Vande Mataram Controversy 2026 | వందేమాతరంపై సుప్రీంకోర్టు కీలక ఆదేశాలు: వివాదాస్పద పిటిషన్లపై కేంద్రానికి నోటీసులు

Vande Mataram Controversy 2026 | త్రినేత్ర న్యూస్ : ఆరు చరణాల 'వందేమాతరం' గేయాన్ని తప్పనిసరి చేస్తూ కేంద్ర ప్రభుత్వం ఇచ్చిన ఆదేశాలను సవాలు చేస్తూ దాఖలైన పిటిషన్లపై సుప్రీంకోర్టు కీలక ఆదేశాలు జారీ చేసింది. దీనిపై పూర్తి వివరణ ఇవ్వాలని కోరుతూ కేంద్ర ప్రభుత్వానికి అత్యున్నత న్యాయస్థానం నోటీసులు జారీ చేసింది. భారత ప్రధాన న్యాయమూర్తి (CJI) జస్టిస్ సూర్యకాంత్ నేతృత్వంలోని ధర్మాసనం ఈ పిటిషన్లపై విచారణ చేపట్టింది.

ఫూలే-అంబేద్కర్ వాది బి.డి. బోర్కర్, కేరళ మాజీ ఐఏఎస్ అధికారి బాలకృష్ణన్ సత్యభామ మావోజీలు ఈ రెండు వేర్వేరు పిటిషన్లను దాఖలు చేశారు. ఆరు చరణాలతో కూడిన వందేమాతరం దేశంలో మతపరమైన విభజనకు దారితీస్తుందని, ఇది రాజ్యాంగం కల్పించిన ప్రాథమిక హక్కులను ఉల్లంఘించడమేనని పిటిషనర్లు తమ వాదనలో పేర్కొన్నారు.

పిటిషనర్ల ప్రధాన అభ్యంతరాలు ఏంటి?

పిటిషనర్ల తరఫున ప్రముఖ న్యాయనిపుణుడు, న్యాయవాది మోహన్ గోపాల్ వాదనలు వినిపించారు. ఈ ఏడాది జనవరి 28, జూలై 9 తేదీల్లో ప్రభుత్వం జారీ చేసిన వరుస ఉత్తర్వులు మైనారిటీల మతపరమైన భావాలను దెబ్బతీసేలా ఉన్నాయని, దేశంలో మత సామరస్యానికి విఘాతం కలిగిస్తాయని ఆయన పేర్కొన్నారు.

ఆనందమఠం వెర్షన్‌పై అభ్యంతరం: బంకించంద్ర ఛటర్జీ రాసిన 'ఆనందమఠం' నవలలోని ఆరు చరణాల వెర్షన్ ఒక నిర్దిష్ట సమాజ ఆధిపత్యాన్ని చాటుతూ, ఇతర వర్గాలలో విభేదాలు పెంచేలా ఉందని బోర్కర్ ఆరోపించారు.

79 ఏళ్ల సంప్రదాయం: స్వాతంత్య్రం వచ్చిన నాటి నుంచి 2026లో ఈ కొత్త ఆదేశాలు వచ్చే వరకు కేంద్ర, రాష్ట్ర ప్రభుత్వాలు, విద్యాసంస్థలు కేవలం మొదటి రెండు చరణాల వందేమాతరాన్ని మాత్రమే పాడుతున్నాయని గుర్తుచేశారు.

ప్రకృతి ఆరాధన: మొదటి రెండు చరణాలు కేవలం మాతృభూమి సహజ సౌందర్యాన్ని, ప్రకృతిని కీర్తించేవిగా మాత్రమే ఉన్నాయని, వాటిలో ఎలాంటి నిర్దిష్ట దేవతా ఆరాధన లేదని పిటిషన్‌లో స్పష్టం చేశారు.

బలవంతం చేయకూడదన్న పిటిషనర్లు

ప్రభుత్వం జారీ చేసిన ఆ రెండు వివాదాస్పద జీవోలను రద్దు చేయాలని పిటిషనర్లు కోర్టును కోరారు. ముఖ్యంగా పాఠశాల విద్యార్థులతో పాటు పౌరులెవరూ ఆరు చరణాల పూర్తి గేయాన్ని పాడాలని ఒత్తిడి చేయకుండా ఆదేశాలు ఇవ్వాలని విజ్ఞప్తి చేశారు. బంకించంద్ర తొలినాళ్లలో రాసిన రెండు చరణాల వెర్షన్‌ను మాత్రమే అధికారిక జాతీయ గేయంగా పరిగణించాలని సూచించారు.

గతంలో కర్ణాటక అసెంబ్లీ, కౌన్సిల్ సమావేశాల్లో రెండు చరణాల తర్వాత గేయాన్ని ముగించగా.. బీజేపీ సభ్యులు పూర్తి వెర్షన్ పాడటం చర్చనీయాంశమైన సంగతి తెలిసిందే. అలాగే స్వాతంత్య్ర దినోత్సవం సందర్భంగా రాష్ట్రపతి ద్రౌపది ముర్ము ప్రసంగానికి ముందు, తర్వాత కూడా పూర్తి వందేమాతరాన్ని ఆలపించారు.

కాగా, గతంలో కర్ణాటక సంగీత విద్వాంసుడు టి.ఎం. కృష్ణ దాఖలు చేసిన పిటిషన్ విచారణ సందర్భంగా సుప్రీంకోర్టు కీలక వ్యాఖ్యలు చేసింది. ఒక ప్రజాస్వామ్య ప్రభుత్వం జాతీయ గేయం నిడివిని నిర్ణయించవచ్చేమో కానీ, దానిని పాడాలని పౌరులను ఏ పరిస్థితుల్లోనూ శిక్షార్హమైన చట్టాల ద్వారా బలవంతం చేయలేదని ధర్మాసనం స్పష్టం చేసింది. 1986 నాటి ప్రసిద్ధ 'బిజో ఇమ్మాన్యుయేల్ వర్సెస్ కేరళ' కేసు తీర్పును ప్రస్తావిస్తూ.. మత స్వేచ్ఛ, రాజ్యాంగ సహనం అత్యంత ప్రధానమని గుర్తుచేసింది.