Lunar Eclipse | ఈ ఏడాది చివ‌రి చంద్ర‌గ్ర‌హ‌ణం రేపే.. భార‌త్‌లో క‌నిపిస్తుందా..?

Lunar Eclipse | ఈ ఏడాది చివరి చంద్రగ్రహణం శుక్రవారం ఏర్పడనుంది. భారత కాలమానం ప్రకారం గ్రహణం ఉదయం వేళ కొనసాగనున్నప్పటికీ.. దేశంలో ఎక్కడి నుంచీ ఇది కనిపించే అవకాశం లేదని శాస్త్రవేత్తలు తెలిపారు. దీంతో ఖగోళ ఔత్సాహికులు ఇతర దేశాల్లోని దృశ్యాలను ప్రత్యక్ష ప్రసారాలు, సామాజిక మాధ్యమాల ద్వారా వీక్షించేందుకు అవ‌కాశం ఉన్న‌ది. భారత కాలమానం ప్రకారం ఉదయం 6.53 గంటలకు ప్రారంభమయ్యే గ్రహణం మధ్యాహ్నం 12.51 గంటల వరకు కొనసాగనుంది. ఉదయం 9.43 గంటలకు గరిష్ట‌ స్థాయికి చేరుకోనుంది. ఆఫ్రికా, యూరప్‌, ఉత్తర అమెరికా, దక్షిణ అమెరికా, పశ్చిమ ఆసియాలోని కొన్ని ప్రాంతాల్లో గ్రహణ దృశ్యం స్పష్టంగా కనిపించనుంది. ఈ గ్రహణం పాక్షిక చంద్రగ్రహణంగా ఏర్పడనుంది. భూమి నీడ చంద్రుడిపై పడే సమయంలో దాని ఉపరితలంలో దాదాపు 96 శాతం మేర నీడలోకి వెళ్లనుంది. మిగిలిన సుమారు 4 శాతం ప్రాంతం సూర్యకాంతిని అందుకుంటుంది. దీంతో చంద్రుడు పూర్తిగా కనుమరుగుకాకుండా ముదురు ఎరుపు రంగులో కనిపిస్తాడు. ఈ దీన్నే సాధారణంగా ‘బ్లడ్ మూన్‌’గా పిలుస్తారు. భారత్‌లో గ్రహణాన్ని నేరుగా వీక్షించే అవకాశం లేకపోవడంతో ఇక్కడి ప్రజలకు ఇది ఆకాశంలో సాధారణ పౌర్ణమి చంద్రుడిలాగే కనిపించనుంది.