Software Engineer | కోరిక తీర్చ‌లేద‌ని.. 34 ఏండ్ల టెకీని హ‌త్య‌చేసిన టీనేజ‌ర్‌

త్రినేత్ర‌.న్యూస్‌: క‌ర్ణాట‌క‌లోని బెంగ‌ళూరులో (Bengaluru) దారుణం చోటుచేసుకున్న‌ది. లైంగిక వాంఛ తీర్చేందుకు ఒప్పుకోలేద‌ని 34 ఏండ్ల సాఫ్ట్‌వేర్ ఇంజినీర్‌ని (Software Engineer) ఓ టీనేజ‌ర్‌ హ‌త్య చేశాడు.

34 ఏండ్ల శ‌ర్మిలా డీకే బెంగ‌ళూరులో రామ‌మూర్తి న‌గ‌ర్‌లోని సుబ్ర‌మ‌ణి లేఅవుట్‌లో నివాసం ఉంటున్న‌ది. ఆమె ప్ర‌ముఖ‌ సాఫ్ట్‌వేర్ కంపెనీ యాక్సెంచ‌ర్‌లో సాఫ్ట్‌వేర్ ఇంజినీర్‌గా ప‌నిచేస్తున్న‌ది. ఆమె పొరుగింట్లో క‌ర్నాల్ కుర‌య్ అనే 18 ఏండ్ల యువ‌కుడు ఉంటున్నాడు. అత‌ని క‌న్ను శ‌ర్మిలపై ప‌డింది. ఈ నెల 3న రాత్రి 9 గంట‌ల స‌మ‌యంలో కిటికీ గుండా శ‌ర్మిల ఇంట్లోకి వ‌చ్చిన క‌ర్నాల్ ఆమెను బ‌ల‌వంతం చేయ‌బోయాడు. దీంతో ఆమె ప్ర‌తిఘ‌టించింది. త‌న కామ వాంఛ తీర్చేందుకు ఒప్పుకోక‌పోవ‌డంతో కోపోద్రిక్తుడైన కుర్నాల్‌.. ఆమె నోరు, ముక్కును బ‌ల‌వంతంగా మూసేశాడు. ఈ పెనుగులాట‌లో ఆమె తీవ్రంగా గాయప‌డింది. దీంతో సృహ‌కోల్పోయింది. అనంత‌రం మంచంపై ఆమె బ‌ట్ట‌లు, ఇత‌ర వ‌స్తువులు వేసి కాల్చేశాడు. అనంత‌రం అక్క‌డి నుంచి పారిపోయాడు. ఇల్లంతా పొగ చూర‌డంతో ఆమె మృతిచెందింది.

స్థానికుల స‌మాచారంతో ఘ‌ట‌నా స్థ‌లానికి చేరుకున్న పోలీసులు.. బెడ్‌రూమ్‌లో విఘ‌త జీవిగా ప‌డి ఉన్న ఆమెను గుర్తించారు. అనుమానాస్ప‌ద మృతిగా కేసు న‌మోదు చేసి ద‌ర్యాప్తు ప్రారంభించారు. సాంకేతిక‌, వైజ్ఞానిక ఆధారాల‌ సాయంతో ఆమెది హ‌త్య‌గా నిర్ధారించారు. ప‌క్కింట్లో ఉండే క‌ర్నాల్‌పై అనుమానంతో అదుపులోకి తీసుకుని విచారించ‌గా, అస‌లు విష‌యం వెలుగులోకి వ‌చ్చింది. దీంతో అత‌నిపై హ‌త్య‌కేసు న‌మోదుచేశారు.