించవచ్చు.

ఎమ్మెల్సీ ఓటరు నమోదు ముఖ్యమైన తేదీలు

నోటిఫికేషన్ విడుదల: సెప్టెంబర్ 28, 2026

అర్హత గణన తేదీ (Cut-off Date): నవంబర్ 1, 2026

దరఖాస్తుల స్వీకరణకు తుది గడువు: నవంబర్ 6, 2026

ముసాయిదా (డ్రాఫ్ట్) ఓటర్ల జాబితా ప్రచురణ: నవంబర్ 25, 2026

క్లెయిమ్‌లు, అభ్యంతరాల స్వీకరణ: నవంబర్ 25 – డిసెంబర్ 10, 2026

తుది ఓటర్ల జాబితా (Final List) విడుదల: డిసెంబర్ 30, 2026

చివరి తేదీ వరకు వేచి చూడకుండా అర్హులైన పట్టభద్రులందరూ వెంటనే దరఖాస్తు చేసుకోవాలని ఎన్నికల సంఘం కోరింది. నమోదుకు సంబంధించి ఎలాంటి సందేహాలున్నా అన్ని పనిదినాల్లో ఉదయం 10:30 నుంచి సాయంత్రం 5:00 గంటల మధ్య టోల్ ఫ్రీ నంబర్ 1950కు కాల్ చేసి సమాచారం పొందవచ్చు.

మహబూబ్‌నగర్-రంగారెడ్డి-హైదరాబాద్‌ లేదా వరంగల్-ఖమ్మం-నల్గొండ పట్టభద్రుల ఎమ్మెల్సీ నియోజకవర్గాలకు చెందిన అభ్యర్థులు మీ ఓటు హక్కును నమోదు చేసుకోవడానికి ఈ లింక్‌ను క్లిక్ చేయండి.