Supreme Court | ఫారం-6లో మార్పుల‌పై పిటిష‌న్‌.. ఈసీకి సుప్రీంకోర్టు నోటీసులు

Supreme Court | త్రినేత్ర న్యూస్ : స‌ర్‌ (SIR) అమలు సమయంలో సుప్రీంకోర్టు (Supreme Court) అనుమతి లేకుండానే ఫారం 6లో మార్పులు చేశారంటూ రాజ్యసభ ఎంపీ డోలా సేన్ దాఖలు చేసిన పిటిషన్‌పై సుప్రీంకోర్టు ఇవాళ విచార‌ణ జ‌రిపింది. ఈ సంద‌ర్భంగా ఎంపీ డోలా సేన్ త‌ర‌ఫున సీనియ‌ర్ న్యాయ‌వాది మేన‌కా గురుస్వామి వాద‌న‌లు వినిపించారు.

ఫారం 6లో చేసిన మార్పుల‌ను సుప్రీంకోర్టు ఆమోదించింద‌ని ఎన్నిక‌ల సంఘం త‌ప్పుడు ప్రెస్‌నోట్ విడుద‌ల చేసింద‌ని ధ‌ర్మాస‌నం దృష్టికి తీసుకొచ్చారు. తాము అలాంటి ఉత్త‌ర్వులు ఏమీ ఇవ్వ‌లేదంటూ సుప్రీంకోర్టు గ‌తంలో స్ప‌ష్టం చేసిన విష‌యాన్ని ప్ర‌స్తావించారు. స్పందించిన ప్రధాన న్యాయమూర్తి (సీజేఐ) సూర్య కాంత్, జస్టిస్‌ జాయ్‌మల్య బాగ్చి, జస్టిస్‌ వి. మోహనాలతో కూడిన ధర్మాసనం ఈ అంశాన్ని ప‌రిశీలిస్తామ‌ని స్ప‌ష్టం చేసింది. ఈ మేర‌కు ఎన్నిక‌ల సంఘానికి నోటీసులు జారీ చేసింది.

అదేవిధంగా ప్రధాన ఎన్నికల కమిషనర్ జ్ఞానేష్ కుమార్ (CEC Gyanesh Kumar) వ్యవహారశైలి, ఓటర్ల జాబితాల ప్రత్యేక సమగ్ర సవరణ (SIR) ప్ర‌క్రియ‌లో ఎన్నిక‌ల సంఘం తీసుకున్న నిర్ణ‌యాల‌ను స‌వాల్ చేస్తూ దాఖ‌లైన పిటిష‌న్ల‌పైనా సుప్రీం ధ‌ర్మాస‌నం విచార‌ణ చేప‌ట్టింది. స‌ర్ ప్ర‌క్రియ‌ను స‌మ‌ర్థిస్తూ ఎన్నిక‌ల సంఘం దాఖ‌లు చేసిన అఫిడ‌విట్‌కు కౌంట‌ర్ దాఖ‌లు చేసేందుకు పిటిష‌న‌ర్ల‌కు 10 రోజుల గ‌డువు ఇచ్చింది. ఈ వ్యవహారానికి సంబంధించిన అన్ని అంశాలను పరిశీలిస్తామని ప్రధాన న్యాయమూర్తి స్పష్టం చేశారు. అనంత‌రం అన్ని పిటిష‌న్ల‌పై విచార‌ణ‌ను న‌వంబ‌ర్ 17కు వాయిదా వేశారు.

Also Read..

న్యూస్‌రూమ్‌లు మూతపడతాయి.. DPDP చ‌ట్టాన్ని స‌వాల్ చేస్తూ సుప్రీంకోర్టును ఆశ్ర‌యించిన మీడియా సంస్థ‌లు

గర్భిణీ జర్నలిస్టును తోసేశారంటూ ఆరోప‌ణ‌లు.. రాహుల్ గాంధీకి సుప్రీంకోర్టు నోటీసులు

‘సత్యం శివం సుందరం’.. రాహుల్ గాంధీ ఆస‌క్తిక‌ర పోస్టు