అచ్చం అహోబిలంలా తీర్చిదిద్దాల‌నుకున్నారు..కానీ అంతలోనే

అచ్చం అహోబిలంలా తీర్చిదిద్దాలనుకున్నారు..కానీ అంతలోనే త్రినేత్ర.న్యూస్: కొండల మధ్య ప్రకృతి ఒడిలో ఓ చక్కటి నృసింహుడి ఆలయం కట్టడం ఆ కుటుంబానికో కల. ఓ గుడి ఉండాలి, అక్కడ నిత్యం భజనలు, కీర్తనలు, సత్సంగ్లు జరుగుతూ ఉండాలి, ఇది వారి సంకల్పం. అంతే కాదు. ఆ కట్టడం అచ్చం అహోబిల నృసింహ ఆలయాన్ని తలపించేలా నిర్మించాలి. అలా హరేకృష్ణ మూవ్మెంట్ సృష్టికర్త స్వామి ప్రభుపాదకు నివాళి అర్పించాలి. ఇది వారి తపన. అన్ని పనులు చకచకా సాగిపోతూ ఉన్నాయి. కానీ హఠాత్తుగా ...నిర్మాణంలో ఉన్న ఆలయం కుప్పకూలి ఆలయ సృష్టికర్త కూడా ఆ శిథిలాల మధ్య విగత జీవిగా మిగిలిపోయాడు. ఆ కల ..కలగానే మిగిలిపోయింది. ఆయన దేహంతోనే తపన కూడా చాలించింది. దక్షిణాఫ్రికాలోని డర్బన్ ప్రాంతంలోని రెడ్క్లిఫ్ వద్ద వెరులం గ్రామంలో శుక్రవారం (2025 డిసెంబరు 11న) జరిగిన ఈ ఘటనలో ఆలయ నిర్మాతతో పాటు మరో ముగ్గురు మరణించారు. పదిమందికి పైగా గాయపడ్డారు. కొండపై నృసింహుడు కొలువు దీరేలా భారత సంతతికి చెందిన విక్ పాండే, వీరేశ్ పాండే అన్నదమ్ములు. దక్షిణాఫ్రికాలోని డర్బన్ వద్ద రెడ్క్లిఫ్ ప్రాంతంలో వెరులం అనే గ్రామంలో స్థిరపడ్డారు. అక్కడే వెరులం ఎకో విలేజ్ పేరుతో గతకొన్నేళ్లుగా ఆధ్యాత్మిక కార్యక్రమాలు నిర్వహిస్తున్నారు. హరేకృష్ణ మూవ్మెంట్ వ్యవస్థాపకులైన స్వామి ప్రభుపాదకు భక్తులు. నృసింహస్వామి వారికి ఆరాధ్య దైవం. అహోబిలంలోని నవనారసింహ ఆలయాన్ని సందర్శించి..అచ్చం అలాంటి నమూనాలోనే వెరులం గ్రామంలో ఓ చక్కటి నృసింహ ఆలయాన్ని నిర్మించాలన్నది వారి సంకల్పం. స్థానికంగా నేరాలు ఎక్కువ సంఖ్యలో జరుగుతూ ఉండడంతో వాటన్నింటి నుంచి రక్షణ అందేలా నృసింహుడి ఆలయాన్ని నిర్మించడం ప్రారంభించారు. అహోబిల టెంపుల్ ఆఫ్ ప్రొటెక్షన్ అని కూడా పేరు పెట్టారు. గత ఏడాది నుంచి.. నాలుగంతస్తుల్లో నిర్మాణం జరుగుతూ వస్తున్నది. అయితే శుక్రవారం హఠాత్తుగా ఆలయంపై కాంక్రీట్ వేస్తుండగా ఒక్కసారిగా ఆలయం కుప్పకూలిపోయింది. ఈ ప్రమాదంలో విక్ పాండే అక్కడికక్కడే మరణించారు. ఇదే సమయంలో ఆలయానికి మెట్లెక్కుతూ వచ్చిన మరో వ్యక్తి ఈ ప్రమాద ఘటన జరగగానే గుండెపోటు వచ్చి హఠాన్మరణం చెందారు. మరో ఇద్దరు కూడా మరణించారు. ఆ నిర్మాణానికి అనుమతులు లేవు ఈ ఆలయం నిర్మాణం జరుగుతున్న ప్రాంతం అక్కడి EThekwini మున్సిపాలిటీ పరిధిలోకి వస్తుంది. స్థానిక మేయర్ సిరిల్ సాబా ప్రకటన ప్రకారం ఈ నిర్మాణానికి అసలు ఎలాంటి అనుమతులు లేవని తెలుస్తున్నది. అయితే ప్రమాదం ఎందుకు జరిగిందో స్పష్టమైన కారణాలు తెలియరాలేదు. (ఫొటోలు ప్రమాదం జరిగిన ప్రదేశం, కొనసాగుతున్న సహాయక చర్యలు)