Aviation Turbine Fuel | పెరిగిన ఇంధన భారం: మమ్మల్ని ఆదుకోండి.. లేదంటే విమానాలు బందే.. కేంద్రానికి ఎయిర్‌లైన్స్ సంస్థల విజ్ఞప్తి

Aviation Turbine Fuel | త్రినేత్ర.న్యూస్ : మధ్యప్రాచ్యంలో రగులుతున్న యుద్ధ జ్వాలలు భారత విమానయాన రంగానికి (Aviation Sector) ప్రమాద ఘంటికలు మోగిస్తున్నాయి. విమాన ఇంధన (ATF) ధరలు ఆకాశాన్ని అంటుతుండటంతో.. పరిస్థితులు ఇలాగే కొనసాగితే ఏ క్షణమైనా "ఆపరేషన్స్ నిలిపివేయాల్సిన" దుస్థితి వస్తుందని ఎయిర్‌లైన్స్ సంస్థలు ఆందోళన వ్యక్తం చేస్తున్నాయి. ఈ మేరకు టాటా గ్రూప్‌నకు చెందిన ఎయిరిండియాతో సహా ఇండిగో, స్పైస్‌జెట్ లాంటి ప్రధాన సంస్థలు.. పౌర విమానయాన శాఖకు ఏప్రిల్ 26న ఒక లేఖ రాశాయి.

అమాంతం పెరిగిన నిర్వహణ వ్యయం

సాధారణంగా ఒక విమానయాన సంస్థ మొత్తం నిర్వహణ ఖర్చులో ఈ ఏవియేషన్ టర్బైన్ ఫ్యూయల్ (ATF) వాటా 30 నుంచి 40 శాతం వరకు ఉంటుంది. కానీ, ఇటీవలి కాలంలో కిలోలీటర్ ATF (1000 లీటర్లు) ధర రూ.2 లక్షలు దాటడంతో.. ఈ ఖర్చు ఏకంగా 55-60 శాతానికి చేరుకుందని పరిశ్రమ వర్గాలు ఆవేదన వ్యక్తం చేస్తున్నాయి. దీనివల్ల లాభాలు పూర్తిగా హరించుకుపోతున్నాయని, అంతర్జాతీయ రూట్లలో సేవలు అందించడం ఆర్థికంగా పెనుభారంగా మారిందని 'ఫెడరేషన్ ఆఫ్ ఇండియన్ ఎయిర్‌లైన్స్ (FIA)' ఆ లేఖలో పేర్కొంది.

ప్రభుత్వం ముందు ఎయిర్‌లైన్స్ ప్రధాన డిమాండ్లు ఇవే

ఈ తీవ్రమైన ఒత్తిడి నుంచి బయటపడేందుకు తక్షణ, దీర్ఘకాలిక పరిష్కారాలను చూపాలని FIA కేంద్రాన్ని కోరింది.

ఎక్సైజ్ డ్యూటీ తొలగింపు: తక్షణ ఊరటగా.. ATF పై ప్రస్తుతం ఉన్న 11 శాతం ఎక్సైజ్ డ్యూటీని తాత్కాలికంగా రద్దు చేయాలి. అలాగే కొన్ని రాష్ట్రాల్లో 25 శాతం వరకు ఉన్న వ్యాట్ (VAT) ను తగ్గించేలా చొరవ తీసుకోవాలి.

ధరల్లో ఏకరూపత: దేశీయ, అంతర్జాతీయ కార్యకలాపాల మధ్య ఇంధన ధరల విషయంలో ఉన్న భారీ వ్యత్యాసాన్ని సరిచేయాలి. గతంలో అనుసరించిన "క్రాక్ బ్యాండ్" (Crack Band) విధానాన్ని తిరిగి తీసుకురావాలి. (ముడిచమురు, రిఫైన్డ్ ఏటీఎఫ్ ధరల మధ్య విపరీతమైన తేడాలు రాకుండా చూసే పద్ధతినే క్రాక్ బ్యాండ్ అంటారు).

హేతుబద్ధత: ప్రభుత్వం దేశీయ విమానాల ఏటీఎఫ్ ధరల పెంపును లీటరుకు రూ.15కు పరిమితం చేసినప్పటికీ, అంతర్జాతీయ కార్యకలాపాలకు మాత్రం లీటరుకు రూ.73 పెంచింది. ఈ అసమానతలను వెంటనే తొలగించాలి.

గల్ఫ్ సంక్షోభమే అసలు కారణం

ప్రస్తుతం తలెత్తిన ఈ ఇంధన ధరల పెరుగుదలకు ప్రధాన కారణం అమెరికా-ఇరాన్ ఉద్రిక్తతలు, హార్ముజ్ జలసంధి (Strait of Hormuz) వద్ద ఇరాన్ ఆంక్షలే. ప్రపంచ ముడిచమురులో దాదాపు ఐదో వంతు ఈ మార్గం గుండానే రవాణా అవుతుంది. సౌదీ అరేబియా, కువైట్, ఇరాక్, కతార్, యూఏఈ తదితర దేశాల నుంచి ఆసియాకు చమురు ఈ మార్గం నుంచే వస్తుంది. ఇక్కడ ఏమాత్రం ఆటంకం ఏర్పడినా అది చమురు వాణిజ్యంపై తీవ్ర ప్రభావం చూపుతుంది.

ముడి చమురు ధరలు తగ్గినప్పుడు కూడా క్రాక్ స్ప్రెడ్స్ (రిఫైనింగ్ మార్జిన్లు) వల్ల ఏటీఎఫ్ ధరలు ఎక్కువగానే ఉంటున్నాయని, దీనివల్ల విమానాల షెడ్యూల్స్, టిక్కెట్ ధరలు నిర్ణయించడం కష్టంగా మారిందని ఎయిర్‌లైన్స్ చెబుతున్నాయి.

ప్రయాణికులపై పడనున్న భారం

ప్రస్తుతానికి పెరిగిన ఇంధన భారాన్ని ఎయిర్‌లైన్స్ మోస్తున్నప్పటికీ, ఇది ఎక్కువ కాలం సాధ్యం కాదని పరిశ్రమ వర్గాలు స్పష్టం చేస్తున్నాయి. ప్రభుత్వం నుంచి తగిన మద్దతు లభించకపోతే, ఈ భారం నేరుగా ప్రయాణికులపైనే పడుతుంది.

అదే జరిగితే ఈ టైమ్‌లో రాబోయే రోజుల్లో విమాన టిక్కెట్ల ధరలు భారీగా పెరిగే అవకాశం ఉంది. అలాగే ఆర్థికంగా గిట్టుబాటు కాని లాంగ్-హాల్ (సుదూర) రూట్లలో విమాన సర్వీసులను కుదించడం లేదా పూర్తిగా రద్దు చేయడం వంటి కఠిన నిర్ణయాలు తీసుకునే దిశగా విమానయాన సంస్థలు అడుగులు వేస్తున్నాయి. ఇది కేవలం ఖర్చుల గురించిన సమస్య కాదని, ఎయిర్‌లైన్స్ మనుగడకు సంబంధించిన విషయమని FIA స్పష్టం చేసింది. బంతి ఇప్పుడు కేంద్ర ప్రభుత్వం కోర్టులో ఉంది.