Judicial officers Retirement Age | జడ్జీల రిటైర్మెంట్ వయసు 62 ఏళ్లకు పెంపు: 14 రాష్ట్రాలు గ్రీన్ సిగ్నల్.. సుప్రీంకోర్టు కీలక వ్యాఖ్యలు

Judicial officers Retirement Age | త్రినేత్ర న్యూస్ : దేశంలోని జిల్లా జ్యుడీషియల్ అధికారుల (District Judicial Officers) రిటైర్మెంట్ వయసును 60 నుంచి 62 ఏళ్లకు పెంచే అంశంపై సుప్రీంకోర్టు కీలక వ్యాఖ్యలు చేసింది. ఇప్పటివరకు 14 రాష్ట్రాలు సర్వీస్ వయసు పెంపునకు అంగీకరించడంపై సర్వోన్నత న్యాయస్థానం హర్షం వ్యక్తం చేసింది. మిగిలిన రాష్ట్రాలు సైతం ఇదే బాటలో నిర్ణయం తీసుకుంటాయని న్యాయస్థానం ఆశాభావం వ్యక్తం చేసింది.

చీఫ్ జస్టిస్ సూర్యకాంత్, జస్టిస్ జాయ్‌మాల్య బాగ్చీ, జస్టిస్ వి.మోహనలతో కూడిన త్రిసభ్య ధర్మాసనం సోమవారం ఈ అంశంపై విచారణ చేపట్టింది. ఈ సందర్భంగా పదవీ విరమణ అంచున ఉన్న కొందరు జడ్జీలు దాఖలు చేసిన వ్యక్తిగత పిటిషన్లను అత్యవసరంగా విచారించేందుకు బెంచ్ నిరాకరించింది. "ఇది సుప్రీంకోర్టు, రాష్ట్ర ప్రభుత్వాల మధ్య సమన్వయంతో పరిష్కారం కావాల్సిన అంశం. సర్వీస్ నిబంధనల వ్యవహారంలో వ్యక్తిగత పిటిషన్లను ప్రోత్సహించలేం" అని కోర్టు స్పష్టం చేసింది.

గత ఆదేశాల్లో సుప్రీంకోర్టు ఏం చెప్పిందంటే..

దేశవ్యాప్తంగా జిల్లా స్థాయి న్యాయాధికారుల పదవీ విరమణ వయసులో ఏకరూపత తీసుకురావాలని కోరుతూ దాఖలైన పిటిషన్‌ను ధర్మాసనం విచారిస్తోంది. సెప్టెంబర్ 4న వెలువరించిన ఆదేశాలలో.. న్యాయాధికారుల రిటైర్మెంట్ వయసును 60 నుంచి 62 ఏళ్లకు పెంచాలని సుప్రీంకోర్టు రాష్ట్రాలకు సూచించింది. ఆర్థిక భారాన్ని సాకుగా చూపి వయసు పెంపును తిరస్కరించడం తగదని గతంలోనే తేల్చిచెప్పింది.

Also Read | పొగాకు మానేయమంటే..పుట్టింటికి పోయింది.. కాపురం వద్దన్నది

ఇప్పటికే అంగీకారం తెలిపిన రాష్ట్రాల్లో సర్వీస్ రూల్స్ సవరణ జరిగే వరకు, 60 ఏళ్లు నిండిన అధికారులను వెంటనే రిలీవ్ చేయవద్దని, సంబంధిత హైకోర్టు పనితీరు అంచనా (Suitability Assessment) ఆధారంగా 62 ఏళ్ల వరకు కొనసాగే అవకాశం కల్పించాలని పేర్కొంది. ఈ ఏడాది మార్చి 31 తర్వాత పదవీ విరమణ పొందిన అధికారులకు కూడా మరో ఉద్యోగంలో చేరకపోతే తిరిగి సర్వీసులోకి వచ్చే ఆప్షన్ ఇవ్వాలని స్పష్టం చేసింది.

తెలుగు రాష్ట్రాల పరిస్థితి ఏంటి?

ఆంధ్రప్రదేశ్, తెలంగాణ సహా పలు రాష్ట్రాలు, కేంద్రపాలిత ప్రాంతాలు తమ నిర్ణయాన్ని పునఃపరిశీలించాలని సుప్రీంకోర్టు గతంలోనే కోరింది. కాగా.. తెలంగాణ, మధ్యప్రదేశ్ వంటి కొన్ని రాష్ట్రాలు ఇప్పటికే ఈ దిశగా నిబంధనలను సవరించేందుకు ముందడుగు వేశాయి. ప్రస్తుతం సుప్రీంకోర్టు న్యాయమూర్తులు 65 ఏళ్లకు, హైకోర్టు న్యాయమూర్తులు 62 ఏళ్లకు రిటైర్ అవుతుండగా.. కింది స్థాయి న్యాయ వ్యవస్థలో అపార అనుభవం ఉన్న అధికారుల సేవలను 62 ఏళ్ల వరకు వినియోగించుకోవడమే లక్ష్యంగా ఈ కసరత్తు కొనసాగుతోంది.