Raghav Chadha resigns AAP | ఆప్ ఒక ‘టాక్సిక్’ పార్టీ.. నేను సరైన వ్యక్తినే, కానీ తప్పుడు పార్టీలో ఉన్నా: రాజీనామాపై నోరు విప్పిన రాఘవ్ చద్దా

త్రినేత్ర.న్యూస్ : ఆమ్ ఆద్మీ పార్టీ (AAP) ని వీడి, భారతీయ జనతా పార్టీ (BJP) లో చేరడం వెనుక ఉన్న బలమైన కారణాలను రాజ్యసభ ఎంపీ రాఘవ్ చద్దా వెల్లడించారు. తాను ఎందుకు ఈ కఠిన నిర్ణయం తీసుకోవాల్సి వచ్చిందో వివరిస్తూ సోమవారం ఆయన సోషల్ మీడియా వేదికగా ఒక వీడియోను విడుదల చేశారు. ఆప్ ప్రస్తుతం అవినీతిపరుల గుప్పిట్లో ఉందని, అక్కడ పనిచేసే వాతావరణం ఏమాత్రం బాగోలేదని తీవ్ర ఆరోపణలు చేశారు.

గత వారం రాఘవ్ చద్దాతో పాటు మరో ఆరుగురు రాజ్యసభ ఎంపీలు (స్వాతి మలివాల్, హర్భజన్ సింగ్, సందీప్ పాఠక్, అశోక్ మిట్టల్, రాజిందర్ గుప్తా, విక్రమ్ సాహ్నీ) ఆప్‌కు రాజీనామా చేసి, బీజేపీలో విలీనమైన విషయం తెలిసిందే. ఈ పరిణామంతో యువతలో ఫాలోయింగ్ ఉన్న చద్దా.. ఇన్‌స్టాగ్రామ్‌లో ఏకంగా రెండు మిలియన్ల మంది ఫాలోవర్లను కోల్పోయారు. ఈ నేపథ్యంలో ఆయన స్పందిస్తూ ఒక సుదీర్ఘమైన వీడియో సందేశాన్ని పంచుకున్నారు.

15 ఏళ్ల నా కష్టం.. నా రక్తం

"నా ఈ నిర్ణయం వెనుక ఉన్న కారణాలను మీలో చాలా మంది తెలుసుకోవాలనుకుంటున్నారు. రాజకీయాల్లోకి రాకముందు నేను చార్టర్డ్ అకౌంటెంట్‌గా పనిచేశాను. నా కెరీర్‌ను వదులుకుని, ఈ పార్టీ (ఆప్) వ్యవస్థాపక సభ్యుడిగా చేరాను. నా యవ్వనంలో అత్యంత కీలకమైన 15 ఏళ్ల సమయాన్ని ఈ పార్టీకే అంకితం చేశాను. నా రక్తం, చెమట, తీవ్రమైన కృషితో ఈ పార్టీని పోషించాను," అని చద్దా గుర్తుచేసుకున్నారు.

అవినీతిపరుల చేతుల్లో పార్టీ

అయితే కాలక్రమేణా పార్టీ పూర్తిగా మారిపోయిందని ఆయన ఆవేదన వ్యక్తం చేశారు. "ఈరోజు ఈ పార్టీ పాత పార్టీలా లేదు. ఇక్కడ పూర్తిగా విషపూరితమైన (Toxic) వాతావరణం నెలకొంది. మీరు పనిచేయాలనుకుంటే అడ్డుకుంటారు, పార్లమెంటులో మాట్లాడనివ్వరు. ఈ రాజకీయ పార్టీ ఇప్పుడు అవినీతిపరులు, రాజీపడే కొద్దిమంది వ్యక్తుల చేతుల్లో చిక్కుకుంది. వారు ఇప్పుడు దేశం కోసం కాకుండా, తమ సొంత లాభం కోసం పనిచేస్తున్నారు," అని చద్దా విమర్శించారు.

సరైన వ్యక్తినే.. కానీ తప్పుడు పార్టీలో

గత కొన్నేళ్లుగా తాను తీవ్రమైన అంతర్మథనానికి గురైనట్లు ఆయన చెప్పారు. "నేను ఒక సరైన వ్యక్తినే (Right man), కానీ తప్పుడు పార్టీలో (Wrong party) ఉన్నాననే భావన నాకు పదే పదే కలిగింది. ఒక వ్యక్తి తప్పు కావచ్చు, ఇద్దరు వ్యక్తులు తప్పు కావచ్చు.. కానీ ఏకంగా ఏడుగురు ఎంపీలు, ఎంతోమంది విద్యావంతులు పార్టీని వీడుతున్నారంటే తప్పు ఎవరిదో అర్థం చేసుకోవచ్చు," అని చద్దా అన్నారు.

తన ముందు కేవలం మూడు దారులు మాత్రమే కనిపించాయని, రాజకీయాల నుంచి తప్పుకోవడం లేదా అదే పార్టీలో ఉండి భరించడం, లేదా సానుకూల రాజకీయాలు (Positive politics) చేయడానికి వేరే వేదికను ఎంచుకోవడం. అందుకే ఏడుగురం ఎంపీలం కలిసి ఈ నిర్ణయం తీసుకున్నామని ఆయన స్పష్టం చేశారు. తాను ఇప్పటికీ ప్రజల సమస్యల పైనే పోరాడుతానని, తనను ఆదరించిన ప్రతి ఒక్కరికీ ధన్యవాదాలు అని చద్దా తన వీడియో సందేశాన్ని ముగించారు.

 

View this post on Instagram

 

A post shared by Raghav Chadha (@raghavchadha88)