Car Falls into Well | బావిలో ప‌డిన కారు.. ఒకే కుటుంబంలో 9 మంది మృతి

Car Falls into Well | త్రినేత్ర‌.న్యూస్‌: మహారాష్ట్రలోని నాశిక్ (Nashik) స‌మీపంలో ఘోర ప్రమాదం జరిగింది. శుక్ర‌వారం రాత్రి నాశిక్‌కు 25 కిలోమీట‌ర్ల దూరంలో ఓ కారు బావిలోకి దూసుకెళ్లింది (Car Falls into Well). దీంతో ఒకే కుటుంబానికి చెందిన‌ తొమ్మిది మంది మ‌ర‌ణించారు. వారిలో ఆరుగురు చిన్నారులు ఉన్నారు. ఈ ఘ‌ట‌న రాత్రి 10 గంట‌ల స‌మ‌యంలో జ‌రిగిన‌ట్లు తెలుస్తున్న‌ది. డ్రైవర్ వాహనంపై నియంత్రణ కోల్పోవడ‌మే ప్ర‌మాదానికి కార‌ణ‌మ‌ని పోలీసులు భావిస్తున్నారు.

నాశిక్ జిల్లాలోని దిండోరి తాలూకా శివాజీనగర్ ప్రాంతంలోని రాజ్ ఫంక్షన్ హాల్​లో శుక్రవారం సాయంత్రం ఒక ప్రైవేట్ గెట్ టుగెదర్ పార్టీ జరిగింది. ఆ కార్యక్రమానికి నగరం, చుట్టుపక్కల గ్రామాల నుంచి పెద్ద సంఖ్యలో చిన్నారులు, తల్లిదండ్రులు హాజరయ్యారు. రాత్రి సుమారు 10 గంటల సమయంలో ఈవెంట్​ ముగిసిన తర్వాత, దిండోరికి చెందిన దర్గోడే కుటుంబం ఎర్టిగా కారులో ఇంటికి తిరిగి బయలుదేరారు. ఈ క్ర‌మంలో అదుపుత‌ప్పిన కారు ఓ పొలంలో ఉన్న బావిలో పడిపోయింది.

స‌మాచారం అందుకున్న పోలీసులు ఘటనా స్థ‌లానికి చేరుకుని స్థానికుల‌తో క‌లిసి సహాయక చర్యలు చేప‌ట్టారు. అయితే, బావిలో నిండుగా నీరు ఉండ‌టంతో సహాయక చర్యలకు ఆటంకం ఏర్పడింది. అర్ధరాత్రి 12.15 గంట‌ల‌ సమయంలో రెండు క్రేన్లు, ఈతగాళ్ల సహాయంతో కారును, అందులో చిక్కుకున్న వారిని బయటకు తీశారు. మృతుల‌ను రాఖీ సునీల్ దర్గోడ్, ఆశా అనిల్ దర్గోడ్, సృష్టి అనిల్ దర్గోడ్, సునీల్ దర్గోడ్, శ్రేయాష్ దర్గోడ్, మాధురి దర్గోడ్, సమృద్ధి దర్గోడ్, రేష్మా దర్గోడ్, శ్రావణి దర్గోడ్​గా పోలీసులు గుర్తించారు. అంతా 7 నుంచి 32 ఏండ్ల వ‌య‌స్సులోపువారే కావ‌డం గ‌మ‌నార్హం. ఈ ఘ‌ట‌న‌పై కేసు న‌మోదుచేసి ద‌ర్యాప్తు చేస్తున్నారు.

#WATCH | Nashik, Maharashtra: A car fell into a water-filled well in Shivaji Nagar, Dindori, last night, killing nine members of the same family. They were returning home after attending an event when the driver lost control and the car plunged into the well. Dindori police have… pic.twitter.com/mdHK6Tmftx

— ANI (@ANI) April 4, 2026