TMC Leader Asish Banerjee Dead | బెంగాల్‌లో కలకలం: టీఎంసీ కార్యాలయంలోనే మమతా బెనర్జీ సన్నిహితుడి అనుమానాస్పద మృతి

• బీర్భూమ్ జిల్లా రాంపూర్‌హాట్‌లోని టీఎంసీ ఆఫీసులో ఆశిష్ బెనర్జీ మృతదేహం లభ్యం
• కార్యాలయంలో ఉరివేసుకున్న స్థితిలో కనిపించిన మాజీ డిప్యూటీ స్పీకర్
• ఈయన మమతా బెనర్జీకి అత్యంత సన్నిహితుడు, రాంపూర్‌హాట్ నుంచి ఐదుసార్లు ఎమ్మెల్యే
• ఇటీవలి 2026 ఎన్నికల్లో బీజేపీ అభ్యర్థి చేతిలో ఓటమి పాలైన సీనియర్ నేత

TMC Leader Asish Banerjee Dead | త్రినేత్ర.న్యూస్ : పశ్చిమ బెంగాల్ (West Bengal) రాజకీయాల్లో విషాదం చోటుచేసుకుంది. ముఖ్యమంత్రి మమతా బెనర్జీకి అత్యంత సన్నిహితుడు, రాష్ట్ర అసెంబ్లీ మాజీ డిప్యూటీ స్పీకర్ ఆశిష్ బెనర్జీ (Asish Banerjee) అనుమానాస్పద స్థితిలో మృతి చెందారు. ఆదివారం ఉదయం బీర్భూమ్ జిల్లా రాంపూర్‌హాట్ (Rampurhat) లోని టీఎంసీ పార్టీ ఆఫీసులో ఆయన విగతజీవిగా కనిపించారు.

ఆయన తన ఇంటి పక్కనే ఉన్న పార్టీ కార్యాలయంలో ఉరివేసుకున్న స్థితిలో కనిపించడం స్థానికంగా తీవ్ర కలకలం రేపుతోంది. సమాచారం అందుకున్న వెంటనే పోలీసులు ఘటనా స్థలానికి చేరుకుని.. మృతదేహాన్ని పోస్ట్‌మార్టం (postmortem) కోసం తరలించారు. ఈ ఘటనపై కేసు నమోదు చేసి పోలీసులు ఎంక్వైరీ (investigation) ప్రారంభించారు.

25 ఏళ్ల సుదీర్ఘ రాజకీయ ప్రస్థానం

ఆశిష్ బెనర్జీ టీఎంసీలో సామాన్య నాయకుడు కాదు. మమతా బెనర్జీ మొదటిసారి అధికారంలోకి వచ్చినప్పటి నుంచి ఆయన ప్రభుత్వంలో విద్యా, వ్యవసాయ శాఖల మంత్రిగా కీలక బాధ్యతలు నిర్వహించారు. అలాగే అసెంబ్లీ డిప్యూటీ స్పీకర్‌గా కూడా పనిచేశారు. రాంపూర్‌హాట్ నియోజకవర్గం నుంచి వరుసగా ఐదుసార్లు (2001 నుంచి 2026 వరకు) ఎమ్మెల్యేగా గెలుపొంది తనకంటూ ఒక బలమైన రికార్డు క్రియేట్ చేసుకున్నారు.

ఎన్నికల్లో ఓటమి, పదవికి రాజీనామా

అయితే, ఇటీవలే జరిగిన 2026 అసెంబ్లీ ఎన్నికల్లో (Assembly polls) ఆయన బీజేపీ అభ్యర్థి ధృబ సాహా చేతిలో ఓటమి పాలయ్యారు. జూన్ నెలలో బీర్భూమ్ జిల్లా టీఎంసీ కోర్ కమిటీ చైర్మన్ పదవికి సైతం ఆయన రాజీనామా చేశారు. కానీ పార్టీ సాధారణ సభ్యుడిగా కొనసాగుతానని అప్పట్లో ప్రకటించారు.

ఆశిష్ బెనర్జీ మరణవార్త విన్న వెంటనే ఆయన ఇంటి బయట పెద్ద ఎత్తున గుమిగూడిన జనం

రాంపూర్‌హాట్‌లోని హట్టలపారా ప్రాంతంలో నివాసం ఉండే ఆశిష్ బెనర్జీ మరణవార్త విన్న వెంటనే అభిమానులు, పార్టీ కార్యకర్తలు పెద్ద ఎత్తున టీఎంసీ ఆఫీస్ వద్దకు చేరుకున్నారు. ఒకప్పుడు తృణమూల్‌కు కంచుకోటగా ఉన్న బీర్భూమ్ జిల్లాలో ఈసారి మొత్తం 11 స్థానాలకు గానూ బీజేపీ 6 స్థానాలు గెలుచుకుంది. గత ఎన్నికల్లో (2021) ఇక్కడ టీఎంసీ 10 సీట్లు గెలవగా, ఇప్పుడు రాజకీయ పరిస్థితులు మారడం.. దానికి తోడు ఆశిష్ బెనర్జీ లాంటి సీనియర్ నేత హఠాన్మరణం చెందడం బెంగాల్ రాజకీయాల్లో చర్చనీయాంశంగా మారింది.