124 Ex Bureaucrats Letter | “గెలిస్తే సరే.. ఓడిపోతే రిగ్గింగా?”: ఎన్నికల సంఘానికి మద్దతుగా 124 మంది మాజీ ఐఏఎస్, ఐపీఎస్‌లు

124 Ex Bureaucrats Letter | త్రినేత్ర న్యూస్ : ఓటర్ల జాబితా సవరణ (SIR), ఓట్ల చోరీ ఆరోపణలతో దేశ రాజధాని ఢిల్లీలో విపక్షాలు చేపట్టిన ఆందోళనలతో రాజకీయ వాతావరణం వేడెక్కిన వేళ కీలక పరిణామం చోటుచేసుకుంది. భారత ఎన్నికల సంఘం (ECI) పనితీరుపై వస్తున్న ఆరోపణలను ఖండిస్తూ 124 మంది మాజీ ఐఏఎస్ (IAS), ఐఎఫ్‌ఎస్ (IFS) అధికారులు సంయుక్తంగా దేశ ప్రజలకు ఒక బహిరంగ లేఖ రాశారు. "కేవలం అనుమానం అనేది ఎప్పటికీ రుజువు కాదు" అని స్పష్టం చేస్తూ, ఆధారాలు లేకుండా చేసే ఆరోపణలు ప్రజాస్వామ్యంపై ప్రజలకున్న నమ్మకాన్ని బలహీనం చేస్తాయని వారు తీవ్ర ఆందోళన వ్యక్తం చేశారు.

సినిమాల్లో చూసే బూత్ క్యాప్చరింగ్ రోజులు పోయాయి

తమ ఉద్యోగ జీవితమంతా ఎన్నికల ప్రక్రియను దగ్గరుండి నడిపించిన అనుభవం తమకు ఉందని మాజీ అధికారులు లేఖలో గుర్తుచేశారు. "మేము ఏ రాజకీయ పార్టీకి చెందినవారం కాదు. కానీ ఎలాంటి ఆధారాలు లేకుండా మన దేశ ఎన్నికలపై ‘రిగ్గింగ్’ అనే నింద వేస్తుండటం వల్లే మేం స్పందిస్తున్నాం. నిజమైన రిగ్గింగ్ ఎలా ఉంటుందో మా సర్వీసు కాలంలో చూశాం. బూత్ వద్ద తుపాకులు పట్టుకోవడం, బ్యాలెట్ బాక్సులను దొంగిలించడం, ఓటర్లను తరిమికొట్టడం వంటివి అప్పట్లో సర్వసాధారణంగా జరిగేవి. దాన్ని అరికట్టేందుకే పార్లమెంట్ 1989లో బూత్ క్యాప్చరింగ్‌ను నేరంగా ప్రకటించింది" అని వారు వివరించారు.

2025 బిహార్ ఎన్నికలే నిదర్శనం

ఎన్నికల నిర్వహణలో వచ్చిన పారదర్శకతకు నిదర్శనంగా బిహార్‌ను లేఖలో ప్రస్తావించారు. ఒకప్పుడు హింస, బూత్ క్యాప్చరింగ్‌కు కేంద్రంగా ఉన్న బిహార్‌లో, చరిత్రలోనే తొలిసారిగా 2025 అసెంబ్లీ ఎన్నికల సమయంలో ఒక్క బూత్‌లో కూడా రీపోలింగ్ లేకుండా సజావుగా ఎన్నికలు జరిగాయని గుర్తుచేశారు. 1951 తర్వాత అత్యధిక ఓటింగ్ నమోదు కావడమే కాకుండా, మహిళలు భారీ సంఖ్యలో ఓటు హక్కును వినియోగించుకున్నారని వారు పేర్కొన్నారు. అధికారులు సాధువులుగా మారడం వల్ల ఇది జరగలేదని, ఎన్నికల సంఘం పటిష్టంగా రూపొందించిన పారదర్శక వ్యవస్థ వల్లే ఇది సాధ్యమైందని స్పష్టం చేశారు.

ఎక్కడికక్కడ నిఘా.. రిగ్గింగ్ ఎలా సాధ్యం?

ఈవీఎంల భద్రత, ఓట్ల లెక్కింపు ప్రక్రియ అత్యంత పటిష్టంగా ఉంటుందని అధికారులు వివరించారు. ప్రతి పోలింగ్ బూత్‌లో అభ్యర్థుల పోలింగ్ ఏజెంట్లు ఉంటారని, ఓటింగ్ ముగిశాక వారి సంతకాలతోనే ఈవీఎంలను సీల్ చేస్తారని తెలిపారు. స్ట్రాంగ్ రూమ్‌ల వద్ద కూడా అభ్యర్థుల ప్రతినిధులు కాపలా కాసేందుకు అవకాశం ఉంటుందని గుర్తుచేశారు. ఈ మొత్తం వ్యవస్థలో లక్షలాది మంది ప్రభుత్వ ఉద్యోగులు, వివిధ పార్టీల ఏజెంట్లు భాగస్వాములుగా ఉన్నప్పుడు రిగ్గింగ్ జరగడం అసాధ్యమని, వేలాది మంది సైలెంట్‌గా ఉండి కుట్ర చేయడం సాధ్యం కాదని తేల్చిచెప్పారు.

ఓడినప్పుడే రిగ్గింగ్ గుర్తొస్తుందా?

ముఖ్య ఎన్నికల కమిషనర్ జ్ఞానేష్ కుమార్‌కు వ్యతిరేకంగా శనివారం ఢిల్లీలో విపక్షాలు చేపట్టిన నిరసనల్లో నలుగురు మాజీ ముఖ్యమంత్రులు డిటెయిన్ అయిన నేపథ్యంలో ఈ లేఖ రాజకీయ ప్రాధాన్యం సంతరించుకుంది. "మీరు గెలిచినప్పుడు సరైనదిగా అనిపించిన వ్యవస్థే, మీరు ఓడిపోయినప్పుడు రిగ్గింగ్‌గా ఎలా మారుతుంది? ప్రజలు ఎన్నికల్లో తిరస్కరించిన తర్వాత తమ ఉనికిని చాటుకోవడానికే కొందరు లేనిపోని రాజకీయ కథనాలను ప్రచారం చేస్తున్నారు" అని మాజీ బ్యూరోక్రాట్లు ఘాటుగా విమర్శించారు. ఒకే వ్యక్తి వద్ద పూర్తి అధికారాలు కేంద్రీకృతం కాకుండా ముగ్గురు కమిషనర్ల వ్యవస్థను 1995లోనే సుప్రీంకోర్టు సమర్థించిందని, ఏకపక్ష నిర్ణయాలకు ఇక్కడ ఆస్కారం లేదని వారు తేల్చిచెప్పారు.

ఇదీ చదవండి | రాహుల్‌తో లంచ్‌.. మోదీతో మెట్రో రైడ్‌.. సీఎం విజ‌య్ త‌గ్గేదేలేదు