Sabarimala Chief Priest | శబరిమల కొత్త తంత్రిగా గోల్డ్ చోరీ కేసులో అరెస్ట్ అయిన రాజీవరు కొడుకు?

• శబరిమల ప్రధాన అర్చకుడిగా (తంత్రి) బ్రహ్మదత్తన్‌ను నియమించేందుకు సిద్ధమన్న TDB
• అనారోగ్య కారణాలతో తప్పుకుంటూ.. తన కుమారుడికి బాధ్యతలు ఇవ్వాలని కందరారు రాజీవరు విజ్ఞప్తి
• బంగారం చోరీ కేసు పెండింగ్‌లో ఉన్నందున కేరళ హైకోర్టు ఆమోదం తప్పనిసరి అని స్పష్టీకరణ
• వంశపారంపర్య తంత్రి కుటుంబంపై బీజేపీ నేత వ్యాఖ్యలతో చెలరేగిన తాజా రాజకీయ వివాదం

Sabarimala Chief Priest | త్రినేత్ర.న్యూస్ : కేరళలోని ప్రసిద్ధ పుణ్యక్షేత్రం శబరిమల (Sabarimala) తదుపరి ప్రధాన అర్చకుడి (Chief Priest) నియామకంపై ట్రావెన్‌కోర్ దేవస్వం బోర్డ్ (TDB) మంగళవారం కీలక ప్రకటన చేసింది. ప్రస్తుతం తంత్రిగా ఉన్న కందరారు రాజీవరు స్థానంలో ఆయన కుమారుడు బ్రహ్మదత్తన్‌ను నియమించేందుకు బోర్డు సుముఖంగా ఉందని TDB ప్రెసిడెంట్ కె. జయకుమార్ స్పష్టం చేశారు. అయితే, శబరిమల బంగారం చోరీ కేసు (Sabarimala gold theft case) ప్రస్తుతం పెండింగ్‌లో ఉన్నందున.. కేరళ హైకోర్టు అనుమతి వచ్చిన తర్వాతే దీనిపై తుది నిర్ణయం తీసుకుంటామని ఆయన వెల్లడించారు.

అనారోగ్య కారణాలతో తప్పుకుంటున్న రాజీవరు

మలయాళ మాసం 'చింగం' (Chingam) నుంచి కొత్త తంత్రి బాధ్యతలు స్వీకరించాల్సి ఉంటుంది. అయితే, అనారోగ్య కారణాల వల్ల తాను ఈ బాధ్యతలను ఇకపై నిర్వహించలేనని రాజీవరు బోర్డుకు లేఖ రాశారు. తన స్థానంలో, ఇప్పటికే ఆలయ పూజా కార్యక్రమాల్లో తనకు చేదోడువాదోడుగా ఉంటున్న తన కుమారుడు బ్రహ్మదత్తన్‌కు అవకాశం ఇవ్వాలని కోరారు. తజమోన్ మఠం (Thazhamon Madom) కుటుంబం నుంచి వంశపారంపర్యంగా వీరు ఈ బాధ్యతలు నిర్వర్తిస్తున్నారు.

కె.జయకుమార్

హైకోర్టు ఆమోదం ఎందుకు అవసరం?

శబరిమల ఆలయానికి చెందిన బంగారం చోరీ కేసులో కోర్టు నియమించిన సిట్ (SIT).. ఈ ఏడాది జనవరి 9న రాజీవరును అరెస్టు చేసింది. సుమారు 40 రోజుల పాటు జ్యుడీషియల్ కస్టడీలో ఉన్న ఆయనకు ఫిబ్రవరిలో బెయిల్ లభించింది. అప్పటి నుంచి ఆయన కుమారుడు బ్రహ్మదత్తన్ పలు ఆలయ క్రతువుల్లో ఆయనకు ప్రాతినిధ్యం వహిస్తున్నారు. ఈ కేసు హైకోర్టు పరిధిలో ఉన్నందున, రాజీవరు అభ్యర్థనను అంగీకరించడంలో బోర్డుకు ఎలాంటి అభ్యంతరం లేకపోయినప్పటికీ.. న్యాయస్థానం క్లియరెన్స్ తీసుకోవాలని బోర్డు భావించింది.

"హైకోర్టు నియమించిన స్పెషల్ కమిషనర్ ఈ వ్యవహారాన్ని పర్యవేక్షిస్తున్నారు. సరైన సమయంలో కోర్టు దీనిపై నిర్ణయం తీసుకుంటుంది. హైకోర్టు ఆమోదం పొందాలన్నది మాత్రమే మా ఆలోచన," అని జయకుమార్ తెలిపారు.

బీజేపీ నేత కామెంట్స్‌తో వివాదం

ఈ నియామకం చుట్టూ కేరళలో రాజకీయ దుమారం కూడా రేగింది. క్రిమినల్ కేసులను ఎదుర్కొంటున్న వ్యక్తులు సిఫార్సు చేసిన వారిని కేవలం 'వంశపారంపర్య' హక్కుల ఆధారంగా తంత్రిగా నియమించాల్సిన అవసరం దేవస్వం బోర్డుకు లేదని బీజేపీ రాష్ట్ర ఉపాధ్యక్షుడు కె.ఎస్. రాధాకృష్ణన్ తీవ్ర వ్యాఖ్యలు చేశారు. పారంపర్య తంత్రి హోదా నుంచి ఆ కుటుంబాన్ని తొలగించాలని ఆయన డిమాండ్ చేశారు.

అయితే, బీజేపీ అధిష్ఠానం ఈ వ్యాఖ్యలను ఖండించింది. శబరిమల ఆలయంలో తాంత్రిక బాధ్యతలు ఎవరు నిర్వర్తించాలనేది రాజకీయ అంశం కాదని, రాధాకృష్ణన్ చేసిన వ్యాఖ్యలు ఆయన వ్యక్తిగత అభిప్రాయం మాత్రమేనని పార్టీ స్పష్టం చేసింది.