Patanjali Cow Ghee Seized | పతంజలి ఆవు నెయ్యిని వాడుతున్నారా? వెంటనే ఇది చదవండి

• పతంజలి ఆవు నెయ్యిలో కల్తీ అనుమానాలు
• మహారాష్ట్రలో రూ.9 కోట్ల ఆహార నిల్వలు సీజ్
• ఐఏఎస్ తుకారాం ముండే సంచలన నిర్ణయం

Patanjali Cow Ghee Seized | త్రినేత్ర న్యూస్ : దీపావళి పండుగ వేళ ప్రజల ఆరోగ్యంతో ఆటలాడుతున్న కల్తీ రాయుళ్లపై మహారాష్ట్ర ప్రభుత్వం ఉక్కుపాదం మోపింది. ముక్కుసూటి అధికారిగా గుర్తింపు పొందిన ఐఏఎస్ అధికారి, ఫుడ్ అండ్ డ్రగ్ అడ్మినిస్ట్రేషన్ (FDA) కమిషనర్ తుకారాం ముండే నేతృత్వంలో అధికారులు రాష్ట్రవ్యాప్తంగా విరుచుకుపడ్డారు. ఈ తనిఖీల్లో ప్రముఖ సంస్థ పతంజలి ఆవు నెయ్యి మొదలుకుని వంటనూనెలు, స్వీట్లు, సుగంధ ద్రవ్యాల వరకు ఏకంగా రూ.9.01 కోట్ల విలువైన కల్తీ, నాణ్యతలేని ఆహార పదార్థాలను అధికారులు సీజ్ చేశారు. తీవ్రమైన నిబంధనల ఉల్లంఘనకు పాల్పడిన 19 వ్యాపార సంస్థల లైసెన్సులను తక్షణమే రద్దు చేశారు.

రూ.20 లక్షల పతంజలి ఆవు నెయ్యి జప్తు

ఈ దాడుల్లో అందరినీ విస్మయానికి గురిచేసిన అంశం పతంజలి ఉత్పత్తుల వ్యవహారం. ఛత్రపతి శంభాజీనగర్ (ఔరంగాబాద్) సుందర్‌వాడీలోని పతంజలి సూపర్ డిస్ట్రిబ్యూటర్ 'దివ్య మహావితరక్' గోదాముపై ఎఫ్‌డీఏ అధికారులు దాడి చేశారు. అక్కడ నిల్వ ఉంచిన పతంజలి ఆవు నెయ్యిలో కల్తీ జరిగిందన్న అనుమానంతో పాటు, నిబంధనలకు విరుద్ధంగా తప్పుడు లేబులింగ్ (Misbranding) చేసినట్లు గుర్తించారు.

మొత్తం రెండు బ్యాచ్‌లకు చెందిన 4,032 డబ్బాలు (సుమారు 2,279.7 లీటర్లు) నెయ్యిని అధికారులు స్వాధీనం చేసుకున్నారు. దీని విలువ మార్కెట్లో రూ.20.20 లక్షలకు పైగా ఉంటుందని అంచనా. ఫుడ్ సేఫ్టీ అండ్ స్టాండర్డ్స్ యాక్ట్ (FSS Act 2006) సెక్షన్ 38(1)(సి) కింద ఈ స్టాక్‌ను జప్తు చేసి ల్యాబ్ పరీక్షలకు పంపించారు.

డీమార్ట్ గోదాములో 1.44 లక్షల కిలోల వంటనూనె సీజ్

కేవలం పతంజలి మాత్రమే కాకుండా ప్రముఖ రిటైల్ నెట్‌వర్క్‌లపైనా ఎఫ్‌డీఏ పంజా విసిరింది. థానే జిల్లా భివాండీలోని అవెన్యూ సూపర్‌మార్ట్స్ లిమిటెడ్ (డీమార్ట్ మాతృసంస్థ) గోదాము నుంచి వివిధ బ్రాండ్లకు చెందిన ఏకంగా 1,44,218 కిలోల వంటనూనెను అధికారులు స్వాధీనం చేసుకున్నారు. అలాగే సతారాలోని అమీన్ ట్రేడర్స్ నుంచి రూ.లక్షల విలువైన బియ్యం, పప్పులు, బెల్లం నిల్వలను సీజ్ చేశారు. పూణే, సోలాపూర్ ప్రాంతాల్లోని పలు ఆయిల్ మిల్లులు, ట్రేడర్లపైనా దాడులు నిర్వహించారు.

రాష్ట్రవ్యాప్తంగా 7 డివిజన్లలోని 114 కేంద్రాల్లో తనిఖీలు చేపట్టి సుమారు 3.53 లక్షల కిలోల సరుకును అధికారులు స్వాధీనం చేసుకున్నారు.

ఈగలు, బొద్దింకల మధ్య వంటలు: 19 సంస్థల లైసెన్సులు రద్దు

ముంబై, అమరావతి, శంభాజీనగర్ పరిధిలోని పలు ప్రముఖ రెస్టారెంట్లు, స్వీట్ షాపులు, మసాలా తయారీ కేంద్రాల్లో తనిఖీలు చేసిన అధికారులకు విస్తుపోయే నిజాలు వెల్లడయ్యాయి. వంటగదుల్లో అపరిశుభ్ర వాతావరణం, నిల్వ ఉంచిన పదార్థాలపై వాలుతున్న ఈగలు, బొద్దింకలు, సరైన డ్రైనేజీ లేకపోవడం వంటి తీవ్ర లోపాలను గుర్తించారు.

ముంబై మాతుంగాలోని కెఫే ఎంపైర్, ఘాట్‌కోపర్‌లోని కోకోబ్లిస్ కెఫే, అంటోప్ హిల్‌లోని సాగర్ మిల్క్ సెంటర్ సహా మొత్తం 19 సంస్థల రిజిస్ట్రేషన్లు, లైసెన్సులను ఎఫ్‌డీఏ రద్దు చేసింది. అనుమతి లేకుండా విక్రయిస్తున్న నిషేధిత ఆహార ఉత్పత్తులపై జరిపిన దాడుల్లో 13 ఎఫ్‌ఐఆర్‌లు నమోదు చేసి, 16 మందిని పోలీసులు అరెస్ట్ చేశారు.

ఈ-కామర్స్ దిగ్గజాలకు ఎఫ్‌ఎస్‌ఎస్‌ఏఐ షాక్

మరోవైపు కేంద్ర ఆహార భద్రతా ప్రమాణాల ప్రాధికార సంస్థ (FSSAI) ప్రముఖ ఈ-కామర్స్ సంస్థలపై దృష్టి సారించింది. 'టాటా 1ఎంజీ మెరైన్ కొల్లాజెన్ పౌడర్' (Tata 1mg Marine Collagen Powder) లేబులింగ్, తప్పుడు ప్రకటనల నిబంధనలను ఉల్లంఘించినందుకు గాను టాటా 1ఎంజీ, అమెజాన్, ఫ్లిప్‌కార్ట్, ఏసీఎఫ్‌వో ఫార్మాస్యూటికల్స్‌కు షోకాజ్ నోటీసులు జారీ చేసింది. దీనిపై 30 రోజుల్లోగా వివరణ ఇవ్వాలని ఆదేశించింది.

వినియోగదారులకు అధికారుల హెచ్చరిక

పండుగల సీజన్‌లో మార్కెట్లోకి భారీగా కల్తీ వస్తువులు వచ్చే ప్రమాదం ఉందని మహారాష్ట్ర ఎఫ్‌డీఏ ప్రజలను అప్రమత్తం చేసింది. గుర్తింపు పొందిన, లైసెన్స్ ఉన్న దుకాణాల నుంచే ఆహార పదార్థాలు కొనాలని సూచించింది. ప్యాకెట్లపై ఉండే తయారీ తేదీ, ఎక్స్‌పైరీ లేదా బెస్ట్ బిఫోర్ తేదీ, బ్యాచ్ నంబర్, ఎఫ్‌ఎస్‌ఎస్‌ఏఐ లైసెన్స్ నంబర్‌ను సరిచూసుకున్న తర్వాతే కొనుగోలు చేయాలని స్పష్టం చేసింది. లూజ్ నూనెలు, ప్యాకింగ్ లేని పాల ఉత్పత్తులకు దూరంగా ఉండాలని హెచ్చరించింది.