Akhilesh Yadav | రామేశ్వరం కేఫ్‌లో అఖిలేష్ యాదవ్, కేటీఆర్ భోజనం

Akhilesh Yadav | హైద‌రాబాద్ (Hyderabad) ప‌ర్య‌ట‌న‌లో ఉన్న స‌మాజ్‌వాదీ పార్టీ (Samajwadi Party) అధ్య‌క్షుడు, ఉత్త‌ర్‌ప్ర‌దేశ్ మాజీ ముఖ్య‌మంత్రి (CM) అఖిలేష్ యాద‌వ్ (Akhilesh Yadav) బీఆర్ఎస్ (BRS) పార్టీ కార్య‌నిర్వాహ‌క అధ్య‌క్షుడు కేటీఆర్‌ (KTR)తో క‌లిసి రామేశ్వ‌రం కేఫ్‌ (Rameshwaram Cafe)లో మ‌ధ్యాహ్న భోజ‌నం చేశారు. నగరంలో ఎంతో ఆదరణ పొందిన రామేశ్వరం కేఫ్ రుచుల గురించి, అక్కడ లభించే ప్రత్యేకమైన టిఫిన్స్ గురించి తెలుసుకున్న అఖిలేష్ యాదవ్ ఆసక్తి కనబరచడంతో, కేటీఆర్ అక్కడే మధ్యాహ్న భోజన ఏర్పాట్లు చేశారు. సరదాగా సాగిన ఈ విందులో ఇరువురు నేతలు దక్షిణాది రుచులను ఆస్వాదిస్తూనే.. పలు రాజకీయ, సమకాలీన అంశాలపై కాసేపు ముచ్చటించారు. అనంత‌రం వారిరువురూ మాజీ మంత్రి తలసాని శ్రీనివాస్ యాదవ్ నివాసానికి చేరుకున్నారు.

వీరి రాక సందర్భంగా రామేశ్వరం కేఫ్ యజమాని శరత్ ఇరువురు నేతలకు ఘన స్వాగతం పలికి తగిన ఏర్పాట్లు చేశారు. అక్కడి వంటకాలను రుచి చూసిన అఖిలేష్ యాదవ్.. వాటి నాణ్యతను, రుచిని ప్రత్యేకంగా మెచ్చుకున్నారు. హైదరాబాద్‌లోనూ రామేశ్వరం కేఫ్‌ను ఇంత విజయవంతంగా నడుపుతుండటం పట్ల యజమాని శరత్‌కు, ఆయన కుటుంబ సభ్యులకు అఖిలేష్ యాదవ్ శుభాకాంక్షలు తెలిపారు.