PM Modi SRCC Speech | 13 ఏళ్ల తర్వాత అదే వేదిక.. మళ్లీ అదే ‘గ్లాస్’ కథ.. ఆ కాలేజీలో ప్రధాని మోదీ ఆసక్తికర ప్రసంగం

• ఢిల్లీ యూనివర్సిటీ పరిధిలోని శ్రీరామ్ కాలేజ్ ఆఫ్ కామర్స్ (SRCC) శతాబ్ది ఉత్సవాల్లో పాల్గొన్న ప్రధాని మోదీ
• 2013లో సీఎంగా ఉన్నప్పుడు చెప్పిన 'సగం నీరు, సగం గాలి' ఉన్న గ్లాస్ కథను మళ్లీ గుర్తుచేసిన వైనం
• 2013 నాటి పాలసీ పారాలసిస్, ఉగ్రవాద పరిస్థితులను.. ప్రస్తుత 7.8% క్యూ1 జీడీపీ వృద్ధితో పోల్చిన ప్రధాని
• విమర్శకులను 'అలిగిన మామయ్యలు' (నరాజ్ ఫూఫాజీ) అంటూ ఎద్దేవా చేసిన మోదీ, కౌంటర్ ఇచ్చిన కాంగ్రెస్ నేతలు

PM Modi SRCC Speech | త్రినేత్ర.న్యూస్ : సరిగ్గా 13 ఏళ్ల క్రితం.. గుజరాత్ సీఎంగా ఉన్న నరేంద్ర మోదీ.. ప్రధాని అభ్యర్థిగా తన జాతీయ స్థాయి ప్రస్థానాన్ని లాంచ్ చేసిన వేదిక అది. అదే శ్రీరామ్ కాలేజ్ ఆఫ్ కామర్స్ (SRCC). శనివారం ఆ కాలేజీ శతాబ్ది ఉత్సవాల సందర్భంగా మోదీ మళ్లీ అదే వేదికపై అడుగుపెట్టారు. అప్పుడు సీఎంగా 12 ఏళ్ల అనుభవంతో వస్తే.. ఇప్పుడు పీఎంగా 12 ఏళ్ల సుదీర్ఘ అనుభవంతో వచ్చి నాటి జ్ఞాపకాలను నెమరువేసుకున్నారు.

ఆ 'గ్లాస్' కథ మళ్లీ రిపీట్

2013 ఫిబ్రవరిలో ఎస్సార్సీసీ వేదికగా మోదీ చెప్పిన ఓ డైలాగ్ అప్పట్లో బాగా ఫేమస్ అయింది. "ఒక గ్లాసులో సగం నీళ్లున్నప్పుడు.. ఆశావాదులు సగం నిండి ఉందంటారు, నిరాశావాదులు సగం ఖాళీగా ఉందంటారు. కానీ నేను ఆ గ్లాసు పూర్తిగా నిండి ఉందని చూస్తాను.. సగం నీటితో, సగం గాలితో" అని అప్పట్లో ఆయన చెప్పారు. శనివారం నాటి సభలో ఆ విషయాన్ని మోదీ మళ్లీ ప్రస్తావించారు. ఆ సమయంలో దేశం తీవ్ర నెగెటివిటీలో ఉందని, అప్పుడే తాను ఆ మాటలు చెప్పానని, వాటి ఇంపాక్ట్ ఇప్పటికీ కనిపిస్తోందని మోదీ వివరించారు.

నాడు పాలసీ పారాలసిస్.. నేడు ఫాస్ట్ గ్రోత్

తన ప్రసంగంలో 2013 నాటి పరిస్థితులను, ఇప్పటి 'వికసిత్ భారత్' (Viksit Bharat) 2047 విజన్‌ను ఆయన పోల్చి చెప్పారు. కాక్రోచ్ జనతా పార్టీ (CJP) ఇటీవల చేసిన ఆందోళనల నేపథ్యంలో.. జెన్-జెడ్ (Gen-Z) యువతను ఆకర్షించేలా మోదీ తన ప్రసంగాన్ని మలిచారు.

"2013 నాటి ఇంటర్నెట్ వార్తలు చూస్తే.. ఎల్ఓసీ వద్ద జవాన్ల మృతి, 10 శాతం ద్రవ్యోల్బణం, అవినీతి లాంటి హెడ్‌లైన్స్ కనిపించేవి. ఎక్కడ చూసినా పాలసీ పారాలసిస్ ఉండేది. అప్పట్లో ప్రపంచం మనల్ని 'ఫ్రాజైల్ ఫైవ్' (కష్టాల్లో ఉన్న ఐదు ఆర్థిక వ్యవస్థలు) జాబితాలో చేర్చింది" అని నాటి కాంగ్రెస్ పాలనను పరోక్షంగా విమర్శించారు. కానీ, ఇప్పుడు ప్రపంచం సంక్షోభంలో ఉన్నా.. మన దేశం తొలి త్రైమాసికంలో (Q1) 7.8 శాతం జీడీపీ వృద్ధితో దూసుకెళ్తోందని చెప్పారు. ఆటోమొబైల్ సేల్స్, కన్‌స్ట్రక్షన్, మాన్యుఫాక్చరింగ్ రంగాలు పుంజుకోవడం దేశం ఫాస్ట్ ట్రాక్‌లో ఉందనడానికి నిదర్శనమన్నారు.

వాళ్లంతా 'అలిగిన మామయ్యలు'

7.8 శాతం వృద్ధితో దేశం ముందుకు వెళ్తుంటే.. విపక్షాలు జీర్ణించుకోలేకపోతున్నాయని మోదీ మండిపడ్డారు. దేశ వృద్ధి రేటును ప్రశ్నిస్తున్న ప్రతిపక్ష నాయకులను, కొందరు ఆర్థికవేత్తలను ఆయన 'నరాజ్ ఫూఫాజీ' (ఎప్పుడూ వంకలు పెట్టే మామయ్యలు) గా అభివర్ణించారు. వాళ్లకు ఎప్పుడూ నెగెటివిటీనే కనిపిస్తుందని ఎద్దేవా చేశారు. ఉగ్రవాదం ఇప్పుడు అంత దశకు చేరుకుందని, దెబ్బకు దెబ్బ తీసేలా గతేడాది చేసిన 'ఆపరేషన్ సిందూర్' లాంటి సర్జికల్ స్ట్రైక్స్ ద్వారా మన ఆర్మీ సరిహద్దులు దాటి మరీ ఉగ్రవాదులను మట్టుబెడుతోందని గుర్తుచేశారు.

కాంగ్రెస్ కౌంటర్లు

ప్రధాని మోదీ స్పీచ్‌పై కాంగ్రెస్ నాయకులు తమదైన స్టైల్‌లో కౌంటర్లు వేశారు. "ఎంత బోరింగ్ స్పీచ్ అంటే.. వింటే ఉల్లిపాయలకైనా కన్నీళ్లు రావాల్సిందే" అని కాంగ్రెస్ ఎంపీ పవన్ ఖేరా సెటైర్ వేశారు. అటు కన్హయ్య కుమార్ స్పందిస్తూ.. "మోదీ కేవలం 2013, 2047 గురించే మాట్లాడారు కానీ.. స్టూడెంట్స్, ప్రజల సమస్యల గురించి కనీసం పట్టించుకోలేదు" అని విమర్శించారు.

వచ్చే నెలతో ప్రభుత్వ అధినేతగా (గుజరాత్ సీఎం + పీఎం) 25 ఏళ్లు పూర్తి చేసుకోబోతున్న మోదీ.. టీచర్స్ డే నాడు ఎస్సార్సీసీ కాలేజీలో యువతనుద్దేశించి చేసిన ఈ ప్రసంగం ఇప్పుడు హాట్ టాపిక్‌గా మారింది.