Supreme Court | మ‌తం మారితే ఎస్సీ హోదా ర‌ద్దు

సంచ‌ల‌న తీర్పు వెలువ‌రించిన సుప్రీం ధ‌ర్మాస‌నం
ఎస్సీ, ఎస్టీ అట్రాసిటీ చ‌ట్టం వ‌ర్తించ‌దని స్ప‌ష్టీక‌ర‌ణ‌
క్యాస్ట్ స‌ర్టిఫికెట్ ఉన్నా మ‌త‌మార్పిడి త‌ర్వాత అట్రాసిటీ వ‌ర్తించ‌దని వెల్ల‌డి

Supreme Court | త్రినేత్ర‌.న్యూస్‌ : ఎస్సీలు క్రైస్త‌వ మ‌తంలోకి మారితే వారి ఎస్సీ హోదా ర‌ద్ద‌యిపోతుంద‌ని దేశ అత్యున్న‌త న్యాయ‌స్థానం సంచ‌ల‌న తీర్పు వెలువ‌రించింది. వారికి ఎస్సీ, ఎస్టీ అట్రాసిటీ చ‌ట్టం వ‌ర్తించ‌ద‌ని స్ప‌ష్టం చేసింది. వారికి కుల ధృవీక‌ర‌ణ ప‌త్రం (క్యాస్ట్ స‌ర్టిఫికెట్) ఉన్న‌ప్ప‌టికీ, మ‌త‌మార్పిడి త‌రువాత అట్రాసిటీ వ‌ర్తించ‌ద‌ని పేర్కొంది. గుంటూరు జిల్లా పిట్ట‌ల‌వానిపాలెంలో పాస్ట‌ర్‌గా ప‌నిచేస్తున్న వ్య‌క్తిపై దాడికి పాల్ప‌డిన వారిపై అట్రాసిటీ కేసు న‌మోదు చేసే విష‌యాన్ని విచారించిన జస్టిస్ ప్రశాంత్ కుమార్ మిశ్రా, జస్టిస్ ఎన్వీ అంజారియాల‌తో కూడిన ధర్మసనం ఈ తీర్పు వెలువ‌రించింది.

గుంటూరు జిల్లా పిట్ట‌ల‌వానిపాలెంలో పాస్ట‌ర్‌గా ప‌నిచేస్తున్న చింతాడ ఆనంద్ ఎటువంటి అనుమ‌తులు లేకుండా చ‌ర్చి నిర్వ‌హించ‌డంపై స్థానికులు అభ్యంత‌రం తెలిపారు. దీనిపై ఆనంద్ ఎస్సీ, ఎస్టీ అట్రాసిటీ కింద అక్క‌ల రామిరెడ్డితో పాటు ఇత‌రుల‌పై ఫిర్యాదు చేశాడు. ఈ కేసును కొట్టివేయాల‌ని రామిరెడ్డి, ఇత‌రులు ఆంధ‌ప్ర‌దేశ్ హైకోర్టులో పిటిష‌న్ దాఖ‌లు చేశారు. దీనిని విచారించిన హైకోర్టు పిటిష‌న‌ర్ అభిప్రాయాల‌ను ప‌రిగ‌ణ‌న‌లోకి తీసుకుని, అట్రాసిటీ చ‌ట్టంలోని సెక్ష‌న్లు వ‌ర్తించ‌వ‌ని తీర్పునిచ్చింది. దీనిపై ఆనంద్ సుప్రీంకోర్టులో అప్పీలు దాఖ‌లు చేశారు. దీనిపై విచార‌ణ చేప‌ట్టిన ధ‌ర్మాసనం హైకోర్టు తీర్పును స‌మ‌ర్థించింది. ఆనంద్ దశాబ్ద కాలంగా పాస్టర్‌గా వ్య‌వ‌హ‌రిస్తున్నాడ‌ని, ఘటన జరిగిన సమయంలోనూ ప్రార్థనలు చేస్తున్నారని కోర్టు గుర్తించింది. క్రైస్త‌వ మ‌తంలో కుల‌వ్య‌వ‌స్థ‌కు తావులేద‌ని గుర్తు చేసింది. హిందూ, బౌద్ధం, సిక్కు మ‌తాల ప్ర‌జ‌ల‌కు మాత్ర‌మే ఎస్సీ హోదా ఉంటుంద‌ని స్ప‌ష్టం చేసింది. క్రైస్త‌వంలోకి మారితే ఎస్సీ హోదా కోల్పోతార‌ని తేల్చి చెప్పింది. క్రైస్త‌వ మ‌తంలోకి మారి పాస్ట‌ర్‌గా ప‌నిచేస్తున్న ఆనంద్‌కు ఎస్సీ, ఎస్టీ అట్రాసిటీ చ‌ట్టం కింద ర‌క్ష‌ణ వ‌ర్తించ‌ద‌ని పేర్కొంది. మ‌తం మారితే కుల ధృవీక‌ర‌ణ ప‌త్రం ర‌ద్దు కాక‌పోయినా అట్రాసిటీ చ‌ట్టం మాత్రం వ‌ర్తించ‌బోద‌ని తెలిపింది.