AIADMK MLAs Resignation | ఆ ఆరుగురు ఎమ్మెల్యేల రాజీనామాల ఆమోదం సరైనదే.. స్పీకర్ నిర్ణయానికి హైకోర్టు గ్రీన్ సిగ్నల్

• అన్నాడీఎంకేకు మద్రాస్ హైకోర్టులో ఎదురుదెబ్బ
• ఆరుగురు ఎమ్మెల్యేల రాజీనామాల ఆమోదం సరైనదే

AIADMK MLAs Resignation | త్రినేత్ర న్యూస్ : తమిళనాడు రాజకీయాల్లో కీలక పరిణామం చోటుచేసుకుంది. అన్నాడీఎంకేకు చెందిన ఆరుగురు ఎమ్మెల్యేలు సమర్పించిన రాజీనామాలను అసెంబ్లీ స్పీకర్ జేసీడీ ప్రభాకర్ ఆమోదించడాన్ని మద్రాస్ హైకోర్టు పూర్తిగా సమర్థించింది. విప్ ఉల్లంఘించి అధికార టీవీకే (తమిళగ వెట్రి కళగం) పార్టీలో చేరిన ఈ ఎమ్మెల్యేల రాజీనామాలను రద్దు చేయాలని, వారిపై ముందుగా అనర్హత వేటు వేయాలని అన్నాడీఎంకే విప్ అగ్రి ఎస్.ఎస్. కృష్ణమూర్తి దాఖలు చేసిన పిటిషన్లను కోర్టు కొట్టివేసింది.

ఈ వ్యవహారంలో స్పీకర్ తీసుకున్న నిర్ణయం భారత రాజ్యాంగంలోని ఆర్టికల్ 190(3)(బి) పరిధిలోనే ఉందని ప్రధాన న్యాయమూర్తి జస్టిస్ సుశ్రుత్ అరవింద్ ధర్మాధికారి, జస్టిస్ జి. అరుళ్ మురుగన్‌లతో కూడిన డివిజన్ బెంచ్ స్పష్టం చేసింది.

ఎమ్మెల్యేలను ఎవరూ బలవంతం చేయలేరు: కోర్టు కీలక వ్యాఖ్యలు

తమ శాసనసభ్యత్వానికి రాజీనామా చేయడం, వేరే పార్టీలో చేరడం అనేది ప్రజాస్వామ్య ప్రక్రియలో భాగమని హైకోర్టు పేర్కొంది. "ఒక ఎమ్మెల్యే స్వచ్ఛందంగా తన పదవి నుంచి తప్పుకోవాలని భావిస్తే.. పదవిలోనే కొనసాగాలని వారిని ఎవరూ బలవంతం చేయలేరు. సంబంధిత ఎమ్మెల్యేలు స్వయంగా స్పీకర్ ఎదుట హాజరై, తమ సంతకాలను ధ్రువీకరించి, రాజీనామా నిర్ణయాన్ని స్పష్టం చేశారు. అలాంటి పరిస్థితుల్లో రాజీనామా వెనుక ఉన్న ఉద్దేశాలు, రాజకీయ కారణాలపై స్పీకర్ లోతైన దర్యాప్తు (roving inquiry) చేయాల్సిన అవసరం లేదు" అని న్యాయస్థానం అభిప్రాయపడింది.

అనర్హత వేటుపై రెండు నెలల గడువు

రాజీనామా ఆమోదం, అనర్హత చర్యలు రెండూ రాజ్యాంగపరంగా వేర్వేరు అంశాలని బెంచ్ వెల్లడించింది. రాజీనామాలు ఆమోదించినంత మాత్రాన వారిపై దాఖలైన అనర్హత పిటిషన్లు ముగిసిపోయినట్లు కాదని స్పష్టం చేసింది. ఎమ్మెల్యేలపై ఉన్న అనర్హత పిటిషన్లపై స్పీకర్ నిర్ణయం తీసుకోవాల్సిందేనని స్పష్టం చేస్తూ, ఈ ప్రక్రియను రెండు నెలల్లోగా పూర్తి చేయాలని ఆదేశించింది.

ఎవరెవరు ఆరుగురు ఎమ్మెల్యేలు?

గత సాధారణ ఎన్నికల్లో అన్నాడీఎంకే తరఫున గెలిచి, ఆ తర్వాత ముఖ్యమంత్రి సి. జోసెఫ్ విజయ్ నేతృత్వంలోని టీవీకే పార్టీలో చేరిన ఎస్. జయకుమార్ (పెరుందురై), మరకతం కుమారవేల్ (మదురాంతకం), పి. సత్యభామ (ధారాపురం), ఇసక్కి సుబ్బయ్య (అంబసముద్రం), సి. విజయభాస్కర్ (విరాలిమలై), ఎం.ఆర్. విజయభాస్కర్ (కరూర్) రాజీనామాలను స్పీకర్ ఆమోదించారు. వీరిలో మరకతం కుమారవేల్, సత్యభామ అక్టోబర్ 6న జరిగిన ఉపఎన్నికల్లో ఇప్పటికే టీవీకే అభ్యర్థులుగా పోటీ చేసి తిరిగి విజయం సాధించడం గమనార్హం.

పార్టీ మారిన ఎమ్మెల్యేలపై కఠిన చర్యలు తీసుకోవాలని న్యాయపోరాటం చేస్తున్న అన్నాడీఎంకే ప్రధాన కార్యదర్శి ఎడప్పాడి పళనిస్వామి వర్గానికి ఈ తీర్పు పెద్ద షాక్‌గా మారగా, అధికార టీవీకే వర్గాల్లో నూతనోత్సాహాన్ని నింపింది.