Legal notice to KCR | కేసీఆర్ కు లీగ‌ల్ నోటీస్.. 48 గంట‌ల్లో క్ష‌మాప‌ణ చెప్పాల‌న్న మంత్రి సీతక్క

త్రినేత్ర‌.న్యూస్‌: బీఆర్ఎస్ అధినేత కేసీఆర్‌(KCR)కు మంత్రి సీత‌క్క (Seethakka) లీగ‌ల్ నోటీసులు (legal Notice) పంపారు. అంగన్వాడి మొబైల్ ఫోన్ల కొనుగోలు విషయంలో రూ.30 కోట్ల అవినీతి జ‌రిగింద‌ని త‌న‌పై నిరాధార ఆరోపణలు చేస్తున్నార‌ని మండిపడ్డారు. తన ప్రతిష్టకు బీఆర్ఎస్ పార్టీ సోష‌ల్‌మీడియా భంగం క‌ల‌గ‌జేస్తుంద‌ని.. దీనికి కేసీఆర్ బాధ్య‌త వ‌హించాల‌న్నారు. 48 గంట‌ల్లో పోస్టులు తొల‌గించి కేసీఆర్ క్ష‌మాప‌ణ చెప్పాల‌ని డిమాండ్ చేశారు. లేదంటే సివిల్, క్రిమినల్ చర్యల‌కు వెన‌కాడ‌న‌ని లీగల్ నోటీసులో సీతక్క హెచ్చ‌రించారు.

బీఆర్ఎస్ పార్టీ అఫీషియల్ సోషల్ మీడియాలో జరుగుతున్న దుష్ప్రచారానికి మాజీ సీఎం కేసీఆరే బాధ్యత వహించాలని డిమాండ్ చేశారు. ఈమేర‌కు రిజిస్టర్ పోస్టు ద్వారా కేసీఆర్‌కు న్యాయ‌వాది నాగులూరి కృష్ణ కుమార్ ద్వారా లీగల్ నోటీస్ పంపినట్లు సీతక్క వివ‌రించారు.

అంగన్వాడీ మొబైల్ ఫోన్ల కొనుగోలు ప్రక్రియను తెలంగాణ టెక్నాలజీ సర్వీసెస్ లిమిటెడ్ నిర్వహించిందని సీతక్క తెలిపారు. టెండర్ ఇవాల్యుయేషన్ కమిటీ నిర్ణయాల ప్రకారం కాంట్రాక్ట్ ఇచ్చామ‌ని, ఇందులో తనకు ఎలాంటి సంబంధం లేదని ఆమె నోటీసులో స్పష్టం చేశారు. మొత్తం టెండర్ విలువ రూ. 44 కోట్లే ఉన్నప్పటికీ, అందులో రూ. 30 కోట్ల అవినీతి జరిగిందని చెప్పడం అసంబద్ధం, ఆధారాలు లేని ఆరోపణల‌ని పేర్కొన్నారు. తన ప్రతిష్టను దెబ్బతీసేలా కుట్రపూరితంగా వ్యవహరిస్తున్నారని ఆరోపించారు.