DMK vs TVK | కాంగ్రెస్ వెన్నుపోటు పొడిచింది.. సీఎం విజయ్‌తో రాజీ లేదు: భగ్గుమన్న డీఎంకే

DMK vs TVK | త్రినేత్ర.న్యూస్ : తమిళనాడు (Tamil Nadu) రాజకీయాల్లో అనూహ్య పరిణామాలు చోటుచేసుకుంటున్నాయి. జాతీయ స్థాయిలో బీజేపీకి వ్యతిరేకంగా పోరాడుతున్న ఇండియా కూటమిలో (INDIA bloc) ఇప్పుడు భారీ చీలిక స్పష్టంగా కనిపిస్తోంది. ముఖ్యమంత్రి విజయ్ (CM Vijay) నేతృత్వంలోని టీవీకే (TVK), ఎంకే స్టాలిన్ నేతృత్వంలోని డీఎంకే (DMK) పార్టీలు జాతీయ స్థాయిలో కలిసి పనిచేయాలన్న ప్రతిపాదనను స్టాలిన్ పార్టీ నిర్మొహమాటంగా తిరస్కరించింది.

ఆ మోడల్ ఇక్కడ వర్కౌట్ అవ్వదు

రాష్ట్రంలో బద్ధ శత్రువులైనప్పటికీ.. కేరళ, పశ్చిమ బెంగాల్ రాష్ట్రాల తరహాలో జాతీయ స్థాయిలో కలిసి పనిచేయాలంటూ వీసీకే (VCK) చీఫ్ తొల్ తిరుమావళవన్ చేసిన ప్రతిపాదన ఈ వివాదానికి ఆజ్యం పోసింది. బీజేపీని నిలువరించాలంటే ప్రతిపక్షాల ఐక్యత ముఖ్యమంటూ ఈ ప్రతిపాదనకు కాంగ్రెస్ మద్దతు పలికింది. కానీ, మారిన రాజకీయ సమీకరణాల నేపథ్యంలో ఈ మోడల్ తమిళనాడులో పనిచేయదని డీఎంకే తేల్చిచెప్పింది.

కాంగ్రెస్ వెన్నుపోటు పొడిచింది

ఇటీవల జరిగిన అసెంబ్లీ ఎన్నికల తర్వాత కాంగ్రెస్ పార్టీ తమను తీవ్రంగా మోసం చేసిందని డీఎంకే ఎంపీ గణపతి పి.రాజ్‌కుమార్ మండిపడ్డారు. కేవలం మంత్రి పదవుల (ministerial berths) కోసమే పదేళ్ల పొత్తును కాదని కాంగ్రెస్.. విజయ్ పార్టీతో చేతులు కలిపిందని ఆరోపించారు. ఇప్పుడు వీసీకేను ఒక రాయబారిగా వాడుకుంటూ తమను ఒప్పించే ప్రయత్నం చేస్తోందని ఆయన విమర్శించారు. అసలు పార్లమెంట్‌లో ఒక్క ఎంపీ కూడా లేని టీవీకేని ఇండియా కూటమిలో చేర్చుకోవడంపై తీవ్రంగా ఆలోచించాలన్నారు.

"వీసీకే చేసిన ప్రతిపాదనను డీఎంకే నాయకత్వం అంగీకరిస్తుందని నేను అనుకోను. కేరళ, పశ్చిమ బెంగాల్ మోడల్ ఇక్కడ సెట్ అవ్వదు. ఎందుకంటే, తమిళనాడు రాజకీయాల్లో టీవీకే మూడో ప్రధాన శక్తిగా ఎదిగింది. అధికారాన్ని చేజిక్కించుకుంది. జాతీయ ప్రయోజనాలను గాలికొదిలేసి డీఎంకేకు కాంగ్రెస్ చేసిన నష్టం ఇండియా కూటమికి పెద్ద ఎదురుదెబ్బ" అని ఆయన అభిప్రాయపడ్డారు.

అసలు వివాదం ఎక్కడ మొదలైందంటే?

తమిళనాడు అసెంబ్లీ ఎన్నికల తర్వాత డీఎంకే అధికారం కోల్పోయింది. మెజారిటీకి కొద్ది దూరంలో నిలిచిపోయిన విజయ్ నేతృత్వంలోని టీవీకేకి (TVK) కాంగ్రెస్ మద్దతు పలికి.. డీఎంకేతో తన తొమ్మిదేళ్ల బంధాన్ని తెంచుకుంది. టీవీకే మైనార్టీ ప్రభుత్వంలో వీసీకే, ఐయూఎంఎల్ (IUML) నేరుగా చేరగా.. సీపీఐ, సీపీఎం బయటి నుంచి మద్దతు ఇస్తున్నాయి.

ఈ నేపథ్యంలోనే రాష్ట్రంలో పరిస్థితులు ఎలా ఉన్నా జాతీయ స్థాయిలో బీజేపీకి వ్యతిరేకంగా టీవీకే, డీఎంకే ఒకే తాటిపైకి రావాలని కాంగ్రెస్ ఎంపీ జ్యోతిమణి సైతం కోరారు. "ప్రజాస్వామ్య పునాదులను బీజేపీ నాశనం చేస్తోంది. దేశాన్ని కాపాడుకోవాలంటే మనమంతా కలిసి నడవాల్సిన సమయం ఇది" అని ఆమె వ్యాఖ్యానించారు.

ముందు విజయ్ ఒప్పుకుంటారా?

అయితే.. కాంగ్రెస్, వీసీకే వాదనలను డీఎంకే తోసిపుచ్చుతోంది. ముందుగా ఈ ప్రతిపాదనకు సీఎం విజయ్ అంగీకరిస్తారా? అని డీఎంకే అధికార ప్రతినిధి టీకేఎస్ ఇళంగోవన్ సవాల్ విసిరారు.

"తిరుమావళవన్ ముందుగా సీఎం విజయ్‌తో మాట్లాడాలి. ఆయన డీఎంకేను తన ప్రధాన రాజకీయ శత్రువుగా ప్రకటిస్తున్నారు. అలాంటప్పుడు మేం వారితో ఎలా వేదిక పంచుకుంటాం?" అని ఇళంగోవన్ ప్రశ్నించారు. ఈ తాజా పరిణామాలతో తమిళనాడులో ప్రతిపక్షాల ఐక్యత అనేది ఇండియా కూటమికి పెద్ద సవాల్‌గా మారిందని రాజకీయ విశ్లేషకులు భావిస్తున్నారు.