BJP Protest Kharge Residence | మోదీ తండ్రిని అంత మాటంటవా? ఖర్గే ఇంటిని చుట్టుముట్టిన బీజేపీ నేతలు

• మోదీపై మల్లికార్జున్ ఖర్గే వివాదాస్పద వ్యాఖ్యలు
• దేశవ్యాప్తంగా భగ్గుమన్న బీజేపీ
• క్షమాపణకు డిమాండ్

BJP Protest Kharge Residence | త్రినేత్ర న్యూస్ : ప్రధాని నరేంద్ర మోదీని ఉద్దేశించి కాంగ్రెస్ జాతీయ అధ్యక్షుడు మల్లికార్జున్ ఖర్గే చేసిన ఘాటు వ్యాఖ్యలు దేశ రాజకీయాల్లో తీవ్ర దుమారం రేపుతున్నాయి. ఖర్గే వెంటనే బేషరతుగా క్షమాపణ చెప్పాలని, పదవికి రాజీనామా చేయాలని డిమాండ్ చేస్తూ భారతీయ జనతా పార్టీ (BJP) దేశవ్యాప్త ఆందోళనలకు పిలుపునిచ్చింది.

సోమవారం న్యూఢిల్లీలోని రాజాజీ మార్గ్‌లో ఉన్న ఖర్గే నివాసాన్ని ముట్టడించేందుకు ఢిల్లీ బీజేపీ నేతలు, కార్యకర్తలు పెద్ద ఎత్తున ర్యాలీగా బయలుదేరారు. సేనా భవన్ సర్కిల్ వద్దే పోలీసులు బారికేడ్లు ఏర్పాటు చేసి వారిని అడ్డుకోవడంతో తీవ్ర ఉద్రిక్తత నెలకొంది. ఖర్గే, రాహుల్ గాంధీలకు వ్యతిరేకంగా బీజేపీ శ్రేణులు నినాదాలతో హోరెత్తించాయి.

అసలేం జరిగింది? వివాదం ఎక్కడ మొదలైంది?

బీహార్ తొలి ముఖ్యమంత్రి శ్రీకృష్ణ సింగ్ 139వ జయంతి సందర్భంగా ఆదివారం పాట్నాలో నిర్వహించిన సభలో ఈ వివాదానికి బీజం పడింది. స్పెషల్ ఇంటెన్సివ్ రివిజన్ (SIR) ప్రక్రియలో జరిగిన అవకతవకలకు బాధ్యులైన వారిని జైలుకు పంపుతామని ఖర్గే ప్రసంగిస్తుండగా, సభలోని ఓ వ్యక్తి "మోదీ ఎక్కడికీ వెళ్లరు" అంటూ గట్టిగా అరిచాడు.

దీనికి వేదికపై నుంచే బదులిచ్చిన ఖర్గే.. "మోదీ కాదు, మోదీ తండ్రి కూడా వెళ్లాల్సిందే" (మోదీ కా బాప్ భీ జాయేగా) అంటూ వ్యాఖ్యానించారు. ఈ వ్యాఖ్యలే ఇప్పుడు దేశవ్యాప్తంగా తీవ్ర చర్చనీయాంశంగా మారాయి.

దేశవ్యాప్తంగా నిరసనల హోరు

ఈ వ్యాఖ్యలను నిరసిస్తూ ఢిల్లీ, ముంబై, పాట్నా, రాంచీ, కోల్‌కతా, జమ్మూ, బెంగళూరు తదితర ప్రధాన నగరాల్లో బీజేపీ శ్రేణులు భారీ ఎత్తున రోడ్లపైకి వచ్చాయి.

పాట్నాలో బీజేపీ కార్యకర్తలు భారీ ర్యాలీ నిర్వహించి, ఖర్గే దిష్టిబొమ్మను దహనం చేశారు.

జమ్మూలో ఖర్గే ఫొటోలను తగులబెట్టి ఆందోళనలు చేపట్టారు.

బెంగళూరులోని ఫ్రీడమ్ పార్క్ వేదికగా కర్ణాటక బీజేపీ నేతలు పెద్ద ఎత్తున ధర్నా నిర్వహించారు.

తీవ్ర దిగ్భ్రాంతి వ్యక్తం చేసిన రాజ్‌నాథ్ సింగ్, ప్రహ్లాద్ జోషి

ఖర్గే వ్యాఖ్యలపై రక్షణ మంత్రి రాజ్‌నాథ్ సింగ్ తీవ్ర ఆగ్రహం వ్యక్తం చేశారు. "ప్రధాని మోదీ దివంగత తండ్రిపై చేసిన ఈ వ్యాఖ్యలు తీవ్రంగా కలచివేశాయి. ఏదో సాధారణ కార్యకర్తో, యువ నేతో ఈ మాటలు అంటే వేరేలా ఉండేది. కానీ, దేశంలోనే అత్యంత పురాతన పార్టీ అని చెప్పుకునే కాంగ్రెస్‌కు జాతీయ అధ్యక్షుడైన వ్యక్తి నోటి నుంచి ఇలాంటి భాష రావడం తీవ్ర విచారకరం. తప్పును సరిదిద్దుకోకుండా కాంగ్రెస్ ఈ వ్యాఖ్యలను సమర్థించుకోవడం మరింత దారుణం" అని రాజ్‌నాథ్ పేర్కొన్నారు.

Also Read |  ‘మోదీ కా బాప్ భీ జాయేగా’: పాట్నా సభలో సహనం కోల్పోయిన మల్లికార్జున ఖర్గే

మరో కేంద్ర మంత్రి ప్రహ్లాద్ జోషి స్పందిస్తూ.. రాహుల్ గాంధీ రాజకీయ అపరిపక్వత గురించి అందరికీ తెలిసిందేనని, ఆయన సహవాసంతో పార్టీలోని ఇతర సీనియర్లకు కూడా ఆ వైరస్ సోకినట్లు కనిపిస్తోందని ఎద్దేవా చేశారు. ప్రజా జీవితంలో లేని, కన్నుమూసిన తల్లిదండ్రులను రాజకీయాల్లోకి లాగడం దిగజారుడుతనానికి నిదర్శనమని మండిపడ్డారు.

రాద్ధాంతం చేస్తున్నారన్న కాంగ్రెస్.. ఆర్జేడీ కీలక వ్యాఖ్యలు

బీజేపీ విమర్శలను ఖర్గే తనయుడు, కర్ణాటక మంత్రి ప్రియాంక్ ఖర్గే తిప్పికొట్టారు. బీజేపీ పనిగట్టుకుని లేని విషయాన్ని రాద్ధాంతం చేస్తోందని.. గతంలో మోదీ, అమిత్ షా ఉపయోగించిన పదజాలాన్ని ఈ 'సంస్కారవంతులు' సౌకర్యవంతంగా మర్చిపోయారని చురకలంటించారు. తాము వారి వద్ద నుంచి సంస్కారం నేర్చుకోవాల్సిన అవసరం లేదన్నారు.

ఇండియా (INDIA) కూటమి భాగస్వామ్య పక్షమైన ఆర్జేడీ ఎంపీ మనోజ్ ఝా మాట్లాడుతూ.. ఖర్గే స్థాయి వ్యక్తి నుంచి ఇలాంటి మాటలు ఎవరూ ఊహించరని అంగీకరిస్తూనే.. బీజేపీ సెలెక్టివ్ ఆగ్రహాన్ని తప్పుపట్టారు. గతంలో సోనియా గాంధీ, మల్లికార్జున్ ఖర్గేలపై బీజేపీ నేతలు దిగజారుడు విమర్శలు చేసినప్పుడు ఇలాంటి ఆందోళనలు మీడియాలో కానీ, ఇతర పార్టీల్లో కానీ ఎందుకు కనిపించలేదని ఆయన ప్రశ్నించారు.