కార్ల త‌యారీలో జ‌ర్మ‌నీతో క‌లిసి ప‌నిచేస్తాం: డిప్యూటీ సీఎం భ‌ట్టి

కార్ల తయారీలో జర్మనీతో కలిసి పనిచేస్తాం: డిప్యూటీ సీఎం భట్టి త్రినేత్ర.న్యూస్: తెలంగాణ రాష్ట్ర అభివృద్ధి, మానవ వనరుల సద్వినియోగం కోసం జర్మనీ దేశంలో కలిసి పనిచేస్తామని డిప్యూటీ సీఎం భట్టి విక్రమార్క అన్నారు. శుక్రవారం (2025 డిసెంబర్ 12) ఉదయం ప్రజాభవన్ లో మంత్రి శ్రీధర్ బాబుతో కలిసి ఆయన జర్మనీ పార్లమెంటు బృందంతో భేటీ అయ్యారు. ఈ సందర్భంగా జర్మనీ ఎంపీల బృందాన్ని ఉద్దేశించి డిప్యూటీ సీఎం భట్టి విక్రమార్క మాట్లాడారు. ఐటీ, డిఫెన్స్, ఫార్మా రంగాల్లో జర్మనీతో కలిసి పని చేసేందుకు తెలంగాణ ప్రభుత్వం సిద్ధంగా ఉందని ఆయన స్పష్టం చేశారు. ఆయా రంగాల్లో పెట్టుబడులు వస్తే తెలంగాణ ప్రభుత్వం నుంచి పూర్తి సహకారం ఉంటుందని భట్టి వివరించారు. తెలంగాణలో నైపుణ్యం కలిగిన మానవ వనరులను జర్మనీకి పంపడానికి తెలంగాణ ప్రభుత్వం ఆసక్తిగా ఉందని, ప్రసిద్ధి చెందిన మెటలర్జీ, కార్ల తయారీ రంగంలో జర్మనీతో కలిసి పని చేయడానికి తెలంగాణ ప్రభుత్వం ఆసక్తిగా ఉందని పార్లమెంట్ బృందానికి వివరించారు. స్కిల్ యూనివర్సిటీలో జర్మన్ లాంగ్వేజీ కూడా ఈ సందర్భంగా డిప్యూటీ సీఎం భట్టి.. తెలంగాణలో జరుగుతున్న అభివృద్ధి, ప్రతిష్టాత్మక ఫ్యూచర్ సిటీతో పాటు, మూసీ పునరుజ్జీవం, అమలు చేస్తున్న నూతన వ్యవసాయ ఆధారిత విధానాలను జర్మన్ ఎంపీల బృందానికి వివరించారు. హైదరాబాద్ నగరం ఐటీ రంగానికి హబ్ గా వెలుగొందుతుందని ఈ రంగాల్లో జర్మనీతో కలిసి పని చేసేందుకు తెలంగాణ ప్రభుత్వం సిద్ధంగా ఉందని డిప్యూటీ సీఎం స్పష్టం చేశారు. స్కిల్ యూనివర్సిటీ లో జర్మన్ లాంగ్వేజ్ విభాగాన్ని ఏర్పాటు చేసుకునే అంశాన్ని పరిశీలిస్తున్నామని తద్వారా తెలంగాణ విద్యార్థులు జర్మనీ భాష నేర్చుకొని జర్మనీ దేశంలో పనిచేసేందుకు అవకాశం ఉంటుందని వివరించారు. ఐటీ పరిశ్రమల శాఖ మంత్రి దుద్ధిళ్ల శ్రీధర్బాబు మాట్లాడుతూ.. సైబర్ సెక్యూరిటీ విషయాల్లో చాలా దూర దృష్టితో సైబర్ ఆఫ్ ఎక్సలెన్స్ కేంద్రం ఏర్పాటు చేశామని చెప్పారు. జిల్లాల్లో కూడా సైబర్ సెక్యూరిటీ బృందాలను ఏర్పాటు చేసినట్టు మంత్రి శ్రీధర్ బాబు వివరించారు. ఆర్థిక నేరాలు క్రమంగా తగ్గుముఖం పడుతున్నాయని, ఫైనాన్స్ రంగంలో సైబర్ ఫిషింగ్ ఎలా జరుగుతుంది, వాటిని అరికట్టేందుకు బెస్ట్ AI టూల్స్ వాడుతున్నట్టు మంత్రి శ్రీధర్ బాబు వివరించారు. తెలంగాణ రైజింగ్ 2047 విజన్ భేష్ తెలంగాణ రాష్ట్ర ప్రభుత్వం ఇటీవల ఆవిష్కరించిన తెలంగాణ రైజింగ్ 2047 విజన్ డాక్యుమెంట్ అద్భుతంగా ఉందని జర్మనీ పార్లమెంటు బృందం తెలంగాణ రాష్ట్ర ప్రభుత్వాన్ని అభినందించింది. ప్రతి రంగంలో సాధించాల్సిన లక్ష్యాలను ఈ విజన్ డాక్యుమెంట్ లో స్పష్టంగా పేర్కొనడం అభినందనీయమని పేర్కొన్నది. రాష్ట్ర ప్రగతి పట్ల ఈ ప్రభుత్వానికి ఉన్న నిబద్ధత ఏమిటో ఈ డాక్యుమెంట్ ద్వారా స్పష్టంగా తెలుస్తున్నదని జర్మనీ పార్లమెంట్ బృందం కొనియాడింది. సైబర్ సెక్యూరిటీ, స్కిల్ లేబర్ అంశాల్లో తెలంగాణ రాష్ట్ర ప్రభుత్వం నుంచి సహకారం కోరుకుంటున్నామని జర్మన్ పార్లమెంట్ బృందం వివరించింది. జర్మనీకి చెందిన పెట్టుబడిదారులు చాలామంది భారతదేశంలో పెట్టుబడులు పెట్టారని, తమ దేశానికి చెందిన BOSH వంటి ప్రసిద్ధ కంపెనీలు ఇక్కడ పెద్ద సంఖ్యలో పనిచేస్తున్నాయని చెప్పింది. తమ దేశానికి చెందిన ఇంజనీర్లు భారత దేశంలో, ప్రధానంగా తెలంగాణ రాష్ట్రంలో పని చేస్తున్నారని జర్మనీ పార్లమెంటు బృందం వివరించింది. భారతదేశానికి చెందిన 60 వేల మంది విద్యార్థులు జర్మనీలో వివిధ రకాల కోర్సులను అధ్యయనం చేస్తున్నారని తెలిపారు. ప్రతిభావంతులైన విద్యార్థులకు, స్కిల్డ్ లేబర్ కు భారతదేశం, తెలంగాణ రాష్ట్రంలో కొదవలేదని అన్నారు.