అందుకే.. బీజేపీ 240 సీట్ల‌కే ప‌రిమిత‌మైంది: సీఎం రేవంత్ రెడ్డి

అందుకే.. బీజేపీ 240 సీట్లకే పరిమితమైంది: సీఎం రేవంత్ రెడ్డి త్రినేత్ర.న్యూస్ : "SIR (ప్రత్యేక ఓటర్ల జాబితా సవరణ) పేరుతో తొలుత ఓటర్ కార్డు తొలగిస్తారు.. తర్వాత ఆధార్ కార్డ్, రేషన్ కార్డ్ తొలగిస్తారు.. వాళ్లకున్న హక్కులన్నీ గుంజుకుంటారు. అందుకే అందరం కలిసి SIRకు వ్యతిరేకంగా పోరాడదాం" అంటూ సీఎం రేవంత్ రెడ్డి పిలుపునిచ్చారు. SIR పేరుతో ప్రతిపక్షాలు ఓడిపోయేలా, తాము మాత్రమే గెలిచేలా బీజేపీ ప్రభుత్వం అధికారం ముసుగులో అరాచకం చేస్తున్నదంటూ.. ఆదివారం (2025 డిసెంబర్ 14) కాంగ్రెస్ పార్టీ ఢిల్లీలోని రామ్లీలా మైదానంలో భారీ ర్యాలీ, సభ నిర్వహించింది. ఈ కార్యక్రమంలో లోక్సభ ప్రతిపక్ష నేత రాహుల్ గాంధీ, కాంగ్రెస్ పార్టీ అధ్యక్షుడు మల్లికార్జున ఖర్గే, కర్ణాటక డిప్యూటీ సీఎం డీకే శివకుమార్, ఎంపీ ప్రియాంకగాంధీ తదితరులు పాల్గొన్నారు. ఈ సందర్భంగా సీఎం రేవంత్రెడ్డి మాట్లాడుతూ.. "మహాత్మా గాంధీ, అంబేడ్కర్ రాజ్యాంగ రచన సమయంలో రాజ్యాంగ సభలో.... దళితులు, ఆదివాసీలు, మైనార్టీలు, పేదలకు ఓటు హక్కు విషయమై చర్చిస్తున్నప్పుడు ఆర్ఎస్ఎస్ నేతలు గోల్వాల్కర్ తదితరులు వారికి ఓటు హక్కు ఇవ్వవద్దన్నారు. కానీ... గాంధీ, అంబేద్కర్ వారికి ఓటు హక్కు కల్పించినందున ఈ దేశంలో ప్రభుత్వం ఏర్పాటులో వాళ్లు భాగస్వాములవుతున్నారు ఆర్ఎస్ఎస్, గోల్వాల్కర్ భావజాలంతో ఉన్న నరేంద్ర మోదీ, అమిత్ షా ప్రభుత్వం ఏర్పాటు చేసిన తర్వాత వారి భావజాలాన్ని అమలుచేసేందుకు 400 సీట్లు కావాలని కోరుకున్నారు. కానీ బీజేపీకి 400 సీట్లు ఇస్తే రాజ్యాంగాన్ని మారుస్తారని, రిజర్వేషన్లు ఎత్తివేస్తారని రాహుల్ గాంధీ చెప్పడంతోనే దేశ ప్రజలు బీజేపీని 240 సీట్లకు పరిమితం చేశారు.. అలా చేయబట్టే ఇవ్వాళ రాజ్యాంగం.. రిజర్వేషన్లు ఉన్నాయి.. అందుకే ఇప్పుడు SIR పేరుతో ప్రయత్నాలు చేస్తున్నారు.నాడు పేదలు, దళితులు, ఆదివాసులు, మైనారిటీల కోసం గాంధీ, అంబేద్కర్ నిలబడినట్లే ఇప్పుడు రాహుల్ గాంధీ, మల్లికార్జున్ ఖర్గే నిలుస్తున్నారు.. మనం వారికి అండగా నిలవాలి.SIR పేరుతో తొలుత ఓటర్ కార్డు తొలగిస్తారు.. తర్వాత ఆధార్ కార్డ్, రేషన్ కార్డ్ తొలగిస్తారు.. వాళ్లకున్న హక్కులన్నీ గుంజుకుంటారు.ఈ సమస్య ఎన్నికలదో… కాంగ్రెస్ పార్టీ దో కాదు దేశ సమస్య.. ఈ సమస్యకు వ్యతిరేకంగా రాహుల్ గాంధీ చేసే పోరాటంలో కలిసి సాగేందుకు తెలంగాణ సిద్ధంగా ఉంది.. దేశ ప్రజలంతా కలిసి రావాలని కోరుతున్నా" అని రేవంత్ రెడ్డి కోరారు.