Smriti Mandhana | స్మృతి మందాన వివాహం ర‌ద్దు

Smriti Mandhana | భార‌త మ‌హిళా క్రికెట‌ర్ (Cricketer) స్మృతి మందాన (Smriti Mandhana), సంగీత ద‌ర్శ‌కుడు ప‌లాష్ ముచ్చ‌ల్ (Palash Muchhal) వివాహం ర‌ద్దు అయింది. ఈ మేర‌కు వారిరువురూ ఇన్‌స్టాగ్రామ్ (Instagram) వేదిక‌గా త‌మ నిర్ణ‌యాన్ని వెల్ల‌డించారు. ఒక‌వైపు స్మృతి వివాహం ర‌ద్ద‌యింద‌ని పేర్కొన‌గా, ముచ్చ‌ల్ త‌న జీవితంలో ఇది క‌ఠిన ద‌శ‌గా అభివ‌ర్ణిస్తూ, కానీ ముందుకు వెళ్లాల్సిన స‌మ‌యం వ‌చ్చింద‌ని పేర్కొన్నారు. గ‌త కొన్ని రోజులుగా వారి వివాహంపై కొన‌సాగుతున్న సందిగ్ధ‌త‌కు వారు తెర‌దించారు.

సుదీర్ఘ‌కాలంగా రిలేష‌న్‌షిప్‌లో....

వారిరువురూ 2019 నుంచి రిలేష‌న్‌షిప్ ఉండ‌గా, 2025 ప్రారంభంలో నిశ్చితార్థం చేసుకున్నారు. గ‌త నెల 23వ తేదీన మ‌హారాష్ట్ర‌లోని సాంగ్లీ ప‌ట్ట‌ణంలో వివాహం జ‌ర‌గాల్సి ఉన్న‌ప్ప‌టికీ స్మృతి తండ్రి అనారోగ్యంతో వాయిదాప‌డింది. పెళ్లికి ముందు సంగీత్‌, మెహిందీ, హ‌ల్దీ, ప్రీ వెడ్డింగ్ షూట్ కార్య‌క్ర‌మాలు పూర్త‌య్యాయి. వాటికి సంబంధించిన ఫొటోలు సైతం సోష‌ల్ మీడియాలో వైర‌ల‌య్యాయి.