Omar Abdullah Nidhi Razdan Marriage | మూడుముళ్ల బంధంతో ఒక్కటైన జమ్ముకశ్మీర్ సీఎం ఒమర్ అబ్దుల్లా, జర్నలిస్ట్ నిధి రజ్దాన్

Omar Abdullah Nidhi Razdan Marriage | త్రినేత్ర న్యూస్ : జమ్ముకశ్మీర్ ముఖ్యమంత్రి ఒమర్ అబ్దుల్లా (56) తన జీవితంలో కొత్త అధ్యాయాన్ని ప్రారంభించారు. ప్రముఖ సీనియర్ జర్నలిస్ట్ నిధి రజ్దాన్ (49)ను ఆయన వివాహం చేసుకున్నారు. అక్టోబర్ 30న న్యూఢిల్లీలో 'స్పెషల్ మ్యారేజ్ యాక్ట్' కింద ఇరువైపులా కుటుంబ సభ్యులు సాక్షులుగా వీరి వివాహం నిరాడంబరంగా జరిగింది.

శనివారం ఉదయం ఈ విషయాన్ని ఒమర్ అబ్దుల్లా స్వయంగా ‘ఎక్స్’ వేదికగా వెల్లడించారు. ఇద్దరు కలిసి ఉన్న పెళ్లి ఫోటోలను షేర్ చేస్తూ.. "నిన్నటితో సరికొత్త ప్రయాణం మొదలైంది" అని క్యాప్షన్ ఇచ్చారు. దీనికి నిధి రజ్దాన్ కూడా స్పందిస్తూ "ఇట్స్ డన్ బ్రో" అంటూ సరదాగా పోస్ట్ చేసి తమ వివాహ బంధాన్ని ధ్రువీకరించారు.

కుటుంబ సభ్యుల సమక్షంలో ప్రైవేట్ ఈవెంట్

పెళ్లికి ముందు శ్రీనగర్‌లో ఇరు కుటుంబాల మధ్య చిన్నపాటి వేడుక జరిగింది. ఆ తర్వాత ఢిల్లీలో చట్టబద్ధంగా వివాహ నమోదు చేసుకున్నారు.

ఈ వేడుకలకు నేషనల్ కాన్ఫరెన్స్ అధ్యక్షుడు, ఒమర్ తండ్రి ఫరూక్ అబ్దుల్లా, తల్లి మోలీ అబ్దుల్లా, సోదరీమణులతో పాటు.. నిధి రజ్దాన్ తల్లిదండ్రులైన ప్రముఖ సీనియర్ జర్నలిస్ట్ ఎం.కె. రజ్దాన్, సరళా రజ్దాన్ హాజరై నూతన దంపతులను ఆశీర్వదించారు. కేవలం అతికొద్ది మంది బంధువులు, సన్నిహితుల సమక్షంలోనే ఈ కార్యక్రమాలు ముగిశాయి.

ఇద్దరికీ ఇది రెండో వివాహం

ఒమర్ అబ్దుల్లా, నిధి రజ్దాన్ ఇద్దరికీ ఇది రెండో వివాహం కావడం గమనార్హం. ఒమర్ అబ్దుల్లాకు గతంలో పాయల్ అబ్దుల్లాతో వివాహం కాగా, వీరికి ఇద్దరు కుమారులు ఉన్నారు. అయితే వ్యక్తిగత విభేదాల కారణంగా సుదీర్ఘకాలం పాటు న్యాయపోరాటం సాగింది. చివరకు ఈ ఏడాది జూలైలో సుప్రీంకోర్టు రాజ్యాంగంలోని ఆర్టికల్ 142 ప్రకారం పరస్పర అంగీకారంతో వారిద్దరికీ అధికారికంగా విడాకులు మంజూరు చేసింది. వివాదాలన్నీ సమసిపోయిన కొద్ది నెలలకే ఒమర్ అబ్దుల్లా, నిధి రజ్దాన్‌తో కలిసి కొత్త జీవితాన్ని ప్రారంభించారు.

A new journey began yesterday 💍@Nidhi https://t.co/BXbdLq2d1H

— Omar Abdullah (@OmarAbdullah) October 31, 2026

It’s done bro 💍 @OmarAbdullah https://t.co/I3V5HnCz7C

— Nidhi Razdan (@Nidhi) October 31, 2026