Zipline Rescue Nepal | వరదలో కొట్టుకుపోయిన బ్రిడ్జి.. నేపాల్‌లో రెండు ఊర్లను కలుపుతున్న 250 మీటర్ల ‘జిప్‌లైన్’

Zipline Rescue Nepal | త్రినేత్ర.న్యూస్ : నేపాల్‌ (Nepal) దేవీఘాట్ కన్నీరు పెడుతోంది. త్రిశూలి నదికి (Trishuli River) వచ్చిన ఆకస్మిక వరదలు ఆ ప్రాంతాన్ని ఊహించని విధంగా ధ్వంసం చేశాయి. ఎటు చూసినా బురద, శిథిలమైన ఇళ్లు, భయపెట్టే దృశ్యాలే. ఆ రెండు ప్రాంతాలను కలిపే ప్రధాన బ్రిడ్జి నీళ్లలో కొట్టుకుపోవడంతో, ఇప్పుడు కేవలం ఓ 250 మీటర్ల జిప్‌లైన్ (Zipline) మాత్రమే వారి రాకపోకలకు ఏకైక దిక్కుగా మారింది.

పది రోజుల క్రితం కళకళలాడిన దేవీఘాట్ ఇప్పుడు లేదు. బురదలో సగం కూరుకుపోయిన పెద్దల చెప్పులు, ఓ చిన్నారి కాలి చెప్పు, పగిలిపోయిన సూట్‌కేసు, రాళ్ల మధ్య చిక్కుకున్న గిటార్.. ఇవన్నీ ఆ వరద మిగిల్చిన విషాదానికి సజీవ సాక్ష్యాలు. నదికి 50 నుంచి 60 మీటర్ల పరిధిలోని ఇళ్లన్నీ నేలమట్టమయ్యాయి. ఓ పెద్ద కాంక్రీట్ ఇల్లు వరద ఉధృతికి ఏకంగా 50 మీటర్ల దూరం కొట్టుకుపోవడం అక్కడి వినాశనానికి అద్దం పడుతోంది.

ఒకప్పుడు ఆ రెండు ఊర్లను కలిపిన బ్రిడ్జి ఇప్పుడు లేదు. కేవలం కొన్ని మెట్లు మాత్రమే మిగిలాయి. దీంతో స్థానికులు ఒక ఇనుప రాడ్‌కు, నదికి ఆవలి వైపున ఉన్న ఓ మర్రి చెట్టుకు తాడు కట్టి 250 మీటర్ల జిప్‌లైన్ ఏర్పాటు చేశారు. స్థానిక వాలంటీర్లు షిఫ్టుల వారీగా ఉదయం నుంచి ఈ జిప్‌లైన్ ద్వారా మనుషులను, నిత్యావసరాలను నదికి ఆవలి వైపుకు చేరుస్తున్నారు. "వరద ఉధృతినే చూశాం.. ఈ జిప్‌లైన్ ప్రయాణం మాకు పెద్ద భయం కాదు" అని ఓ వాలంటీర్ ధైర్యంగా చెబుతున్నాడు.

దీపక్ సునార్ అనే బ్యాంకర్ ఇల్లు వరదలో దెబ్బతింది. ప్రాణాలు దక్కినా, ఇల్లు బురదలో కూరుకుపోవడంతో ఆయన కుటుంబం రిలిఫ్ సెంటర్‌లోనే (Relief center) తలదాచుకుంటోంది. మరోవైపు సీతారాం అనే వ్యక్తి పరిస్థితి మరింత దారుణం. 40 ఏళ్లుగా ఉన్న సొంత ఇల్లు పూర్తిగా కొట్టుకుపోయింది, కేవలం వంటగది ఆనవాళ్లు మాత్రమే మిగిలాయి. "25 నిమిషాల్లో అంతా నాశనమైంది. ఇక్కడ మళ్లీ ఇల్లు కట్టుకునే ధైర్యం లేదు, సురక్షిత ప్రాంతానికి వెళ్లిపోతాం" అని ఆయన ఆవేదన వ్యక్తం చేస్తున్నాడు.

మసీనా అనే మహిళ తన కూతురిని చేయి పట్టుకుని కొండ పైకి పరిగెత్తి ప్రాణాలు దక్కించుకుంది. ఆసుపత్రిలో ఉన్న తన బిడ్డ కోసం ఇప్పుడు రోజూ ఇదే జిప్‌లైన్ ద్వారా ఎసెన్షియల్స్ (essentials) మోసుకెళ్తోంది. రాజు రిమాల్ అనే మరో వ్యక్తి వరద వస్తున్నప్పుడు గ్రామస్తులను అప్రమత్తం చేసి సుమారు 200 మంది ప్రాణాలు కాపాడాడు. కానీ తన ఫర్నిచర్ షాపు, ఇల్లు అన్నీ కోల్పోయాడు. ఇప్పుడు నదికి ఆవలి వైపు ఉన్న తన కుటుంబాన్ని చూసేందుకు ఈ జిప్‌లైన్ మీదే ఆధారపడుతున్నాడు.

నేపాల్ ఆర్మీ మరో మూడు నాలుగు రోజుల్లో కొత్త బ్రిడ్జిని నిర్మించేందుకు రాత్రింబవళ్లు ఎక్స్‌కవేటర్లతో (Excavators) పనిచేస్తోంది. కానీ ఎడతెరిపి లేకుండా కురుస్తున్న వర్షాలు అడ్డంకిగా మారాయి. బ్రిడ్జిలు కొట్టుకుపోయినా, ఇళ్లు కూలిపోయినా.. ఆ 250 మీటర్ల సన్నని జిప్‌లైన్ వైరు ఇప్పుడు దేవీఘాట్ ప్రజల బతుకు దారంగా మారింది. అసాధారణ పరిస్థితులను సైతం వారు తమ దైనందిన జీవితంలో సాధారణ భాగంగా మార్చుకుంటూ ముందుకు సాగుతున్నారు.