Maharashtra Teachers Arrest | పాఠ‌శాల‌లో పాకిస్థానీ పాట‌.. ప్రిన్సిప‌ల్‌, ఇద్ద‌రు టీచ‌ర్ల‌పై కేసు

• సోష‌ల్ మీడియాలో వైర‌ల్‌.. ఆల‌స్యంగా వెలుగులోకి

Maharashtra Teachers Arrest | త్రినేత్ర‌.న్యూస్‌: మ‌హారాష్ట్ర‌లోని ఓ పాఠ‌శాల‌లో పాకిస్థానీ పాట ప్ర‌ద‌ర్శించార‌న్న ఆరోప‌ణ‌ల‌తో ప్రిన్సిప‌ల్ స‌హా ఇద్దరు టీచ‌ర్ల‌పై పోలీసులు కేసు న‌మోదు చేసిన ఘ‌ట‌న ఆల‌స్యంగా వెలుగు చూసింది. బ‌జ‌ల్నా జిల్లాలో ప‌ర్టురు కిడ్స్ వ‌ర‌ల్డ్ పాఠ‌శాల‌లో గ‌తేడాది పాకిస్థానీ పాట‌ను ప్లే చేసిన వీడియో తాజాగా సోష‌ల్ మీడియాలో వైర‌ల‌వుతోంది. ఇంత‌కీ ఏం జ‌రిగిందంటే..

గ‌తేడాది పాఠశాలలో నిర్వహించిన వార్షిక సమావేశంలో విద్యార్థులు పాకిస్థానీ పాటకు నృత్యం చేశారని నెటిజన్లు ఆరోపించారు. పాకిస్థానీ ఛాందసవాది ముంతాజ్ ఖాద్రీ ఫొటోను సైతం ప్రదర్శించినట్లు పేర్కొన్నారు. అయితే ఈ వీడియోపై సోషల్‌ మీడియాలో పెద్దఎత్తున విమర్శలు వచ్చాయి. సదరు పాఠశాల గుర్తింపును రద్దు చేయాలని.. యాజమాన్యంపై క‌ఠిన‌ చర్యలు తీసుకోవాలని స్థానిక భాజపా ఎమ్మెల్యే బాబన్‌రావు లోనికర్‌ డిమాండ్ చేశారు. దేశ సార్వభౌమత్వం, ఐక్యత, సమగ్రతకు భంగం క‌లిగేలా పాఠ‌శాల‌ యాజమాన్యం వ్యవహరిస్తోందని ఆరోపించారు.

అయితే ఈ ఆరోపణలను పాఠశాల యాజమాన్యం ఖండించింది. ప్రదర్శించిన పాట తుర్కియే టీవీ సీరియల్‌ ‘ఎర్తుగ్రల్ ఘాజీ’ నుంచి తీసుకున్నదని.. పాక్‌కు సంబంధించినది కాదని స్కూల్‌ ప్రిన్సిపాల్ సిద్ధిఖీ తెలిపారు. కొంత‌మంది తమ పాఠశాలకు చెడ్డ పేరు తేవాలనే కుట్రతో ఈ దృశ్యాలను మార్ఫింగ్ చేసి సోషల్ మీడియాలో పోస్ట్ చేశార‌ని ప్రిన్సిపల్‌ ఆరోపిస్తున్నారు. ఇదిలా ఉండ‌గా ఈ ఘటనపై కేసు నమోదు చేసిన పోలీసులు ప్రిన్సిపల్‌, ఇద్దరు టీచర్లను అరెస్ట్‌ చేశామ‌ని చెప్పారు. ద‌ర్యాప్తు అనంత‌రం పూర్తి వివ‌రాలు వెల్ల‌డిస్తామ‌ని పేర్కొన్నారు.