రెండేళ్ల మార్పు ఎట్లుంది? ఆటోడ్రైవ‌ర్ల‌తో కేటీఆర్‌

రెండేళ్ల మార్పు ఎట్లుంది? ఆటోడ్రైవర్లతో కేటీఆర్ త్రినేత్ర.న్యూస్ : తెలంగాణలో మార్పు పేరుతో 420 మోసపూరిత హామీలతో గద్దెనెక్కిన కాంగ్రెస్ ప్రభుత్వం ఇప్పుడు విశ్వసనీయత కోల్పోయిందని బీఆర్ ఎస్ వర్కింగ్ ప్రెసిడెంట్ కేటీఆర్ అన్నారు. జనమంతా..మళ్లీ కేసీఆర్ను అధికారంలోకి తెచ్చుకునే దిశగా ఆలోచిస్తున్నారని చెప్పారు. రాజన్న సిరిసిల్ల జిల్లా బీఆర్ఎస్ పార్టీ కార్యాలయంలో ఆటో డ్రైవర్లకు ఆత్మీయ భరోసా కార్యక్రమంలో భాగంగా ఇన్సూరెన్స్ (ప్రమాద బీమా) బాండ్ల పంపిణీ కార్యక్రమంలో ఆయన పాల్గొన్నారు. ఈ సందర్భంగా ఆయన మాట్లాడుతూ "కేసీఆర్ దీక్ష సమయంలో ఉద్యమంలో పాల్గొన్న సబ్బండ వర్గాల్లో ఆటోడ్రైవర్ లు కూడా ముందుండి పోరాడారు. తెలంగాణ ఉద్యమంలో వారి పాత్ర మరవరానిది. రెండేళ్ళలో మార్పు మార్పు అంటూ మోసం ఎలా ఉంటుందో అందరికీ తెలిసొచ్చింది. అందరికన్నా ముఖ్యంగా ..బతుకులు ఆగమైన ఆటోడ్రైవర్లకు అర్థం అయి ఉంటుంది. హైదరాబాద్లో మష్రత్ అలీ అనే ఆయనకు రెండు ఆటోలు ఉండె. ఆయన ఆటోలోనే ఎక్కి రాహుల్ గాంధీ హామీలు ఇచ్చిండు . ఇప్పుడు రేవంత్ పాలన దెబ్బకు మష్రత్ అలీ రెండు ఆటోలు అమ్ముకుని, కిరాయి ఆటో నడుపుకుంటుండు. అధికారం దక్కించుకునేందుకు సీఎం రేవంత్ రెడ్డి ఇచ్చిన హామీ ప్రకారం ... నెలకు వెయ్యి రూపాయల భృతి చొప్పున, రాష్ట్రంలో ఆటో డ్రైవర్లకు రెండేళ్లకు రూ. 1560 కోట్లు అప్పు పడి ఉన్నారు. ఆగమైన ఆటో డ్రైవర్ల కోసం ..ఆటో డ్రైవర్ల సంక్షేమ బోర్డు పెట్టుకుంటే మంచిది. అసెంబ్లీ సమావేశాల వరకు ఆటో డ్రైవర్ల సంక్షేమ బోర్డుపెట్టకుంటే, హైదరాబాద్ లో మహాధర్నా చేద్దాం. కాంగ్రెసోడు ఊరికే ఇవ్వడు, గల్లా పట్టి అడిగితేనే ఇస్తాడు. ఆత్మహత్య చేసుకున్న ఆటో డ్రైవర్లకు పది లక్షల రూపాయల నష్టపరిహారం ఇవ్వాలి. కేసీఆర్ సీఎంగా ఉన్నప్పుడు అన్ని వర్గాల సంక్షేమం ఆలోచించారు. దేశంలో రైతులకు బీమా ఇచ్చిన నాయకుడు కేసీఆర్ ఒక్కడే. గీతన్నలకు, నేతన్నలకు బీమా ఇచ్చిన నాయకుడు కార్మిక పక్షపాతి కేసీఆర్. ఈ ప్రభుత్వం రాగానే కేసీఆర్ పథకాలను ఎత్తేసింది. పైగా రైతులకు రుణమాఫీ చేశామని దేవుళ్ళపై అబద్ధపు ఒట్లు పెడుతున్నారు. 420 హామీలు ఇచ్చి రాష్ట్రంలో అందరిని మోసం చేశారు" అని చెప్పారు. కాగా సిరిసిల్ల జిల్లాలో అన్నిరకాల వాహనాల డ్రైవర్లకు సంక్రాంతి వరకు బీమా కల్పిస్తానని, ఉచిత వైద్యం అందించే ప్రయత్నం చేస్తానని కేటీఆర్ హామీ ఇచ్చారు. ♦️