Vaishnavi Sharma | వైష్ణవి శర్మ స్పిన్‌ మ్యాజిక్‌.. జింబాబ్వే 131 ఆలౌట్‌!

Vaishnavi Sharma | భారత మహిళల జట్టు యువ లెఫ్టార్మ్‌ స్పిన్నర్‌ వైష్ణవి శర్మ అంతర్జాతీయ క్రికెట్‌లో తొలిసారి ఐదు వికెట్ల ఘనతను అందుకుంది. జింబాబ్వేతో బుధవారం జరిగిన మూడో, చివరి వన్డేలో అద్భుతంగా బౌలింగ్‌ చేసి ప్రత్యర్థి జట్టు పతనాన్ని శాసించింది. వైష్ణవి (5/39) ధాటికి జింబాబ్వే 39.5 ఓవర్లలో 131 పరుగులకే కుప్పకూలింది. సయాలి సట్ఘరే (2/11), క్రాంతి గౌడ్‌ (2/23) కూడా రాణించడంతో భారత బౌలర్లు పూర్తి ఆధిపత్యం ప్రదర్శించారు. మూడు వన్డేల సిరీస్‌ను క్లీన్‌స్వీప్‌ (Clean Sweep) చేయాలంటే భారత్‌ 132 పరుగులు చేయాల్సి ఉంది.

ఆరంభంలోనే దెబ్బలు

టాస్‌ గెలిచి తొలుత బ్యాటింగ్‌కు దిగిన జింబాబ్వేకు భారత బౌలర్లు ఆరంభంలోనే షాకిచ్చారు. రెండో ఓవర్‌లో సయాలి సట్ఘరే.. లోరిన్‌ ఫిరీని డకౌట్‌గా వెనక్కి పంపింది. ఆ తర్వాతి ఓవర్‌లోనే క్రాంతి గౌడ్‌.. చిపో ముగేరి తిరిపానో (4)ను పెవిలియన్‌కు చేర్చింది. మరోవైపు బెలవ్డ్‌ బిజా 16 బంతులు ఎదుర్కొని ఒక్క పరుగు మాత్రమే చేసి ఔటైంది. దీంతో జింబాబ్వే స్వల్ప స్కోరుకే మూడు వికెట్లు కోల్పోయి కష్టాల్లో పడింది. వరుసగా వికెట్లు కోల్పోతున్న జట్టును మోడెస్టర్‌ ముపచిక్వా (37), కెప్టెన్‌ జోసెఫిన్‌ న్కోమో (35) ఆదుకునే ప్రయత్నం చేశారు. వీరిద్దరూ నాలుగో వికెట్‌కు 27 పరుగులు జోడించారు. క్రీజులో నిలదొక్కుకుని పరుగులు రాబట్టేందుకు ప్రయత్నించినా భారత బౌలర్లు ఒత్తిడి పెంచారు. చియెడ్జా ధురురు (20) కొంతసేపు పోరాడగా, న్యాషా గ్వాంజురా (10) మాత్రమే రెండంకెల స్కోరు చేసిన మరో బ్యాటర్‌గా నిలిచింది. మిగతా బ్యాటర్లు విఫలమవడంతో జింబాబ్వే భారీ స్కోరు సాధించలేకపోయింది.

వైష్ణవి కెరీర్‌లో తొలి ఫైవర్‌

భారత పేసర్లు ఆరంభంలోనే ప్రత్యర్థిని దెబ్బతీయగా.. వైష్ణవి శర్మ మధ్య, చివరి ఓవర్లలో తన స్పిన్‌ బౌలింగ్‌తో చెలరేగింది. వరుసగా వికెట్లు తీస్తూ జింబాబ్వే కోలుకునే అవకాశమే ఇవ్వలేదు. మొత్తం 39 పరుగులు ఇచ్చి ఐదు వికెట్లు పడగొట్టి అంతర్జాతీయ క్రికెట్‌లో తన తొలి ఐదు వికెట్ల ప్రదర్శన (Five-wicket haul) నమోదు చేసింది. సయాలి, క్రాంతి కూడా కీలక సమయాల్లో వికెట్లు తీయడంతో జింబాబ్వే ఇన్నింగ్స్‌ 131 పరుగుల వద్ద ముగిసింది.

క్లీన్‌స్వీప్‌పై భారత్‌ గురి

మూడో వన్డేకు ముందు జింబాబ్వేను స్వల్ప స్కోరుకే కట్టడి చేయాలని భారత కెప్టెన్‌ స్మృతి మంధాన ఆకాంక్షించింది. బౌలర్లు సమష్టిగా రాణించడంతో ఆ లక్ష్యం నెరవేరింది. ఇప్పుడు 132 పరుగుల లక్ష్యాన్ని ఛేదిస్తే మూడు మ్యాచ్‌ల వన్డే సిరీస్‌ను భారత్‌ క్లీన్‌స్వీప్ చేయ‌నుంది.