త్రినేత్ర News Logo
DIGITAL-NEWS

Ardhanareshwar Sculpture Elephanta Caves | అర్ధనారీశ్వర ఫోటోతో బీజేపీ, ఆరెస్సెస్‌లకు రాహుల్ గాంధీ స్ట్రాంగ్ కౌంటర్

సోనియా, రాజీవ్ గాంధీలపై చేసిన వ్యాఖ్యల వివాదం వేళ రాహుల్ బీజేపీ, ఆరెస్సెస్‌పై ఫైర్ అయ్యారు. ఎలిఫెంటా గుహల్లోని అర్ధనారీశ్వర శిల్పం ఫోటోతో కౌంటర్ ఇచ్చారు.

J

National | Published On Nov 22, 2026, 4.36 pm IST

Ardhanareshwar Sculpture Elephanta Caves | అర్ధనారీశ్వర ఫోటోతో బీజేపీ, ఆరెస్సెస్‌లకు రాహుల్ గాంధీ స్ట్రాంగ్ కౌంటర్

సంక్షిప్త సారాంశం

ఎలిఫెంటా గుహల్లోని అర్ధనారీశ్వర (శివపార్వతుల ఏకరూపం) శిల్పం ఫోటోను షేర్ చేస్తూ బీజేపీ, ఆరెస్సెస్‌లపై రాహుల్ గాంధీ తీవ్ర విమర్శలు చేశారు. భారతీయ ఆధ్యాత్మిక, మత సంప్రదాయాలపై వారికి ఏమాత్రం అవగాహన లేదని, వారు సంస్కారహీనులైన కులతత్వ, పురుషాధిక్యవాదులని రాహుల్ మండిపడ్డారు. తన తల్లి సోనియా గాంధీ పుస్తకావిష్కరణ సభలో తల్లిదండ్రుల అనుబంధంపై రాహుల్ చేసిన వ్యాఖ్యలు ఇటీవల రాజకీయ దుమారం రేపాయి. రాహుల్ వ్యాఖ్యలపై అస్సాం సీఎం హిమంత బిశ్వ శర్మ వ్యంగ్యాస్త్రాలు సంధించగా, ప్రేమ, సమానత్వం గురించి రాహుల్ గొప్ప చర్చకు తెరలేపారని కాంగ్రెస్ సమర్థించింది.

Advertisement

Ardhanareshwar Sculpture Elephanta Caves | త్రినేత్ర న్యూస్ : కాంగ్రెస్ అగ్రనేత రాహుల్ గాంధీ మరోసారి బీజేపీ, ఆరెస్సెస్ (RSS) లక్ష్యంగా తీవ్ర స్థాయిలో విరుచుకుపడ్డారు. భారతీయ ఆధ్యాత్మిక, మతపరమైన సంప్రదాయాలపై వారికి కనీస అవగాహన లేదని ఆదివారం 'ఎక్స్' వేదికగా ఘాటుగా విమర్శించారు. మహారాష్ట్రలోని ఎలిఫెంటా గుహల్లో కొలువుదీరిన శివపార్వతుల ఏకరూపమైన 'అర్ధనారీశ్వర' శిల్పం ఫోటోను షేర్ చేస్తూ రాహుల్ ఈ వ్యాఖ్యలు చేయడం రాజకీయ వర్గాల్లో చర్చనీయాంశమైంది.

"వారు కులతత్వ, పురుషాధిక్యవాదులు"

భారతీయ ఆధ్యాత్మిక సంప్రదాయాల లోతుల్లోకి వెళ్తున్న కొద్దీ ఒక విషయం స్పష్టమవుతోందని రాహుల్ గాంధీ తన పోస్ట్‌లో పేర్కొన్నారు. "భారతీయ ఆధ్యాత్మిక, మతపరమైన సంప్రదాయాలపై ఏమాత్రం అవగాహన లేని సంస్కారహీనులు, అత్యాశాపరులు, కులతత్వ, పురుషాధిక్య భావజాలం ఉన్నవారు బీజేపీ, ఆరెస్సెస్ నేతలు" అంటూ ఆయన తీవ్ర పదజాలంతో విరుచుకుపడ్డారు.

గత మంగళవారం కూడా శివపార్వతుల శిల్పంతో పోస్ట్

అంతకుముందు గత మంగళవారం కూడా రాహుల్ గాంధీ 12వ శతాబ్దానికి చెందిన ఒక ఆలయ శిల్పం ఫోటోను షేర్ చేశారు. అందులో పరమశివుడి ఒడిలో పార్వతీ దేవి కూర్చుని ఉన్న దృశ్యం ఉంది. బీజేపీ, ఆరెస్సెస్ మద్దతుదారుల హృదయాల్లో భయం, కోపం, ద్వేషం గూడుకట్టుకున్నాయని, అందుకే వారు ప్రేమను వ్యక్తపరచలేకపోతున్నారని రాహుల్ విమర్శించారు. "ఒక నిజమైన హిందువుగా వారిని ఈ వల నుంచి విముక్తి చేయడం నా బాధ్యత. అప్పుడే వారు కూడా ప్రేమ, ఆప్యాయతల అందాన్ని ఆస్వాదించగలరు. సత్యం శివం సుందరం" అని రాహుల్ రాసుకొచ్చారు.

అసలు వివాదం ఎక్కడ మొదలైందంటే?

గత సోమవారం తన తల్లి సోనియా గాంధీ రాసిన 'బిలాంగింగ్: ఎ జర్నీ ఆఫ్ లవ్' (Belonging: A Journey Of Love) పుస్తకావిష్కరణ కార్యక్రమంలో రాహుల్ చేసిన వ్యాఖ్యలతో ఈ వివాదం రాజుకుంది. తన తల్లిదండ్రులు రాజీవ్ గాంధీ, సోనియా గాంధీల మధ్య ఉన్న గాఢమైన అనుబంధాన్ని రాహుల్ గుర్తుచేసుకున్నారు.

భోజనం చేసే సమయంలో నాన్న (రాజీవ్) ఒడిలో అమ్మ (సోనియా) కూర్చునేవారని, అందరి ఇళ్లలోనూ అలాగే ఉంటుందని తాను చిన్నప్పుడు అనుకునేవాడినని రాహుల్ చెప్పారు. "నేను నా స్నేహితుల ఇళ్లకు వెళ్లినప్పుడు వాళ్ల అమ్మానాన్నలు అలా కూర్చోకపోవడం చూసి ఆశ్చర్యపోయేవాడిని. మీ అమ్మ ఎందుకు మీ నాన్న ఒడిలో కూర్చోలేదని నా ఫ్రెండ్స్‌ని అడిగేవాడిని" అంటూ రాహుల్ సరదాగా ఆనాటి జ్ఞాపకాలను పంచుకున్నారు. ఇదే వేదికపై తన నానమ్మ ఇందిరా గాంధీ, తండ్రి రాజీవ్ గాంధీల హత్యల తాలూకు విషాద ఘటనలను తలచుకుని ఆయన భావోద్వేగానికి లోనయ్యారు.

హిమంత సెటైర్లు.. కాంగ్రెస్ కౌంటర్

సోనియా, రాజీవ్‌ల గురించి రాహుల్ చేసిన వ్యాఖ్యలపై సోషల్ మీడియాలో భిన్నాభిప్రాయాలు వ్యక్తమయ్యాయి. అస్సాం ముఖ్యమంత్రి హిమంత బిశ్వ శర్మ ఆ వీడియో క్లిప్‌ను షేర్ చేస్తూ వ్యంగ్యాస్త్రాలు సంధించారు. "సారీ మేడమ్.. మీ జీవితంలో ఇంతటి ప్రత్యేకమైన రోజున కూడా ఆయన మిమ్మల్ని ఇబ్బంది పెట్టకుండా ఉండలేకపోయారు. ఈ ప్రొడక్ట్ లాంచింగ్, రీ-లాంచింగ్‌లకు అతీతమని దేశం ఎప్పుడో గుర్తించింది, కనీసం ఇప్పుడైనా మీరు గ్రహిస్తారని ఆశిస్తున్నా" అంటూ హిమంత ఎద్దేవా చేశారు.

మరోవైపు, కాంగ్రెస్ పార్టీ రాహుల్ గాంధీకి అండగా నిలిచింది. తల్లిదండ్రుల మధ్య ఉన్న స్వచ్ఛమైన ప్రేమను ఆయన నిజాయితీగా పంచుకున్నారని పేర్కొంది. "ప్రేమను దాచుకోవాల్సిన అవసరం లేదు, ఆప్యాయత బలహీనత కాదు. భాగస్వామిని సమానంగా గౌరవించడంతోనే సమానత్వం మొదలవుతుంది" అంటూ కాంగ్రెస్ పార్టీ 'ఎక్స్' వేదికగా బదులిచ్చింది.

Advertisement
Advertisement