House Husbands New Normal | హోమ్‌మేకర్ కేవలం మహిళలకే ఎందుకు.. ‘హౌస్ హజ్బెండ్స్’ ట్రెండ్ రావాలి

• మద్రాస్ హైకోర్టు సంచలన వ్యాఖ్యలు

House Husbands New Normal | త్రినేత్ర.న్యూస్ : సమాజంలో వివాహ బంధాలు, కుటుంబ వ్యవస్థ బలంగా నిలబడాలంటే పురుషులు కూడా ఇంటి బాధ్యతలు స్వీకరించాలని మద్రాస్ హైకోర్టు ఆసక్తికర వ్యాఖ్యలు చేసింది. ‘హోమ్‌మేకర్’ అనే పదం కేవలం మహిళలకే కాదని, పురుషులకూ వర్తిస్తుందని ధర్మాసనం స్పష్టం చేసింది. వివాహాలు విజయవంతం కావడానికి మగవారు ఇంటిపనిని బాధ్యతగా తీసుకునే 'హౌస్ హజ్బెండ్' (House Husband) సంస్కృతి సమాజంలో సాధారణ అంశంగా (New Normal) మారాల్సిన అవసరం ఉందని న్యాయస్థానం అభిప్రాయపడింది.

ఒక డాక్టర్ దంపతులు పరస్పర అంగీకారంతో కోరిన విడాకుల అప్పీల్‌ను విచారించిన సందర్భంగా జస్టిస్ జి.ఆర్. స్వామినాథన్, జస్టిస్ ఎం.డి. సుమతిలతో కూడిన ద్విసభ్య ధర్మాసనం ఈ కీలక పరిశీలనలు చేసింది.

సంపాదనతో సమానంగా ఇంటి పనికి గౌరవం

గత యాభై ఏళ్లుగా కుటుంబాల రూపురేఖల్లో విప్లవాత్మక మార్పులు వచ్చాయని ధర్మాసనం పేర్కొంది. ఒకప్పుడు భర్త సంపాదించడం, భార్య ఇంటిని చక్కబెట్టడం సర్వసాధారణంగా ఉండేదని.. కానీ ఇప్పుడు మహిళలు కూడా కెరీర్‌ను ప్రధాన లక్ష్యంగా ఎంచుకుంటున్నారని కోర్టు ప్రస్తావించింది. బయటకెళ్లి డబ్బు సంపాదించడాన్ని ఎంతలా గౌరవిస్తామో, కుటుంబం కోసం ఇంట్లో ఉండి చేసే పనికి కూడా అదే స్థాయి గౌరవం దక్కాలని న్యాయమూర్తులు పేర్కొన్నారు.

పాశ్చాత్య సమాజాల్లో వ్యక్తికే ప్రాధాన్యత ఉంటుందని, అయితే భారతీయ సంస్కృతిలో కుటుంబమే ప్రాథమిక మూలస్తంభమని ధర్మాసనం గుర్తుచేసింది.

కెరీర్ ఒత్తిళ్లు.. పెరుగుతున్న అవివాహిత మహిళలు

ముఖ్యంగా ఐటీ (IT) సహా ఇతర ప్రొఫెషనల్ రంగాల్లో పనిచేసే మహిళలకు వృత్తిగత ఆశయాలు, వైవాహిక జీవితాన్ని సమన్వయం చేసుకోవడం కష్టతరంగా మారుతోందని న్యాయస్థానం ఆందోళన వ్యక్తం చేసింది.

"ఉద్యోగం చేసే మహిళలకు పెళ్లి అనేది అన్ని సందర్భాల్లోనూ సుఖసంతోషాలను ఇచ్చేలా ఉండటం లేదు. తమ కెరీర్‌కు వివాహం ఒక అడ్డంకిగా మారుతోందని భావించి చాలామంది మహిళలు అసలు పెళ్లే వద్దనుకుంటున్నారు. అందుకే అవివాహిత మహిళల సంఖ్య పెరుగుతోంది. ఈ సమస్యకు పరిష్కారం లభించాలంటే.. భర్తలే స్వచ్ఛందంగా గృహ బాధ్యతలను స్వీకరించి 'హౌస్ హజ్బెండ్స్'గా మారాలి" అని ధర్మాసనం సూచించింది. భర్త ఇంటి పనులను చూసుకుంటే, మహిళలు మానసిక ఒత్తిడి లేకుండా తమ కెరీర్‌పై దృష్టి పెట్టే వీలుంటుందని తెలిపింది.

‘జస్ట్ హౌస్ వైఫ్’ అని బిడియపడొద్దు

గృహిణుల గురించి సమాజంలో మారిన దృక్పథాన్ని కూడా న్యాయమూర్తులు ప్రస్తావించారు. గతంలో మహిళలు తాము గృహిణులమని గర్వంగా చెప్పుకునేవారని, కానీ నేటి రోజుల్లో చాలామంది బిడియపడుతూ "జస్ట్ హౌస్‌వైఫ్" అంటున్నారని ధర్మాసనం విచారం వ్యక్తం చేసింది. ఇంటిని నడపడం ఏమాత్రం చిన్న విషయమేమీ కాదని, ఇళ్లలో ఉండే మహిళలు ఎంతమాత్రం తీసిపోరని స్పష్టం చేసింది.

డాక్టర్ దంపతులకు విడాకులు మంజూరు

పరస్పర విభేదాల కారణంగా విడిపోవాలని నిర్ణయించుకున్న వైద్య దంపతుల కేసును ఫ్యామిలీ కోర్టు గతంలో తిరస్కరించింది. ఇద్దరినీ అసంతృప్తికి గురిచేసిన ఆ తీర్పును సవాలు చేస్తూ దంపతులు హైకోర్టును ఆశ్రయించారు. వారి మధ్య బంధం మళ్లీ కలవలేనంతగా దెబ్బతిన్నదని నిర్ధారించిన హైకోర్టు.. పరస్పర అంగీకారంతో కూడిన విడాకులను మంజూరు చేసింది. అయితే భర్త కోర్టుకు హామీ ఇచ్చిన ఆర్థిక పరిహార బాధ్యతలను పూర్తిగా నెరవేర్చిన తర్వాతే ఈ విడాకుల డిక్రీ పూర్తిస్థాయిలో అమల్లోకి వస్తుందని ధర్మాసనం తన తీర్పులో స్పష్టం చేసింది.